Ish-eprori i lartë tregon si u tradhtua Ushtria Çlirimtare e Kosovës

Më 27 dhjetor, u shënua përvjetori i Ditës së Flamurit, një ditë simbolike për shqiptarët kudo ndodhen.

Në një prononcim për “Bota sot”, ish- eprori i lartë i Ushtrisë Çlirimtare të Kosovës, Naim Miftari thekson se pas luftës për lirinë e Kosovës, e cila filloi me UÇK‑në, vendi përjetoi një çmim të lartë: miliona refugjatë, viktima civile dhe shkatërrim.

Ai kritikon tradhtinë ndaj UÇK‑së nga klani i Hashim Thaçit, i cili nënshkroi marrëveshjen K90 dhe demobilizoi ushtrinë e çlirimtarëve.

Ai ka shtuar se pas kësaj u formuan TMK dhe më pas FSK, që ishin struktura të kontrolluara dhe jo ushtri e vërtetë.

“Pas luftës vendimtare për lirinë e Kosovës, që e nisi guerilja e UÇK‑së, ku më vonë ndryshuan gjërat në fatkeqësinë më të dhimbshme për popullin tonë, u implikua edhe NATO‑ja me bombardimet që ia bëri Serbisë dhe erdhi liria me çmim të lartë: me miliona refugjatë, dhjetëra mijë viktima civile, dhunime, djegie, plaçkitje… Por pas luftës, UÇK‑së iu bë një tradhti klasike, tradhti që ia bëri klani i Hashim Thaçit, i cili për interesat e veta politike, duke treguar servilitetin e tij për pushtet, nënshkroi marrëveshjen K90 — demobilizimin komplet të UÇK‑së. U çarmatos Ushtria Çlirimtare, u lanë rrugëve dhe u dorëzuan të gjitha ato dhjetëra mijëra armë që nuk na i kishte dhuruar askush, por i kishim blerë dhe i kishim sjellë nga Shqipëria në Kosovë me shpinën tonë si ushtarë vullnetarë të UÇK‑së!

U formua TMK‑ja, që ishte pothuajse një organizatë humanitare ose si një OJQ. Pastaj u formua FSK‑ja, e cila nuk ishte ushtri dhe ishte e monitoruar dhe një forcë e kontrolluar. Gjërat morën kahje të mira në kohën e qeverisjes së Ramush Haradinajt, i cili, pos korrupsionit, ka edhe mijëra gabime të tjera dhe flet shpesh fantazi dhe jo realitet. Por Ramush Haradinaj ka tri merita në jetën e vet që s’ia mohon askush: e para, dha gjak dëshmori — iu vranë dy vëllezër për lirinë e Kosovës; e dyta, i tha jo, nuk pranoj ndarjen e Kosovës, ndarje që ishte përgatitur nga Vuçiçi, Rama, Thaçi, Mustafa, Putini e Macroni; kurse meritën e tretë dhe të fundit Ramush Haradinaj e ka se, gjatë një vizite në Pentagonin Amerikan, arriti ta bindë kreun e ushtrisë amerikane ta pranojë dhe të lejojë formimin e ushtrisë së Kosovës, pasi pengesa kryesore është NATO‑ja që në Kosovë vepron akoma sipas nenit 1244 dhe nuk e njeh sovranitetin e Kosovës si shtet, por e njeh si administratë!”, ka thënë Miftari.

Gjithashtu, Miftari ka shtuar se FSK-ja sot është një ushtri reale me armë moderne, autoblinda, artileri, drona dhe do të ketë edhe tanke, helikopterë dhe avionë ushtarakë.

“Sa i përket FSK‑së sot, kjo forcë është ushtri që ka armë ushtarake si autoblinda, artileri, drona ushtarakë, raketa… dhe do të ketë edhe helikopterë, tanke dhe aeroplanë ushtarakë më vonë. Kjo meritë i takon qeverisë së Albin Kurtit, që dha qindra miliona euro për armatosjen e FSK‑së, dhe në këtë çështje nuk duhet harruar kontributi i madh i ish‑ministrit të mbrojtjes Armend Mehaj dhe Ejup Maqedonci”, është shprehur ai.

Gjithashtu, Miftari ka theksuar se qeveria Kurti nuk ka bërë gabimet e mëparshme të korrupsionit, duke siguruar armatim dhe pajisje të duhura për FSK-në.

“Qeveria Kurti nuk i bëri gabimet dhe keqpërdorimet e qeverive të mëhershme, ku korrupsioni kishte arritur deri aty sa vidhej edhe paraja për armë, për municion, për veshmbathje; madje vidhej paraja edhe për ushqimin e ushtarëve e policëve tanë. Kosova duhet të armatoset e të pajiset mirë për luftë, pasi forca politike, ekonomike dhe sidomos ajo ushtarake e ruan paqen, e ruan stabilitetin dhe e ruan integritetin e një shteti”, ka përfunduar Miftari.