Letra e BE-së ndaj Qeverisë, presion i panevojshëm mbi fituesin e zgjedhjeve – analistët me kritika të ashpra

Zyrtarët e Bashkimit Evropian kanë bërë të ditur se nuk do të zhvillojnë takime zyrtare brenda ndërtesës së Qeverisë së Kosovës derisa vendi të ketë një ekzekutiv me mandat të plotë.

Ky qëndrim u bë i njohur përmes një letre të dërguar kryeministrit Albin Kurti më 8 gusht nga ambasadori i BE-së në Kosovë, Aivo Orav.

Sipas letrës, vendimi i BE-së është marrë pas aktgjykimit të Gjykatës Supreme të Kosovës më 25 qershor dhe pas konsultimeve me shtetet anëtare, duke përshtatur praktikat e angazhimit të Bashkimit Evropian në përputhje me këtë vendim.

“Në përputhje me këtë aktgjykim dhe në interes të qëndrueshmërisë institucionale dhe respektimit të sundimit të ligjit, vizitorët e nivelit të lartë nga shtetet anëtare të BE-së dhe institucionet e BE-së do të përmbahen, përkohësisht, nga mbajtja e takimeve me kryeministrin në detyrë dhe ministrat brenda ndërtesës së Qeverisë së Kosovës, derisa të vijë një qeveri me mandat të plotë”, thuhet në letër.

Kurse pas kësaj letre, ka pasur një reagim nga Qeveria e Kosovës.

“Kushdo që kërkon takim me kryeministrin në detyrë të Republikës së Kosovës, duhet të vijë në vendin ku punon kryeministri në detyrë i Republikës së Kosovës”.

“Gjithsesi kjo nuk do të thotë që nuk mban takime pune edhe jashtë zyrës së tij, por për këtë duhet të ketë dakordim të palëve. Takime jashtë mjediseve të Kryeministrisë kanë ndodhur edhe në të kaluarën edhe gjatë kohës sa ka qenë me mandat të plotë”.

Aliçkaj: Padrejtësitë evropiane ndaj kombit shqiptar nuk kanë të ndalur

ImageAgim AliçkajFoto galeri
Veprimtari Agim Aliçkaj, ka kritikuar vendimin e Bashkimit Evropian për të mos zhvilluar takime brenda ndërtesës së Qeverisë së Kosovës derisa të krijohet një ekzekutiv me mandat të plotë.

Ai e ka cilësuar vendimin si “të padrejtë dhe të çuditshëm”, duke e lidhur me aktgjykimin e Gjykatës Supreme për ministrin në detyrë Hekuran Murati dhe duke akuzuar disa gjyqtarë për servilizëm ndaj ndikimeve të huaja.

Sipas tij, ky qëndrim i BE-së përbën ndërhyrje në punët e brendshme të një shteti demokratik dhe cenon procesin e zhvillimit të Kosovës.

“Njoftimi i zyrtarëve të Bashkimit Evropian se nuk do të zhvillojnë takime brenda ndërtesës së Qeverisë së Kosovës derisa të krijohet një ekzekutiv me mandat të plotë është i padrejtë dhe i çuditshëm.

Arsyeja për këtë është vendimi po aq i padrejtë i Gjykatës Supreme të Kosovës se ministri në detyrë Hekuran Murati “po i mbajka dy poste”. Pas disa vendimeve të paqarta dhe të njëanshme, është bërë e dukshme se shumica e gjyqtarëve të kësaj Gjykate dhe të Gjykatës Kushtetuese vuajnë nga përkatësia dhe servilizmi ndaj të huajve.

Ky është një standard i zbuluar së fundmi nga disa politikanë evropianë pro-serbë që nuk kanë ndërmend më të mirën për Kosovën. Në realitet, kjo është ndërhyrje në punët e brendshme të një shteti demokratik, i cili është në proces zhvillimi dhe po përballet me situata të ndryshme të krijuara nga boshllëqet gjatë hartimit të kushtetutës së Kosovës, për të cilat edhe ata vetë janë fajtorë”, thotë ai.

Aliçkaj ka deklaruar se presioni mbi qeverinë në detyrë të Albin Kurtit dhe bllokada e krijimit të institucioneve nuk janë të shkaktuara nga fituesi i zgjedhjeve, por nga partitë humbëse që synojnë të marrin pushtetin në mënyrë të paligjshme dhe të krijojnë një qeveri të kontrolluar nga jashtë.

“Qëllimi i tyre është të ushtrojnë presion mbi fituesin e zgjedhjeve, qeverinë në detyrë të kryeministrit Albin Kurti, që të bëjë lëshime ndaj partive humbëse të zgjedhjeve PDK, LDK dhe AAK/NISMA, deri në mundësinë e formimit të një koalicioni me “Listën Serbe” për të instaluar një qeveri kukull të dirigjuar nga Evropa dhe të kontrolluar nga Serbia.

Nëse kërkesa e tyre do të ishte e sinqertë, ata do të bënin të njëjtën gjë, të paktën simbolikisht, ndaj partive humbëse të zgjedhjeve duke bojkotuar edhe zyrat e tyre. Ata e dinë, por për interesat e tyre, nuk duan ta pranojnë se bllokada e krijimit të institucioneve nuk është krijuar nga fituesi i zgjedhjeve, por nga humbësit që synojnë të marrin pushtetin në mënyrë të paligjshme”, shprehet më tej Aliçkaj për gazetën.

Në fund, veprimtari potencoi se politikanët evropianë po përpiqen t’i bëjnë lëshime Serbisë në Kosovë, ndërsa kërkesa kryesore e Vuçiçit është largimi i kryeministrit Albin Kurti dhe koalicionit të tij.

Aliçkaj thekson se mbështetja e popullit për Kurtin, Vjosën dhe Glauk Konjufcën është kyçe për mbijetesën e Republikës së Kosovës dhe se orientimi proamerikan mbetet rruga drejt shpëtimit.

“Të frikësuar nga trazirat në Beograd dhe mundësia që Serbia të bjerë plotësisht në duart e Rusisë, politikanët pa parime evropiane po përpiqen ta qetësojnë Serbinë duke i bërë lëshime shtesë në Kosovë. Planet e tyre për të shpërblyer Serbinë në kurriz të Kosovës janë penguar nga qeveria shtetndërtuese e zotit Kurti. Disa javë më parë, presidenti autokratik i Serbisë, shovinisti Vuçiç, i quajti ata “bastardë” dhe i akuzoi se nuk e mbajtën premtimin e tyre për t’i dhënë Serbisë kontrollin mbi veriun e Kosovës.

Kërkesa kryesore e vendosur e regjimit serb të Vuçiçit nga Evropa, ka qenë dhe është eliminimi nga jeta politike e Kosovës i kryeministrit Albin Kurti dhe koalicionit të tij LVV, Guxo dhe Alternativa.

Populli i Kosovës i kupton shumë mirë padrejtësitë evropiane që nuk kanë ndryshuar që nga largimi i pushtuesit turk nga tokat shqiptare. Mbështetja e popullit shumicë të Kosovës për vazhdimin e qeverisjes së fortë, të udhëheqësve të aftë dhe të palëkundur, Presidentes Vjosa Osmani, Kryeministrit Albin Kurti dhe Kryetarit të Parlamentit Glauk Konjufca është jetike për ekzistencën e Republikës së Kosovës. Orientimi i tyre proamerikan është e vetmja rrugë drejt shpëtimit” – përfundon ai për “Bota sot”.

Mehmeti: Vetë opozita akuzon pozitën, nuk punon në formimin e kuvendit, ndërsa akuzon dhe vetëm akuzon

Kurse, sipas opinionsti Gani Mehmeti, përçarja mes shqiptarëve, brenda partive dhe si individë, ka dobësuar Kosovën dhe ka lënë vendin pa rol faktor në Ballkan.

ImageGani MehmetiFoto galeri
Ai thekson se Serbia mbetet fuqia dominante në rajon, e mbështetur edhe nga Rusia, ndërsa shqiptarët nuk arrijnë të bashkohen as për mbrojtjen e interesave kombëtare dhe formimin e institucioneve.

“Njerëzit vlerësojnë e çmojnë të tjerët krejt sipas paraqitjes, kujdesit e bashkëpunimit ndërvete, si mes njerëzve ashtu rdhe mes partive.

Ndodhi që ne shqiptarët, në vend se të bashkohemi, po përçahemi e po ndahemi dita-ditës edhe më shumë.

Të tjerët kanë parë e vërejtur përçarjet tona dhe më nuk jemi faktor në Ilirik. Shih për këtë nuk shihet dhe nuk jemi si popull faktor as në Ballkan, prandaj secili që çohet më përpara mund të na shkeli.

Serbia, e tëra e vendosur në tokat tona shqiptare është bërë faktore, sepse ka popullin, ka armatimin dhe ia kanë frikën edhe disa nga fuqitë e mëdha. Serbia ka me veti Rusinë, e cila nis e dos i ka ndenjur pranë dhe e ka ndihmuar Serbinë edhe prej kur ende nuk ishte shtet.

Ne shqiptarët jemi, me sa po shihet, të përçarë në parti dhe si individë mes vetit.

Neve askush nuk na e ka frikën, prandaj për çka të bisedohet me ne. Ne secili jemi më i “fortë e më kombëtar” se tjetri dhe i kemi punët kështu si janë.

Ne nuk jemi të bashkuar edhe kur shteti është në rrezik.

Ne dimë vetëm të akuzojmë njëri-tjetrin, prandaj edhe pas gjashtë muajsh nuk jemi të zotë të formojmë kuvendin! Jo, se ne kemi inatet njëri kundër tjetrit e nuk mbajmë inatin me armikun që na pati vrarë, prerë, masakruar…”, shprehet ai.

Krahas kësaj, ai vlerëson se opozita e Kosovës akuzon qeverinë në detyrë për funksionimin e saj, por vetë po pengon formimin e Kuvendit dhe zgjat jetën e kryeministrit Albin Kurti në detyrë.

Ai shton se përçarja mes partive shqiptare dhe mosbashkimi i tyre e dobësojnë vendin, dhe se para se të qortojmë BE-në, shqiptarët duhet të reflektojnë për vetveten dhe partitë e tyre.

“Vetë opozita akuzon pozitën, nuk punon në formimin e kuvendit, ndërsa akuzon dhe vetëm akuzon.

Kryeministri në detyrë, siç po e quajnë, vërtet i ka kompetencat e zvogëluara dhe nuk duhet parë për të madhe BE-së pse nuk do të shkohet me të në zyre, kur vetë partitë opozitare për çdo ditë e akuzojnë për funksionimin e tij si kryeministër, që vetë ato parti janë duke ia zgjatur jetën si kryeministër me mosformimin e kuvendit.

Në anën tjetër, Shqipëria me Edi Ramën në krye, më e afërt është me Vuçiqin e Serbinë sesa me Kurtin e Kosovën, e cila e ka për detyrë të interesohet për çdo shqiptar brenda e jashtë Shqipërisë.

Pra, jemi të përçarë dhe tepër ka ndihmuar Amerika në konstituimin e organeve shtetërore të Kosovës, kur këto partitë tona brenda saj vazhdimisht punojnë kundër njëra-tjetrës.

Më parë se të qortojmë e ankohemi në BE, duhet ta qortojmë veten edhe si shqiptarë edhe së parti politike”, përmbylli ai për “Bota sot”.