Pamjet përgënjeshtrojnë Izraelin për vrasjen e mjekëve në Gazë

Incizimi është gjetur në telefonin e një mjeku të vrarë pasi trupi i tij u nxor nga një varr një javë pas incidentit. Trupat e tetë mjekëve, gjashtë punëtorë të Mbrojtjes Civile të Gazës dhe një punëtor i OKB-së janë gjetur të varrosur në rërë. Edhe automjetet ishin futur nën dhe. U është dashur organizatave ndërkombëtare disa ditë për të negociuar qasje të sigurt në atë vend
Disa pamje të incizuara me telefonin e një mjeku, e që janë bërë publike së fundmi, kanë shpërfaqur të kundërtën e pretendimit të Izraelit për arsyet e vrasjes së 15 zyrtarëve shëndetësorë në një sulm më 23 mars.

Videoja e publikuar nga Shoqëria e Gjysmëhënës së Kuqe në Palestinë (PRCS) shfaq autoambulancat dhe një kamion të zjarrfikësve tek lëvizin në errësirë me drita të emergjencës të aktivizuara – para se të sulmoheshin. PRCS-ja ka thënë se videoja është marrë nga telefoni i njërit prej mjekëve të vrarë.

Forcat e Mbrojtjes së Izraelit(IDF) në fillim kanë mohuar se automjetet kishin të aktivizuara dritat apo sinjale të emergjencës. Por pas publikimit të videos, IDF-ja ka deklaruar se “të gjitha pretendimet, duke përfshirë dokumentimin që po qarkullon rreth incidentit, do të ekzaminohen tërësisht dhe thellësisht për të kuptuar sekuencat e ngjarjeve dhe trajtimit të situatës”.

Një mjek i mbijetuar kishte deklaruar se ambulancat kanë pasur shenja të qarta dhe kanë pasur të aktivizuara dritat e brendshme dhe të jashtme.

Videoja e fundit, për të cilën PRCS-ja thotë se është shfaqur edhe në Këshillin e Sigurimit në Organizatën e Kombeve të Bashkuara, tregon automjetet tek ndalen në qosh të rrugës, me drita të aktivizuara, dhe të paktën dy punëtorët të urgjencës që po dilnin jashtë me veshje reflektuese.

Xhami i përparmë i automjetit nga ku po filmohej është i thyer dhe mund të dëgjohen të shtëna me armë që zgjasin disa minuta teksa personi që po incizonte lutet. Ai është njëri nga mjekët e vdekur.

Incizimi është gjetur në telefonin e tij pasi trupi iu nxor nga një varr një javë pas rastit. Trupat e tetë mjekëve, gjashtë punëtorë të Mbrojtjes Civile të Gazës dhe një punëtor i OKB-së janë gjetur të varrosur në rërë. Edhe automjetet ishin futur nën dhe. Iu është dashur organizatave ndërkombëtare disa ditë për të negociuar qasje të sigurt në atë vend.

Izraeli ka pretenduar se një numër i militantëve të Hamasit dhe Xhihadit Islamik janë vrarë në incident, por nuk ka ofruar asnjë provë apo shpjegim të rrezikut ndaj ushtarakëve të vet.

Ministri i Jashtëm i Izraelit, Giedon Saar, gjatë javës ka përsëritur qëndrimin e ushtrisë, duke thënë se “IDF-ja nuk ka sulmuar pa arsye”.

IDF-ja ka premtuar se do të hetojë rrethanat pasi një mjek i mbijetuar ka vënë në pikëpyetje pretendimin e tyre.

“Gjatë ditës dhe natës është e njëjta gjë. Dritat e brendshme dhe të jashtme janë të aktivizuara. Krejt kjo ta sqaron se ai automjet ambulance i përket Gjysmëhënës së Kuqe palestineze. Të gjitha dritat kanë qenë të aktivizuara kur automjeti u sulmua”, ka deklaruar në një intervistë mjeku Munther Abed.

Ai po ashtu ka mohuar se ai apo ekipi i tij kishin lidhje me militantët.

“Të gjitha ekuipazhet janë civilë. Ne nuk i përkasim asnjë grupi militant. Detyra jonë kryesore është të ofrojmë shërbime të ambulancës dhe të shpëtojmë jetët e njerëzve. Jo më shumë, jo më pak”, ka shtuar ai.

Gjatë fjalimit të një dite më parë në OKB, presidenti i PRCS-së, Younis Al-Khatib, duke iu referuar videoincizimit ka thënë: “Dëgjova zërin e njëri nga anëtarët e grupit që është vrarë. Fjalët e tij të fundit para se të goditej ishin… ‘më fal nënë, vetëm doja të ndihmoja njerëz. Doja të shpëtoja jetë’. Është zemërthyese”.

Ai bëri thirrje për llogaridhënie dhe hetim të pavarur dhe në tërësi të asaj që ai e quajti “krim mizor”.

Akoma nuk dihet për një mjek që ndodhej në incidentin e 23 marsit.