Flamuj ukrainas e pankarta “Liri Palestinës” – shpërthejnë protesta masive në të gjithë SHBA-në kundër Trumpit

Mijëra protestues u mblodhën në Uashington dhe anembanë SHBA-së, pjesë e rreth 1200 demonstratave që pritej të përbënin ditën më të madhe të protestës kundër presidentit Donald Trump dhe aleatit të tij miliarder Elon Musk që kur ata filluan një përpjekje të shpejtë për të zgjeruar autoritetin presidencial.

Bëhet e ditur se rreth 150 grupe aktiviste ishin regjistruar për të marrë pjesë.

Dhe protestat ishin planifikuar në të 50 shtetet plus Kanada dhe Meksikë, shkruan Reuters, përcjell Telegrafi.

Turmë e madhe u mblodh pranë skenës poshtë Monumentit të Uashingtonit për të protestuar ndaj politikave të Trumpit për “gjithçka nga imigrimi te DOGE deri te tarifat”.

Turma rreth memorialit vazhdoi të rritej gjatë gjithë ditës.

Disa valëvitën flamuj ukrainas dhe të tjerë mbanin shalle palestineze dhe shenja “Liri për Palestinën”.

Ndryshe, Trump, i cili tronditi tregjet financiare dhe shqetësoi kombet në mbarë botën me një sërë tarifash tregtare këtë javë, e kaloi ditën në Florida, duke luajtur golf në klubin e tij, përpara se të kthehej në Mar-a-Lago pasdite.