A mund të formohet komuna boshnjake? – Ja çfarë thonë njohësit e fushës

Kërkesa e Kryetares së Unionit Socialdemokrat (SDU), Duda Balje për krijimin e një komune boshnjake, ndonëse po vlerësohet e drejt dhe ligjore, po shihet vështirë e realizueshme.

Njohësit e fushës në emisionin “Këndi i Debatit” kanë vlerësuar se përkundër kërkesave të shumta për krijimin e komunave të reja në Kosovë, janë disa standarde ligjore ndërkombëtare e vendore që janë vështirë të realizueshme.

Kadri Kryeziu, njohës i së Drejtës ka thënë se kërkesa e Baljes është e drejtë dhe ligjore, por është vështirë e realizueshme.

“Baza ligjore për krijimin e komunave të reja është Ligji për vetëqeverisje lokale dhe ligji për kufijtë administrativ komunal. Si kërkesë është e drejtë, legjitime, por për të krijuar një komunë janë disa standarde. Ato janë me kartën evropiane të vetëqeverisjes lokale dhe me ligjet pozitive tona. Këto standarde janë bukur të rënda, duke filluar nga numri i banorëve, zhvillimi ekonomik, të hyrat vetanake. Kjo mund të krijohet në të ardhmen por ka shumë kërkesa për krijimin e komunave të reja”, ka thënë Kryeziu.

Kryeziu ka thënë se edhe 10 komunat e reja të krijuara janë “komuna politike” dhe se nuk plotësojnë standardet.

Politologia, Arta Tahiri – Beqa ka vlerësuar se nëse krijohet një komunë e tillë, do të hapte rrugë për krijimin e komunave tjera nga komunitetet në vendet ku ata janë me shumicë.

“Kërkesa e Dudaj Baljes, përvec në formën dëshirore, praktikisht dhe ligjërisht sa kam njohuri është e pamundur, sepse kjo përpos aspekti ligjor dhe kushtetues të Republikës së Kosovës, nëse do të bëhej, do të krijonte apetite edhe të komuniteteve të ndryshme dhe secili do të kuronte komunë ku ka shumicë të atij komuniteti”, ka thënë Tahiri – Beqa.

Ndërsa, njohësi i çështjeve politike, Selam Shkodra ka thënë se kërkesa për formimin e komunës së boshnjakëve është që disa dekada sikurse edhe për komuna tjera.

“Nuk është e sotit kërkesa për ta formua komunën boshnjake, ka më shumë se një dekadë e gjysmë. Edhe në të kaluarën ka pas premtime elektorale edhe për formimin e komunave tjera. Përderisa s’kemi diçka të shkruar nuk është diçka të shkruar nuk mendoj që duhet të kemi ndonjë alarm”, ka thënë Shkodra.

Kryetarja e Unionit Socialdemokrat (SDU), Duda Balje pas takimit me Kurtin tha se ia ka prezantuar kushtet e saj në këmbim të votës dhe tha se nuk ka marrë konfirmimin nga Kurti nëse ato do të plotësohen dhe se rrjedhimisht as nuk ka dhënë konfirmim për votimin e qeverisë.