Kurti: Këtë javë çdo qytetar është ndjerë më europian, shteti ynë po bëhet përherë e më i fortë

Kryeministri Albin Kurti e ka hapur mbledhjen e sotme të Qeverisë duke folur për dy lajmet e mira që Kosova i mori ditët e fundit.

Kurti foli për liberalizimin e vizave dhe hapin e parë drejt anëtarësimit në Këshillin e Europës, duke thënë se “këtë javë çdo qytetar i Republikës është ndjerë më europian dhe më afër Europës”.

Ai tha se procesi i liberalizimit të vizave u zhbllokua vitin e kaluar “me shumë punë dhe angazhim” nga Qeveria që ai udhëheq.

“Me shumë punë dhe angazhim, vitin e kaluar arritëm që ta zhbllokojmë këtë proces”, tha Kurti.

“Pasaporta jonë do të jetë më e fuqishme ashtu siç shteti ynë po bëhet përherë e më i fortë”, tha ndër tjerash kryeministri.