Lirohet Naser Pajazitaj, avokati publikon foton
Gjykata Supreme ka liruar nga akuzat Naser Pajazitajn, të akuzuarin për vrasjen e Donjeta Pajazitajt në vitin 2015.
Pas kësaj, i akuzuari për vrasje është liruar nga burgu, këtë e ka bërë të ditur njëri nga avokatët e Naser Pajazitajt, Ahmet Tahiri.
Tahiri në rrjetet e tij sociale ka thënë se Supremja pas 7 vjetësh tha drejtësi përfundimisht.
“Gjykata Supreme ka aprovuar kërkesën tonë si mbrojtje të ligjshmërisë dhe ka liruar nga të gjitha akuzat Naser Pajazitin. Ai mbajti 7 vite burg për një vrasje të cilën nuk e kishte kryer. Tri herë, pa prova, u dënua me burgim të përjetshëm. Sot pas 7 viteve Gjykata Supreme dha drejtësi përfundimisht duke e liruar nga të gjitha akuzat Naser Pajazitin. Jam i lumtur që si mbrojtës/avokat bashke me kolegët Gëzim Kollqaku dhe Imer Beka ndihmuam që sot drejtësia të triumfoj”, ka shkruar Tahiri, duke bashkëngjitur me një foto.
Pas lirimit nga akuza të Naser Pajazitajt, të akuzuarit për vrasjen e Donjeta Pajazitajt, ka reaguar vëllau i viktimës, Shkelqimi.
Ai në një postim në Facebook ka thënë se ky vendim e vërteton edhe njëherë se sa e fëlliqur është drejtësia.
Edhe ministrja e Drejtësisë, Albulena Haxhiu, ka thënë se është i papranueshëm vendimi i Gjykatës Supreme për lirimin e të akuzuarit për vrasjen e Donjeta Pajazitajt.
