Vuçiq: Qëllimi i Prishtinës dhe një pjese të ndërkombëtarëve, dëbimi i serbëve nga Kosova
Presidenti i Serbisë, Aleksandar Vuçiq, ka akuzuar autoritetet në Prishtinë dhe një pjesë të bashkësisë ndërkombëtare se kanë për qëllim dëbimin e serbëve nga veriu i Kosovës sepse, siç tha ai, “kjo është mënyra e vetme për ta për zgjidhjen e problemit të Kosovës”.
Pas bisedës me Patriarkun Porfirije, Vuçiq tha se ndalimi i hyrjes së tij në Kosovë “flet më së miri për ata që e organizuan atë dhe vetëm pjesërisht ishte drejtuar nga Prishtina”.
Ai ka pyetur se pse “dikush insiston kaq histerikisht për heqjen e barrikadave”, e pastaj përgjigjen e ka dhënë vetë: “Sepse serbët duhet të dëbohen nga veriu i Kosovës sepse vetëm kështu mund të zgjidh problemin, po them për shqiptarët dhe një pjesë të komunitetit ndërkombëtar”.
Vuçiq tha gjithashtu se serbët nuk vendosën pa shkas barrikada dhe të jenë jashtë në shi dhe borë, por se protestat i nisën sepse i kanë gënjyer për dhjetë vjet se do të formohet Asociacioni, e drejta e tyre për të, sepse po ju hiqet vota, se po arrestohen njerëz…
Vuçiq shtoi se rrugët e bllokuara nga barrikada nuk i drejtojnë shqiptarët, por vetëm serbët e veriut të Kosovës të cilët, siç tha ai, përkrahin këtë lloj proteste.
Ai tha gjithashtu se bisedimet janë duke vazhduar me të dërguarin special të BE-së për dialog, Miroslav Lajçak, si dhe të dërguarin special të SHBA-së për Ballkanin Perëndimor, Gabriel Escobar.
“Ne po mundohemi dhe po bëjmë çmos për të ruajtur paqen, për të luftuar për paqen, për të arritur një zgjidhje kompromisi”, tha Vuçiq, por shprehu frikën se edhe nëse arrihet një marrëveshje, edhe pse dyshon, do të jetë diçka e re. në 10, 15 ditë.
“Sepse qëllimi i tyre përfundimtar është dëbimi i Serbisë nga Kosova përgjithmonë dhe dëbimi i popullit absolutisht të pabindur serb nga veriu i Kosovës”, tha Vuçiq dhe porositi serbët e Kosovës se shteti është me ta dhe se nuk ka dorëzim./21Media
