Pas konstituimit të Kuvendit, nisin hapat për formimin e Qeverisë së re – zbardhen detaje nga takimi Kurti-Basha

Pas konstituimit të legjislaturës së re të Kuvendit të Kosovës, Kryetari i sapozgjedhur i Kuvendit, Dimal Basha, përmes një njoftimi publik, bëri të ditur se është takuar me Kryeministrin në detyrë, Albin Kurti.

Në këtë takim, përveç vlerësimit të përkushtimit të institucioneve për rrugëtimin e përbashkët drejt zhvillimit dhe drejtësisë shoqërore, është diskutuar edhe për hapat e ardhshëm për formimin e Qeverisë së re dhe rëndësinë e respektimit të procedurave kushtetuese në këtë proces.

“Me Kryeministrin Kurti nënvizuam edhe nevojën për të proceduar drejt votimit të institucioneve të reja që derivojnë nga Kuvendi i Kosovës. Me këtë rast, Kryeministri më njoftoi se, si Kryetar i partisë më të madhe në vend, Kryetarja e Këshillit të Përgjithshëm të Lëvizjes VETËVENDOSJE! si subjekt fitues i zgjedhjeve, znj. Arbërie Nagavci, do ta dërgojë emrin e mandatarit për formimin e Qeverisë tek Presidentja e vendit, sipas procedurës ligjore”, thuhet ndër të tjera në njoftimin e Bashës, përcjell “Bota sot”.

Njoftimi i plotë

Pas përmbylljes së suksesshme të seancës konstituive të Kuvendit, pata kënaqësinë ta mirëpres në takim Kryeministrin e Republikës së Kosovës, z. Albin Kurti.

Kryeministri Kurti kishte sjellë një dhuratë të çmuar, pikturën e titulluar “Pranvera Shqiptare”, punim ky nga Rexhep Selimi, i cili ndonëse po mbahet padrejtësisht në Hagë, është gjithmonë në mesin tonë me veprat e tij madhështore, qoftë në luftë, qoftë me punën e tij në Kuvend, qoftë në pikturë.

Përgjatë bisedës, Kryeministrin e falënderova për përkushtimin e Qeverisë në përmbushjen e synimeve tona të përbashkëta për zhvillim dhe drejtësi shoqërore. Bashkë diskutuam për rëndësinë e koordinimit ndërinstitucional dhe realizimit të agjendës legjislative gjatë kësaj legjislature që sapo e filluam.

Me Kryeministrin Kurti nënvizuam edhe nevojën për të proceduar drejt votimit të institucioneve të reja që derivojnë nga Kuvendi i Kosovës. Me këtë rast, Kryeministri më njoftoi se, si Kryetar i partisë më të madhe në vend, Kryetarja e Këshillit të Përgjithshëm të Lëvizjes VETËVENDOSJE! si subjekt fitues i zgjedhjeve, znj. Arbërie Nagavci, do ta dërgojë emrin e mandatarit për formimin e Qeverisë tek Presidentja e vendit, sipas procedurës ligjore.

Si Kuvend, do të vazhdojmë të punojmë me përgjegjësi të plotë në funksion të përmbushjes së detyrimeve kushtetuese dhe ligjore. Besimi i qytetarëve është udhërrëfyesi ynë kryesor. Në këtë frymë, uroj që kjo legjislaturë të shërbejë me përgjegjësi dhe përkushtim në mbrojtjen e interesave të qytetarëve që përfaqësojmë.