“Mik i AAK-së, jo i gjykatës”, Sallahu: Avokati i Popullit nuk po e dërgon dekretin në Gjykata Kushtetuese

Ish-zëvendësministri i Drejtësisë, Blerim Sallahu, ka reaguar ashpër përmes një postimi në rrjetin social Facebook, duke kritikuar institucionin e Avokati i Popullit i Kosovës për mosveprim në lidhje me një dekret që ai e cilëson si kundërkushtetues.

Në reagimin e tij, Sallahu thotë se Republika e Kosovës nuk ka pasur ndonjëherë një Avokat të Popullit “më politik dhe më jopopullor” se ai aktuali. Sipas tij, megjithëse Kushtetuta i jep këtij institucioni të drejtën që një dekret të dyshuar si kundërkushtetues ta dërgojë për shqyrtim në Gjykata Kushtetuese e Kosovës, kjo gjë ende nuk ka ndodhur.

Sallahu i referohet nenit 113, paragrafi 2.1 të Kushtetuta e Republikës së Kosovës, i cili parashikon mundësinë që Avokati i Popullit t’i drejtohet Gjykatës Kushtetuese për vlerësimin e akteve që dyshohet se bien ndesh me Kushtetutën.

“Si është e mundur që Avokati i Popullit të mos e dërgojë një rast të tillë në Gjykatë Kushtetuese, kur dihet se dekreti cenon stabilitetin shoqëror, ekonomik dhe social të shtetit tonë?”, ka shkruar ai.

Në postimin e tij, Sallahu akuzon institucionin e Avokatit të Popullit se ka dështuar të ushtrojë mandatin kushtetues për mbrojtjen e të drejtave dhe lirive të njeriut nga veprimet ose mosveprimet e autoriteteve publike. Ai pretendon se gjatë pesë viteve të fundit, ky institucion ka mbrojtur vetëm interesat e një grupi të vogël individësh të lidhur me Aleanca për Ardhmërinë e Kosovës.

Postim i plotë:

Republika e Kosovës, “Avokat të Popullit” më politik dhe jopopullor se ky i tanishmi nuk ka pasur ndonjëherë!

Ndonëse, Avokati i Popullit sipas nenit 113 par.2.1, të Kushtetutës ka të drejtë ta dërgojë dekretin kundërkushtetues në Gjykatë Kushtetuese, ende nuk e ka bërë këtë.

Si është e mundur që “Avokati i Popullit” të mos e dërgojë një rast të tillë në Gjykatë Kushtetuese, kur dihet se dekreti haptazi cenon stabilitetin shoqëror, ekonomik dhe social të shtetit tonë?!

Edhe pse është e qartë se “Avokati i Popullit” ka kompetencë kushtetuese me i mbrojtë të drejtat dhe liritë e njeriut nga veprimet apo mosveprimet e paligjshme dhe kundërkushtetuese të autoriteteve publike, ai me vetëdije të plotë e ka shkelur këtë mandat, duke i mbrojtë për pesë vite, vetëm të drejtat e një grushti të individëve të AAK-së.

Në vend që të shfrytëzojë të drejtën ligjore me u bo mik i gjykatës (amicus curiae) në rastin konkret, ai është bërë mik i subjektit politik, AAK.

Përfundimisht ky “Avokat” kurr nuk ka qenë në shërbim të popullit, por veç në shërbim të klaneve dhe interesave të tij!