LIVE: Teherani dridhet nga shpërthimet – Izraeli flet për vrasje të zyrtarëve të lartë iranianë – Telefonatë urgjente Netanyahu–Trump

Axios sapo ka raportuar disa replika të reja nga Donald Trump mbi konfliktin në Iran.

“Mund të shkoj larg dhe ta marr përsipër të gjithë çështjen ose ta përfundoj brenda dy ose tre ditësh”, citohet të ketë thënë presidenti amerikan.

Iranit do t’i duhen disa vite për t’u rikuperuar nga sulmet SHBA-Izrael, thotë Trump.

Ai pretendon se iranianët u afruan përpara se të tërhiqeshin nga bisedimet – duke iu referuar bisedimeve bërthamore që po mbaheshin në Gjenevë – duke shtuar se “e kuptoi nga kjo që ata nuk duan vërtet një marrëveshje”.

Trump thotë se pati një bisedë të shkëlqyer me kryeministrin e Izraelit, Benjamin Netanyahu, dhe të dy ishin “në të njëjtën gjatësi vale”.

Sekretarja e shtypit e Shtëpisë së Bardhë, Karoline Leavitt, ka dhënë më shumë informacion mbi veprimet e Donald Trump pas sulmeve ndaj Iranit.

Presidenti amerikan ka folur me udhëheqësit e Arabisë Saudite, Katarit dhe Emirateve të Bashkuara Arabe, si dhe me sekretarin e përgjithshëm të NATO-s, Mark Rutte, thotë ajo në mediat sociale.

Sot pati raportime për sulme ndaj bazave ushtarake në Bahrein, Katar dhe Emiratet e Bashkuara Arabe, ndërsa Irani u hakmor ndaj sulmeve nga SHBA-ja dhe Izraeli.

Kryeministri i Izraelit, Benjamin Netanyahu, po flet në një konferencë për sulmin ndaj rezidencës së udhëheqësit suprem të Iranit, ajatollah Ali Khamenei.

Ka tregues gjithnjë e më të mëdhenj se “ky diktator” ka “vdekur”, thotë Netanyahu.

Kryeministri izraelit u bëri thirrje qytetarëve të Izraelit t’i ndjekin këshillat e sigurisë nga Komanda e Frontit të Brendshëm të vendit, pas sugjerimit se operacioni kundër Iranit do të vazhdojë “sa të jetë e nevojshme”.

Ai gjithashtu u bëri thirrje iranianëve që “të dalin në rrugë sa më shumë” për ta rrëzuar regjimin

Netanyahu iu drejtua popullit iranian, duke thënë se sulmet do t’u ndihmojnë atyre të “çlirohen nga tirania”.

Ai shtoi se ata e kanë “një mundësi që vjen një herë në një brez” për të rrëzuar regjimin iranian.

“Është koha e duhur që të bashkoheni për një mision historik”, shtoi ai. / REL