Rritet dukshëm edhe çmimi i arit në Kosovë

Si në të gjithë sektorët, edhe në atë të arit ka pasur ngritje të çmimit. Kështu, dukshëm ka rënë edhe interesimi për blerje.

Enver Pakashtica – kryetar i Shoqatës së Artarëve të Kosovës në një intervistë për Indeksonline ka shpalosur më shumë detaje rreth kësaj çështje.

Ai thotë se momentalisht çmimi i arit është rritur në 54 mijë euro për kilogram, nga 47 mijë euro sa ka qenë në vitin 2020.

“Në krahasim me çmimet tjera të produkteve esenciale, çmimi i arit ka lëvizje por është një ngritje e përballueshme. Në mars 2020, në fillimin e pandemisë ka qenë 47 mijë euro një kilogram ari. Kurse sot e ke 54, do të thotë 12-13 % rritje. Po ta krahasojmë me metalet tjera, me hekur, plumb, zink, është ngritje, por ngritje e përballueshme”, thotë ai.

Se a pritet të vazhdojë avazi i rritjes edhe më shumë, Pakashtica njofton se çmimi i arit varet nga lëvizjet në bursën ndërkombëtare.