TË FUNDIT

Rrjeti rus që ndërthur propagandën, rekrutimin e informatorëve dhe sulmet kibernetike ndaj Perëndimit

Një rrjet me lidhje ruse, që ndërthur rekrutimin e informatorëve, mbledhjen e të dhënave sensitive, propagandën dhe sulmet kibernetike ndaj objektivave perëndimore, është identifikuar në një hulumtim të kompanisë së inteligjencës Golden Owl për aktivitetet kundër Spanjës.

Raporti, i titulluar “Moscow’s Shadow Triangle: FSB Veteran, Spanish Fugitive, NoName057(16) – Operations Against Spain” (Trekëndëshi në hije i Moskës: veterani i FSB-së, i arratisuri spanjoll dhe NoName057(16)), përqendrohet në tri figura dhe struktura: Roman Romachev, ish-oficer i kundërzbulimit të Shërbimit Federal të Sigurisë së Rusisë (FSB); Enrique Arias Gil, shtetas spanjoll që jeton në Moskë dhe është në kërkim të autoriteteve spanjolle; si dhe grupi i hakerëve pro-rusë NoName057(16).

Sipas hulumtimit, këto lidhje tregojnë se si strukturat e inteligjencës private, individët e angazhuar në propagandë dhe grupet e hakerëve mund të krijojnë një ekosistem të përbashkët aktivitetesh kundër vendeve perëndimore.

Një nga gjetjet kryesore është lidhja e gjurmuar nga Golden Owl mes Enrique Arias Gil dhe kompanisë ruse R-Techno, të drejtuar nga ish-oficeri i FSB-së, Roman Romachev. Kjo kompani merret me inteligjencë private dhe, sipas raportit, trajnon operatorë, duke i organizuar ata në rrjete që mund të përdoren për mbledhjen e informacioneve dhe operacione të tjera.

Megjithatë, hulumtimi bën një dallim të rëndësishëm: provat e paraqitura mbështesin lidhjet ndërmjet këtyre aktorëve, por nuk dëshmojnë se Romachev e drejton drejtpërdrejt grupin NoName057(16).

Nga Moska, rekruton informatorë dhe bashkëpunëtorë për Rusinë

Në qendër të hulumtimit është Enrique Arias Gil, politolog spanjoll që jeton në Moskë dhe që, sipas autoriteteve spanjolle dhe raportimeve të mediave, është në kërkim ndërkombëtar për lidhjet e dyshuara me aktivitetet e grupit NoName057(16).

Arias Gil administron kanalin në Telegram “Desinformador Ruso”, përmes të cilit, sipas Golden Owl, rekrutohen shtetas spanjollë për tri kategori aktivitetesh: mbledhjen e informacioneve për institucionet dhe personelin e sigurisë, pjesëmarrjen në sulme kibernetike dhe angazhimin në ushtrinë ruse.

Hulumtimi e përshkruan këtë kanal jo thjesht si një hapësirë për shpërndarjen e propagandës pro-ruse, por si një platformë për krijimin e kontakteve dhe mobilizimin e personave që mund të kontribuojnë në aktivitete të ndryshme në interes të Moskës.

Sipas raportimit të platformës verifikuese spanjolle Maldita.es, kanali kishte rreth 14 mijë e 500 abonentë në periudhën e hulumtimit. Ai funksiononte së bashku me një grup diskutimi dhe një bot në Telegram, përmes të cilit përdoruesit mund të dërgonin informacione në mënyrë private.

Golden Owl dokumentoi se, ndërmjet 21 tetorit dhe 3 nëntorit 2026, në kanal ishin publikuar nëntë njoftime për rekrutimin e personave në ushtrinë ruse, tri thirrje për sigurimin e informacioneve konfidenciale për zyrtarët spanjollë dhe një ftesë për pjesëmarrje në sulme kibernetike kundrejt shpërblimeve në kriptovaluta.

Njoftimet për rekrutim ushtarak, sipas hulumtimit, ofronin pagesa deri në 3 mijë dollarë në muaj dhe bonuse prej 25 mijë dollarësh për ata që pranonin të angazhoheshin.

Këto aktivitete, sipas autorëve të raportit, tregojnë përpjekje për të kaluar nga propaganda dhe ndikimi në internet drejt rekrutimit të drejtpërdrejtë të qytetarëve për aktivitete informative, ushtarake dhe kibernetike në interes të Rusisë.

Lidhja me ish-oficerin e kundërzbulimit rus

Një nga elementet më të rëndësishme të raportit është lidhja e gjurmuar ndërmjet Arias Gil dhe kompanisë R-Techno, e cila operon në sektorin e inteligjencës private në Rusi.

Kompania drejtohet nga Roman Romachev, ish-oficer i kundërzbulimit të FSB-së. Sipas Golden Owl, R-Techno ofron trajnime për operatorë të inteligjencës dhe i organizon pjesëmarrësit në rrjete që mund të përdoren për aktivitete të mbledhjes së informacionit.

Raporti e përshkruan këtë model si një strukturë ku trajnimi nuk përfundon me përgatitjen individuale të pjesëmarrësve, por synon krijimin e rrjeteve të bashkëpunimit dhe kontakteve që mund të shfrytëzohen për operacione të mëtejshme.

Arias Gil është një prej figurave që lidh këtë dimension të inteligjencës private ruse me aktivitetet e NoName057(16).

Një tjetër element që Golden Owl e konsideron të rëndësishëm është fakti se grupi i hakerëve e ka përshkruar Arias Gil si “mikun tonë” dhe ka zhvilluar me të një sulm të përbashkët ndaj faqeve të internetit spanjolle.

Megjithatë, raporti nuk pretendon se ka prova që Romachev komandon drejtpërdrejt NoName057(16). Ajo që dokumenton është ekzistenca e lidhjeve ndërmjet individëve dhe strukturave që veprojnë në fusha të ndryshme, por që mund të përforcojnë aktivitetet e njëri-tjetrit.

Grupi që sulmon institucionet perëndimore

NoName057(16) është një grup hakerësh pro-rus që është bërë i njohur për sulmet kibernetike ndaj institucioneve shtetërore, kompanive dhe infrastrukturës digjitale në vendet që mbështesin Ukrainën.

Grupi përdor kryesisht sulme të tipit DDoS (Distributed Denial of Service), të cilat synojnë të mbingarkojnë serverët dhe t’i bëjnë faqet e internetit ose shërbimet online përkohësisht të paarritshme.

Sipas dokumenteve të autoriteteve amerikane dhe evropiane, grupi është aktiv që nga marsi i vitit 2022 dhe organizon operacionet kryesisht përmes kanaleve në Telegram. Ai përdor platformën DDoSia, përmes së cilës rekruton persona që dëshirojnë të marrin pjesë në sulme kibernetike kundër objektivave të konsideruar armiqësorë ndaj interesave ruse.

Në rastin e Spanjës, sipas raportimit të Infodefensa, policia i atribuon këtij grupi të paktën 447 sulme kibernetike që nga viti 2024, të drejtuara kundër institucioneve publike, bankave dhe kompanive të transportit.

Ndër objektivat e përmendur në publikimet e grupit janë edhe institucione shtetërore dhe portale publike spanjolle. Megjithatë, duhet bërë dallimi ndërmjet sulmeve të konfirmuara dhe atyre që vetë grupi vetëm i ka pretenduar.

Në një raport të përbashkët, FBI-ja dhe agjenci të tjera amerikane të sigurisë kibernetike kanë paralajmëruar se NoName057(16) është pjesë e një ekosistemi më të gjerë të grupeve hakeriste pro-ruse, të cilat bashkëpunojnë dhe ndajnë infrastrukturë, teknika dhe objektiva.

Mbledhja e informacioneve për zyrtarët dhe personelin e sigurisë

Përtej sulmeve ndaj faqeve të internetit, raporti i Golden Owl evidenton edhe një dimension tjetër të aktiviteteve: mbledhjen dhe publikimin e të dhënave personale të pjesëtarëve të institucioneve të sigurisë spanjolle.

Sipas hulumtimit, kanali “Desinformador Ruso” ka publikuar informacione për pjesëtarë të ushtrisë, policisë dhe strukturave të inteligjencës, duke përfshirë emra, fotografi dhe të dhëna mbi karrierën e tyre profesionale.

Më 29 tetor 2026, në kanalin e Arias Gil u hap një rubrikë e quajtur “El Purgatorio” (Purgatori), e prezantuar si hapësirë për identifikimin dhe denoncimin e personave që punojnë në institucionet e sigurisë spanjolle.

Publikimi i parë në këtë rubrikë përfshinte të dhëna për një nënoficer aktiv të ushtrisë spanjolle. Fotografia e tij ishte pjesërisht e censuruar, ndërsa administruesit e kanalit pretendonin se informacionet u ishin siguruar nga bashkëpunëtorë të infiltruar.

Golden Owl thekson se nuk ka mundur ta verifikojë në mënyrë të pavarur pretendimin për ekzistencën e këtyre bashkëpunëtorëve të infiltruar.

Hulumtimi përmend gjithashtu publikimin e mëparshëm të një dosjeje prej 499 faqesh, ku përfshiheshin të dhëna për më shumë se 600 pjesëtarë të policisë, Gardës Civile dhe ushtrisë spanjolle.

Kjo praktikë njihet si doxing dhe nënkupton publikimin e paautorizuar të të dhënave personale të individëve. Në rastin e personelit të sigurisë, ajo mund të krijojë rrezik për vetë personat e identifikuar, familjet e tyre dhe operacionet ku ata janë të angazhuar.

Sipas raportit, publikimi i këtyre të dhënave nuk ka vetëm qëllim ekspozimin e individëve, por mund të shërbejë edhe për frikësimin e tyre, krijimin e presionit dhe identifikimin e objektivave të mundshëm për aktivitete të mëtejshme.

Rrjetet e propagandës dhe shpërndarja e narrativave pro-ruse

Një dimension tjetër i identifikuar në hulumtimet e Golden Owl është rrjeti i kanaleve në gjuhën spanjolle që shpërndajnë materiale pro-ruse dhe përmbajtje të prodhuara nga mediat shtetërore ruse apo platforma të tjera të lidhura me Moskën.

Në një hulumtim më të gjerë për kërcënimet hibride ndaj zgjedhjeve spanjolle të vitit 2026, Golden Owl analizoi 21 kanale në Telegram dhe identifikoi 5 mijë e 855 publikime të shpërndara ndërmjet 20 tetorit dhe 5 nëntorit.

Këto publikime kishin grumbulluar gjithsej 14.3 milionë shikime, ndërsa kanalet kishin rreth 493 mijë abonime para eliminimit të llogarive të dyfishta.

Sipas hulumtimit, bërthama e rrjetit pro-rus përfshinte rreth 350 mijë abonime dhe kishte grumbulluar 8.5 milionë shikime gjatë periudhës së analizuar.

Në mesin e kanaleve të identifikuara ishin Liu Sivaya, Guerras y Geopolíticas, Ucraniando, Rybar ES, El Informador Global dhe Espía del Telón.

Lidhjet ndërmjet tyre nuk janë vlerësuar vetëm në bazë të qëndrimeve politike apo përmbajtjes së ngjashme. Golden Owl ka dokumentuar publikime të përcjella drejtpërdrejt nga një kanal në tjetrin, tekste identike të publikuara brenda pak minutash, materiale të përbashkëta promovuese dhe transmetime të koordinuara.

Sipas autorëve të hulumtimit, kjo tregon ekzistencën e një infrastrukture shpërndarjeje që mundëson përhapjen e shpejtë të narrativave dhe rritjen artificiale të dukshmërisë së tyre në hapësirën digjitale.

Të dhënat e vjedhura mund të shfrytëzohen për operacione ndikimi

Raporti i zgjeruar i Golden Owl evidenton edhe rrezikun që paraqesin të dhënat personale të qytetarëve spanjollë, të cilat qarkullojnë në tregjet ilegale në internet.

Pas analizimit të 528 dokumenteve të publikuara në pjesë të rrjetit të errët (dark web), hulumtuesit identifikuan njoftime për shitjen ose rishpërndarjen e më shumë se 13 milionë regjistrimeve të identitetit spanjoll, përfshirë të dhëna nga dokumentet e identifikimit.

Gjithashtu, u identifikuan rreth 113 mijë kombinime të adresave elektronike dhe fjalëkalimeve.

Golden Owl paralajmëron se ekzistenca e këtyre të dhënave në tregjet ilegale nuk do të thotë se të gjitha janë autentike, të përditësuara apo të verifikuara në mënyrë të pavarur. Megjithatë, disponueshmëria e tyre mund të lehtësojë vjedhjen e identitetit, mashtrimet digjitale, ndërhyrjet në llogari dhe krijimin e mesazheve të personalizuara për manipulimin e përdoruesve.

Në periudha zgjedhore, këto të dhëna mund të shfrytëzohen për të synuar grupe të caktuara qytetarësh me përmbajtje manipuluese, për të përhapur informacione të rreme ose për të imituar komunikimet e institucioneve zyrtare.

Kështu, rreziku nuk kufizohet vetëm te sulmet teknike ndaj sistemeve kompjuterike, por përfshin edhe shfrytëzimin e informacionit personal për operacione më të gjera ndikimi.

Sulmet kibernetike si instrument i presionit politik

Sipas Golden Owl, një prej elementeve që i bën këto aktivitete shqetësuese është ndërthurja e disa metodave: rekrutimi i individëve, mbledhja e informacioneve, publikimi i të dhënave personale, propaganda dhe sulmet kibernetike.

Këto aktivitete nuk duhet domosdoshmërisht të jenë pjesë e një operacioni të vetëm ose të drejtohen nga një qendër e vetme komanduese. Megjithatë, ato mund të përforcojnë njëra-tjetrën dhe të shfrytëzohen për të krijuar presion ndaj institucioneve dhe për të dobësuar besimin e qytetarëve.

Një sulm DDoS mund të ndërpresë përkohësisht funksionimin e një faqeje zyrtare, ndërsa publikimi i të dhënave të punonjësve mund të krijojë frikë dhe pasiguri. Në të njëjtën kohë, kanalet propagandistike mund ta paraqesin këtë si dëshmi të paaftësisë së institucioneve për të mbrojtur vendin.

Në këtë kuptim, ndikimi i një operacioni nuk matet vetëm me dëmin teknik të shkaktuar, por edhe me efektin psikologjik dhe politik që synon të prodhojë.

Kosova, një tjetër pikë e ekspozuar ndaj dezinformimit me origjinë nga Serbia dhe Rusia

Rreziku që paraqesin këto aktivitete nuk kufizohet vetëm në Evropën Perëndimore. Në Ballkanin Perëndimor, Kosova mbetet e ekspozuar ndaj operacioneve të manipulimit të informacionit, veçanërisht përmes narrativave që burojnë nga Serbia dhe Rusia dhe që shpërndahen përmes mediave, portaleve dhe platformave të ndryshme digjitale.

Një hulumtim i publikuar më 27 mars 2026 nga BIRN Kosova dhe Internews Kosova, me titull “Mapping Disinformation: Russian and Serbian Narratives in the Media and Social Networks in Kosovo”, dokumenton përmasat e këtij fenomeni dhe mënyrën se si narrativat e tilla depërtojnë në hapësirën informative të Kosovës.

Hulumtuesit analizuan katër media të kontrolluara nga Kremlini, të cilat kishin publikuar 1 mijë e 323 materiale për Kosovën gjatë periudhës shtator 2025 – shkurt 2026. Gjithashtu, u monitoruan 150 platforma online dhe llogari në rrjete sociale në Kosovë, ku u identifikuan më shumë se 20 mijë lidhje të dyshimta. Nga materiali i mbledhur, 2 mijë e 361 artikuj u përzgjodhën për analizë të thelluar.

Sipas raportit, narrativat çorientuese, kryesisht me origjinë ruse dhe serbe, shfrytëzojnë tensionet, nxisin pasiguri dhe synojnë të dobësojnë kohezionin shoqëror. Temat që përsëriten përfshijnë zhvillimet në veri të Kosovës, sigurinë e komunitetit serb, veprimet e institucioneve të Kosovës dhe rolin e aktorëve ndërkombëtarë.

Ky fenomen nuk kufizohet vetëm në përhapjen e lajmeve të rreme. Një pjesë e narrativave ndërtohen përmes paraqitjes së ngjarjeve reale në kontekst të shtrembëruar, përdorimit të pretendimeve të paverifikuara dhe përsëritjes së të njëjtave mesazhe në disa platforma, duke krijuar përshtypjen e një krize më të gjerë sesa ajo që mbështetet nga faktet.

Raportet e platformës verifikuese Hibrid.info kanë dokumentuar më herët edhe narrativa të mediave në gjuhën serbe që e paraqesin Policinë e Kosovës si institucion që terrorizon serbët në veri, si dhe pretendime që e përshkruajnë Kosovën si “shtet të dështuar”. Në disa raste, zhvillimet e sigurisë dhe veprimet e institucioneve të Kosovës janë paraqitur përmes pretendimeve për spastrim etnik apo për përgatitje të konflikteve, pa mbështetje të mjaftueshme faktike.

Kjo e bën Kosovën veçanërisht të ekspozuar ndaj ndikimit informativ, pasi tensionet politike dhe ndëretnike mund të shfrytëzohen për të përforcuar narrativat destabilizuese. Në këtë kontekst, dezinformimi me origjinë nga Serbia nuk duhet trajtuar vetëm si problem mediatik, por edhe si çështje që ndërlidhet me sigurinë dhe stabilitetin rajonal.

Pra, përvoja e Kosovës tregon se kërcënimet hibride nuk kufizohen te sulmet kibernetike apo aktivitetet e drejtpërdrejta të inteligjencës. Dezinformimi mund të shërbejë si instrument presioni politik dhe destabilizimi, duke shfrytëzuar ndarjet ekzistuese shoqërore dhe tensionet ndëretnike.

Raporti më i gjerë i Golden Owl vlerëson se kërcënimet hibride ndaj Spanjës nuk përbëhen nga një strukturë e vetme, por nga një ekosistem aktorësh, kanalesh dhe infrastrukturash digjitale që mund të shfrytëzojnë krizat politike dhe ngjarjet e rëndësishme për të përhapur narrativa destabilizuese.

Leave a Reply

Your email address will not be published. Required fields are marked *