“Kemi kualitet individual shumë të lartë” – Kamberi tregon çfarë duhet të përmirësojë Kosova
Mbrojtësi i Kosovës, Lindrit Kamberi, ka folur pas humbjes 3-0 nga Republika e Irlandës, duke theksuar se “Dardanët” kanë potencial të madh individual, por duhet të përmirësojnë lojën kolektive për të arritur objektiva më të mëdha.
Kamberi vlerësoi cilësinë që ka skuadra në përbërjen e saj, por theksoi se futbollistët duhet të njihen edhe më mirë mes vete dhe të krijojnë një grup më të bashkuar në fushë.
“Kosova ka kualitet individual shumë të lartë. Nëse punojmë edhe më shumë si ekip, të njihemi me njëri-tjetrin, mund të arrijmë shumë më tepër. Vitin tjetër mund të bëhemi edhe më shumë ekip kolektiv dhe të arrijmë gjëra më të mëdha”, deklaroi Kamberi.
Kosova e mbylli fazën e grupeve në Ligën B të Ligës së Kombeve me humbjen 3-0 në udhëtim ndaj Irlandës dhe 6 pikë në total, në vendin e tretë.
Kjo disfatë bëri që “Dardanët” të mbeteshin pa mundësinë për të siguruar play-offin për promovim në Ligën A. /Telegrafi/
