Tri skuadra duan ta transferojnë Edon Zhegrovën, largimi nga Juventusi mund të ndodhë në janar

E ardhmja e Edon Zhegrovës te Juventusi po bëhet gjithnjë e më e paqartë, pasi futbollisti kosovar vazhdon të ketë pak hapësirë në skuadrën italiane.

Në prag të afatit kalimtar të janarit, tri klube raportohet se kanë shprehur interesim për ta transferuar atë.

Sipas raportimeve të mediumit italian “TMW”, në mesin e klubeve të interesuara janë Al-Ittihad nga Arabia Saudite, Monaco nga Franca dhe Besiktas nga Turqia.

Al-Ittihad thuhet se kishte shfaqur interesim për Zhegrovën edhe në fund të afatit kalimtar të verës dhe tashmë është rikthyer në garë, veçanërisht pas lëndimit të anësorit Roger Fernandes.

Ndërkohë, edhe Monaco dhe Besiktas po e përcjellin situatën e futbollistit kosovar, i cili nuk ka arritur të sigurojë një vend në formacionin titullar të Juventusit.

Zhegrova iu bashkua klubit italian në verën e vitit 2025, në një marrëveshje prej 15 milionë eurosh, plus bonuse. Megjithatë, problemet fizike dhe konkurrenca në skuadër kanë bërë që ai të ketë minutazh të kufizuar.