Forcat qeveritare të Jemenit tërhiqen nga zona pranë ngushticës Bab el-Mandeb

Forcat qeveritare të Jemenit kanë njoftuar të dielën tërheqjen nga zona pranë ngushticës Bab el-Mandeb, me qëllim përqendrimin në mbrojtjen e bazës së tyre kryesore në Aden.

Ky zhvillim përbën një goditje për fushatën e mbështetur nga Arabia Saudite kundër rebelëve Houthi, të cilët mbështeten nga Irani, transmeton Telegrafi.

Njoftimi sinjalizon përfundimin e mundshëm të kundërofensivës gjashtëjavore të qeverisë, e cila synonte rimarrjen e bregdetit pranë hyrjes së Detit të Kuq. Kjo zonë ishte marrë nën kontroll nga Houthit në shtator, gjatë një avancimi të shpejtë që ndikoi në eksportet e naftës.

Tërheqja e forcave qeveritare mund të hapë rrugën për përparime të reja të Houthive drejt Adenit, ndërsa nxjerr në pah vështirësitë me të cilat po përballet Arabia Saudite në përpjekjet për të ndalur sulmet me dronë dhe raketa ndaj territorit të saj.

Forcat qeveritare janë vendosur në Aden, në bregdetin jugor të Jemenit, që nga viti 2015, kur Houthit morën kontrollin e kryeqytetit Sanaa.

Përparimet e Houthive në Jemen, si dhe sulmet e tyre ndaj Arabisë Saudite dhe anijeve në Detin e Kuq gjatë muajve të fundit, kanë forcuar pozicionin e Iranit në konfliktin më të gjerë në Lindjen e Mesme, të nisur nga Shtetet e Bashkuara dhe Izraeli në shkurt.

“Forcat e Armatosura Jugore njoftojnë zbatimin e një operacioni për ripozicionimin e trupave nga aeroporti Dhubab dhe zona e Bab el-Mandebit, në perëndim të provincës Taiz”, thuhet në deklaratën e forcës kryesore ushtarake që lufton në mbështetje të qeverisë jemenase në jug të vendit.

“Ky hap ndërmerret duke pasur si përparësi sigurinë e kryeqytetit Aden dhe provincave fqinje, si dhe forcimin e vijave të frontit dhe përballjen me kërcënimet ekzistuese”, thuhet më tej në deklaratë.

Deri më tani, Houthit dhe Arabia Saudite, aleati kryesor ndërkombëtar i qeverisë jemenase, nuk kanë reaguar ndaj njoftimit për tërheqjen. /Telegrafi/