Rama: I dyshuari për tjetërsimin e pronave nuk është punonjës i Komunës së Prishtinës

Kryetari i Prishtinës, Përparim Rama, ka reaguar lidhur me arrestimin e një personi të dyshuar për falsifikim dokumentesh dhe keqpërdorim të detyrës zyrtare, në një rast që lidhet me regjistrimin e tri pronave komunale në emër të një personi tjetër.

Rama ka sqaruar se personi i arrestuar nuk është punonjës i Komunës së Prishtinës, por punonjës i Arkivit Ndërkomunal, institucion që funksionon në kuadër të Agjencisë Shtetërore të Arkivave të Kosovës dhe është në varësi të Ministrisë së Kulturës.

“Për sqarim, zyrtari i dyshuar për përfshirje në tjetërsimin e pronave në Prishtinë është punonjës i Arkivit Ndërkomunal, institucion që funksionon në kuadër të Agjencisë Shtetërore të Arkivave të Kosovës, në varësi të MINISTRISË SË KULTURËS!”, ka shkruar Rama.

Ai ka thënë se raportimet që e paraqesin të dyshuarin si punonjës të Komunës së Prishtinës janë të pasakta.

“Prandaj, raportimet që e paraqesin atë si punonjës të Komunës së Prishtinës janë të pasakta!”, ka theksuar Rama.

Në raportin 24-orësh të Policisë së Kosovës, një person ishte arrestuar më 11 nëntor nën dyshimin për falsifikim të dokumenteve dhe keqpërdorim të detyrës apo autoritetit zyrtar.

Sipas Policisë, i dyshuari dyshohet se kishte vërtetuar dokumente të dyshuara, përmes të cilave një person tjetër kishte arritur të regjistronte tri prona komunale në emrin e tij.

Pas intervistimit, me vendim të prokurorit, ai ishte dërguar në mbajtje. / Telegrafi /