Mac Allister, Wirtz dhe Isak vendosin për Liverpoolin ndaj Crystal Palace

Liverpooli ka marrë një fitore të rëndësishme 3-1 në udhëtim ndaj Crystal Palace, në ndeshjen e javës së 10-të të Ligës Premier.

“Reds” e nisën takimin në mënyrë perfekte dhe kaluan në epërsi në minutën e 40-të. Dominik Szoboszlai harkoi nga goditja e lirë, ndërsa Alexis Mac Allister kërceu lart dhe me kokë e dërgoi topin në rrjetë për 0-1.

Crystal Palace pati mundësi të mira për të shënuar. Yeremy Pino goditi traversën në minutën e 18-të, ndërsa në minutën e 33-të Jorgen Larsen realizoi, por goli u anulua pas ndërhyrjes së VAR-it për pozicion jashtë loje.

Liverpooli e nisi pjesën e dytë me synimin për të siguruar fitoren dhe këtë e arriti në minutën e 54-të. Bradley Barcola asistoi për Florian Wirtz, i cili nga brenda zonës shënoi me një goditje të saktë në këndin e poshtëm të majtë për 0-2.

Crystal Palace tentoi të rikthehej në lojë, por Alisson ishte në nivel të lartë, duke ndalur goditjen e Yeremy Pinos në minutën e 77-të.

Fitoren e Liverpoolit e vulosi Alexander Isak në minutën e 89-të, kur goditja e tij nga brenda zonës u devijua dhe përfundoi në rrjetë për 0-3.

Megjithatë, Crystal Palace arriti të shënonte golin e nderit në minutën e 90+5-të. Milos Kerkez shkaktoi penallti, ndërsa Eddie Nketiah u tregua i saktë nga pika e bardhë, duke vendosur rezultatin përfundimtar 1-3.

Me këtë fitore, Liverpooli ngjitet në vendin e katërt me 18 pikë, ndërsa Crystal Palace mbetet në fund të tabelës me vetëm shtatë pikë. /Telegrafi/