Goli i Zabarnyit i siguron PSG-së tri pikë ndaj Troyesit

Paris Saint-Germaini ka shënuar fitore ndaj Troyes me rezultat 1-0, në një ndeshje ku golin e vetëm e realizoi mbrojtësi ukrainas, Ilya Zabarnyi.

Kampionët francezë e nisën mirë takimin dhe krijuan disa raste të rrezikshme që në minutat e para, por portieri i Troyes, Hillel Konaté, u tregua në formë të shkëlqyer, duke ndalur disa goditje të Senny Mayulus dhe Ferran Torresit.

Megjithatë, në minutën e 39-të, PSG arriti të zhbllokonte rezultatin. Pas një harkimi të Senny Mayulus, Zabarnyi u gjend mirë brenda zonës dhe me një goditje me kokë dërgoi topin në rrjetë për 1-0.

Ferran Torres pati disa mundësi të mira për ta dyfishuar epërsinë para përfundimit të pjesës së parë, por Konaté vazhdoi me pritjet e tij, duke mos lejuar që rezultati të ndryshonte.

Edhe në pjesën e dytë, PSG kërkoi golin e sigurisë, ndërsa Ferran Torres, Ëarren Zaire-Emery dhe bashkëlojtarët e tyre patën mundësi për të shënuar, por pa sukses.

Troyes arriti të dërgonte topin në rrjetë në minutën e 83-të përmes Lucas Maronnier, por goli u anulua për pozicion jashtë loje.

Në minutat e mbetura, PSG ruajti epërsinë minimale dhe në fund siguroi tri pikë të rëndësishme.

Me këtë fitore, Paris Saint-Germaini shkon në kuotën e 23 pikëve, duke vazhduar garën për kreun e kampionatit francez./ Telegrafi /