BDI për konkursin në Akademinë Ushtarake: Përfaqësimi i shqiptarëve është cenuar! Shabani: Këtë realitet e kemi trashëguar nga ju

BDI ka reaguar lidhur me konkursin e fundit në Ministrinë e Mbrojtjes, duke kritikuar përfaqësimin e shqiptarëve dhe duke ia atribuuar përgjegjësinë për situatën pushtetit aktual duke theksuar se në vitin 2012, nga gjithsej 25 kadetë të pranuar, 12 ishin shqiptarë, 12 maqedonas dhe një boshnjak.

Partia kundërshton edhe arsyetimin e Ministrisë së Mbrojtjes se kandidati shqiptar është renditur në vendin e 43-të në listën e rangimit që sipas tyre, Ministria është dashur ta pranonte kandidatin në fjalë, në respektim të frymës dhe parimeve të Marrëveshjes së Ohrit dhe përfaqësimit të drejtë e adekuat.

Ndërkohë, zëvendësministri i Mbrojtjes, Admir Shabani, ka reaguar ndaj kritikave të BDI-së lidhur me përfaqësimin e shqiptarëve në Akademinë Ushtarake, duke akuzuar këtë parti se po krijon përshtypje të rreme për diskriminimin e shqiptarëve.

Shabani thekson se gjatë periudhës kur Talat Xhaferi ishte në pozita drejtuese në Ministrinë e Mbrojtjes, Akademia Ushtarake ishte nën moratorium, ndërsa në vitet e mëvonshme aplikonin vetëm një ose dy kadetë shqiptarë në vit.

Ai pranon se rënia e numrit të kandidatëve shqiptarë është shqetësuese, por thotë se zgjidhja kërkon qasje sistematike dhe orientimin e të rinjve drejt karrierës ushtarake që nga shkolla e mesme.

Në fund, Shabani i bën thirrje BDI-së të ndalojë, siç shprehet ai, manipulimet dhe pretendimet se shqiptarët po diskriminohen në Akademinë Ushtarake.