Kos takon fituesit e zgjedhjeve në Serbi: “Mundësi për një fillim të ri”

Komisionerja Evropiane për Zgjerim, Marta Kos, ka takuar në Bruksel katër përfaqësues të Listës Studentore. Kjo lëvizje fitoi zgjedhjet e fundit parlamentare në Serbi dhe i dha fund sundimit 14-vjeçar të SNS-së.

Para Komisionit për Punë të Jashtme të Parlamentit Evropian, Kos tha se Serbia ka “një mundësi për një fillim të ri”. Ajo shtoi se BE-ja është e gatshme ta ndihmojë qeverinë e ardhshme me reforma kundër korrupsionit, për pavarësinë e gjyqësorit, lirinë e medieve, marrëdhëniet e mira fqinjësore dhe përafrimin me politikën e jashtme të BE-së. Sipas raportimeve, bisedimet u përqendruan në çështjet e brendshme. Kosova nuk u përmend.

Qëndrimet e para të Listës Studentore për Kosovën nuk sinjalizojnë ndryshim. Dejan Shoshkiq, ish-guvernator i Bankës Kombëtare të Serbisë, përmendet si kandidat i mundshëm për kryeministër. Në një intervistë për mediumin kroat Index, ai tha se ndërrimi i pushtetit në Beograd nuk e ndryshon qëndrimin se Kosova është pjesë e Serbisë. Si bazë përmendi Kushtetutën e Serbisë dhe Rezolutën 1244. Formimi i qeverisë së re po vonohet për shkak të parregullsive në disa vendvotime, të cilat kanë shtyrë finalizimin e rezultateve. Sipas Shoshkiqit, zgjedhjet presidenciale priten deri në fund të dhjetorit.

Për Prishtinën, sfida është që normalizimi i marrëdhënieve me Kosovën të jetë pjesë e kushteve të BE-së për Beogradin që në fillim, jo një çështje që shtyhet për më vonë.