Humbjet ruse në luftën në Ukrainë mund të arrijnë deri në 2.1 milionë ushtarë të vrarë dhe të plagosur

Humbjet e ushtrisë ruse që nga fillimi i pushtimit në shkallë të plotë të Ukrainës mund të kenë arritur në 1.4 deri në 2.1 milionë ushtarë të vrarë dhe të plagosur.

Prej tyre, numri i të vdekurve vlerësohet të jetë nga 374 mijë deri në 770 mijë, sipas një studimi të ri të publikuar nga revista “The Economist” më 30 tetor, transmeton Telegrafi.

Vlerësimi për numrin e ushtarëve rusë të vrarë është rritur ndjeshëm krahasuar me përllogaritjet e mëparshme të publikuara nga revista. Në maj të vitit 2026, “The Economist” vlerësonte se numri i të vdekurve ishte nga 280 mijë deri në 518 mijë, ndërsa humbjet e përgjithshme arrinin në 1.1 deri në 1.5 milionë ushtarë.

Në korrik të vitit 2025, vlerësimet ishin edhe më të ulëta: nga 190 mijë deri në 350 mijë të vrarë dhe nga 900 mijë deri në 1.3 milionë të vrarë e të plagosur.

Për krahasim, faqja UALosses, e cila dokumenton humbjet ushtarake të Ukrainës, raporton rreth 116 mijë ushtarë ukrainas të vrarë dhe 106 mijë të tjerë të zhdukur.

Studimi i “The Economist” evidenton gjithashtu intensifikimin e luftimeve në distanca të largëta. Gjatë tre muajve të fundit, forcat ukrainase kanë përparuar në një territor prej 73 kilometrash katrorë, duke kompensuar rreth gjysmën e fitimeve territoriale që Rusia ka realizuar gjatë këtij viti.

Sipas organizatës ACLED, në periudhën deri më 23 tetor, Rusia kishte sulmuar 290 objekte të infrastrukturës civile në Ukrainë. Nga këto sulme, të paktën 62 civilë humbën jetën.

Publikimi vëren gjithashtu se Rusia ka shtuar sulmet në distanca të largëta ndaj Ukrainës. Numri i tyre është rritur nga 130 në qershor në 453 në shtator.

Gjatë së njëjtës periudhë, Ukraina kreu mesatarisht rreth 140 sulme në distanca të largëta çdo muaj, duke goditur objektiva në territorin rus. /Telegrafi/