VIDEO/Dosja e krimeve të Arkanit, publikohen dokumente për masakrat në Bosnjë dhe Kosovë

Për herë të parë në Serbi janë grumbulluar prova për krimet e kryera nga njësitet paramilitare në Ish-Jugosllavi. Dosja e krimeve përfshin aktivitetin e një prej figurave më të angazhuara në krimin e organizuar në Serbi.

Bëhet fjalë për Zeljko Raznatoviç Arkan, i njohur si autori i masakrave në Bosnjë, Kroaci dhe në Kosovë, përcjell Euronews.al.

Arkani njihet si drejtoi i Gardës Vullnetare Serbe, por njëherazi ishte dhe një nga drejtuesit e krimit të organizuar në ato vite në serbi. Me mbështetjen e Milosheviç ai arriti të organizojë reparte speciale të njohur me emrin “Tigrat” të cilët kryen krime në disa shtete. Është e provuar qartë se bandat e tij morën pjesë në gjenocidin e Srebrenidës, si dhe patën rol aktiv në masakrat mbi popullsinë civile në Kosovë.

Për herë të parë në Serbi, për krimet e paramilitarëve të Arkanit po flitet hapur dhe studiuesja Jovana Kolaviç ka prezantuar një dosje me shumicën e krimeve ku janë përfshirë forcat serbe.

Sipas studimit të Kolaviç, njësitë e Arkanit kishin rreth 4 mijë pjesëtarë, por deri më sot asnjë prej tyre nuk është dënuar për krimet. Qendra e rekrutimit të ushtarëve ishte në një nga rrugët kryesore të Beogradit. Pjesë e paramilitarëve u bënë njerëz që kishin problem me ligjin dhe ish-të dënuar për krime të rënda.

Studimi tregon se njësitë paramilitare u pajisën me armë dhe logjistikë ushtarake në vitet ‘90 nga qeveria e Milosheviçit. Veç armëve, atyre ju dha liçensë për kryer krime dhe operacione sabotazhi ku ushtria e rregullt nuk përfshihej.

Dosja e krimeve tregon se kjo milici ka përgjegjësi për vrasjet dhe përdhunimet e grave në Bosnjë. Për këto krime institucionet serbe u njoftuan në kohë, por nuk u mor asnjë masë për t’i ndalur./Euronews.al