Azemi: Kryetari i Prishtinës mbi dy muaj me vendimin për pagën minimale në tavolinë, nuk e nëshkruan

Punëtorët teknikë të sektorit privat kanë vazhduar protestën për paga dhe zbatimin e pagës minimale, ndërsa kryetari i Sindikatës së Punëtorëve Teknikë, Jusuf Azemi, ka kritikuar kryetarin e Komunës së Prishtinës për moszgjidhjen e kësaj çështjeje.

Azemi ka thënë se punëtorët aktualisht paguhen rreth 391 euro, ndonëse paga minimale, sipas tij, është 500 euro dhe është dashur të zbatohet nga 1 korriku.

“Ne e kemi një ligj të pagës minimale prej 500 eurosh, ndërsa ne po paguhemi 391 euro. Që nga qershori kemi filluar ta paralajmërojmë komunën se nga momenti i rritjes së pagës, më 1 korrik, duhet të respektohet ky vendim, por jemi në muajin tetor dhe ende nuk po e marrim pagën minimale”, tha Azemi, raporton Telegrafi.

Ai ka bërë të ditur se punëtorët teknikë në shkollat fillore dhe të mesme në Prishtinë janë në grevë që nga 1 shtatori, duke theksuar se po i marrin rreth 350 dhe 390 euro punëtorët.

Kryetari i sindikatës ka pretenduar se vendimi për pagën minimale ka mbetur pa u nënshkruar nga kryetari i komunës.

“Kemi informacione se kryetari i komunës e ka më shumë se dy muaj në tavolinë vendimin për pagën minimale dhe nuk po e nënshkruan. Ai do ta marrë dënimin e merituar”, ka thënë Azemi.

Ai ka kritikuar gjithashtu mungesën e dialogut me punëtorët, duke thënë se institucionet nuk kanë treguar interesim të mjaftueshëm për zgjidhjen e situatës.

“Për një muaj e gjysmë nuk ka pasur asnjë reagim konkret. Ne kërkojmë që të na paguhen paratë që na takojnë. Nuk ka më shërbime pa paga, nuk ka skllavëri”, ka deklaruar ai.

Azemi ka paralajmëruar se greva do të vazhdojë deri në realizimin e kërkesave, madje edhe deri në fund të vitit nëse nuk gjendet një zgjidhje.

“Derisa të nënshkruhet vendimi për pagën minimale dhe të kryhen pagesat, nuk do të ketë punë. Grevën do ta vazhdojmë, qoftë edhe deri në Vitin e Ri, nëse nuk bëhet zgjidhje”, ka thënë Azemi.

Ai u ka kërkuar falje nxënësve për ndërprerjen e shërbimeve në shkolla, duke kërkuar nga institucionet përkatëse që të ndërhyjnë për zgjidhjen e situatës.

Deri në publikimin e këtij lajmi, nuk është përfshirë një përgjigje nga kryetari i Komunës së Prishtinës lidhur me pretendimet e ngritura nga Azemi. /Telegrafi/