Ngjyra rozë ka marrë një rol të ri: Mund ta bëjë fytyrën të duket më e freskët dhe më rinore
Nuanca e duhur e rozës në faqe, buzë dhe rreth syve mund t’i japë tenit më shumë dritë dhe gjallëri. Sekreti është te zgjedhja e tonit dhe ekuilibri në grim
Pamja e fundit e Jennifer Lopez është një shembull i mirë për këtë. Një nuancë intensive rozë në buzë, skuqje e freskët në faqe dhe një prekje rozë rreth syve. Ngjyra kalon në mënyrë të butë nga një pjesë e fytyrës në tjetrën, duke e bërë të gjithë tenin të duket më i freskët.
Rezultati është një fytyrë që duket më e çlodhur, më rinore dhe më e ndritshme, pa humbur natyrshmërinë.
Si arrin roza t’i japë kaq shpejt shkëlqim të shëndetshëm tenit?
Kur aplikohet në faqe, ngjyra rozë imiton në mënyrë natyrale skuqjen që fytyra merr kur qarkullimi i gjakut rritet. Nëse përdoret siç duhet, ajo mund ta freskojë vizualisht një ten që duket i lodhur ose pa shkëlqim.
Te Jennifer Lopez ky efekt funksionon veçanërisht mirë sepse skuqësi nuk është përqendruar vetëm në një pikë të përcaktuar fort në mes të faqeve. Ngjyra shtrihet lehtë lart, drejt tëmthave, duke krijuar një efekt shumë harmonik – sikur sapo të ishit kthyer nga një shëtitje në ajër të pastër.
E njëjta gjë vlen edhe për buzët. Ndërsa disa nuanca bezhë ose kafe nude mund t’i bëjnë tiparet e fytyrës të duken më të ashpra ose pa kontrast të mjaftueshëm, një rozë më intensive tërheq menjëherë dritën drejt pjesës së poshtme të fytyrës.
Në këtë rast, përfundimi me shkëlqim e shton edhe më shumë ndjesinë e freskisë dhe ndriçimit.
Zgjidhni nuancën e duhur
Barbie pink nuk ka nevojë të jetë neon për të funksionuar mirë.
Në lëkurë me nënton të ngrohtë ose të artë, nuancat lehtësisht korale, mjedre apo rozë më të buta me një prekje të ngjyrës së drurit të trëndafilit shpesh janë zgjedhje më e mirë, sepse nuk krijojnë kontrast tepër të ftohtë.
Për lëkurë me nënton më të ftohtë, nuancat rozë me tone kaltëroshe ose lehtësisht vjollcë mund të duken shumë natyrale.
Ndërsa tonet më të errëta të lëkurës mund të mbajnë pa problem nuanca më intensive rozë, nga fuksia deri te ngjyra e mjedrës.
Sekreti i dytë është ekuilibri
Ngjyra mund të jetë e pranishme në të gjithë fytyrën, por asnjë pjesë nuk duhet ta dominojë tjetrën.
Nëse buzët janë shumë rozë dhe të theksuara, skuqësi në faqe duhet të mbetet më i butë dhe më transparent.
Nëse dëshironi t’i vini më shumë në pah faqet, një produkt i lehtë, transparent ose me shkëlqim në buzë do të ndihmojë që pamja të mbetet e balancuar.
Në fund, sekreti nuk është të përdorni sa më shumë rozë, por ta shpërndani atë me kujdes. Kur nuanca e buzëve, faqeve dhe zonës rreth syve harmonizohet, fytyra mund të duket më e freskët, më e ndritshme dhe më e gjallë – pa krijuar përshtypjen e një grimi të rëndë. /Telegrafi/
