Ramës i vjen kundërpërgjigjja e ashpër: Serbia nuk mund të humbte atë që nuk i përkiste kurrë

Veprimtari shqiptar Ramazan Bekteshi ka reaguar ashpër ndaj kryeministrit të Shqipërisë, Edi Rama, pas deklaratës së tij se “Serbia humbi Kosovën”, duke e cilësuar atë si një gabim politik dhe historik.

Bekteshi, përmes një reagimi drejtuar Ramës, ka thënë se problemi nuk qëndron vetëm te deklarata e kryeministrit, por edhe te mënyra se si ai është përballur me kritikat që pasuan.

“Deklarata juaj se ‘Serbia humbi Kosovën’ nuk ishte thjesht një gabim politik – ajo zbuloi një keqkuptim themelor të historisë së Kosovës. Serbia nuk mund të humbasë atë që nuk i përkiste kurrë me të drejtë”, ka shkruar Bekteshi.

Ai e ka kritikuar Ramën edhe për përdorimin e etiketimeve ndaj kundërshtarëve të tij, duke theksuar se kritika është pjesë e demokracisë.

Sipas Bekteshit, reagimi i Ramës ndaj kritikëve nuk e ka mbrojtur argumentin e tij, por është shoqëruar me tallje dhe sulme ndaj atyre që e kanë kundërshtuar.

“Ne nuk jemi ‘ushtria e turbo-folkut’ që ju u përpoqët të na etiketonit. Ne jemi bijtë dhe bijat e Dardanisë apo jashtë saj, por që ia përkushtuam jetët tona”, ka deklaruar ai.

Bekteshi ka thënë se shqiptarët që e kanë kundërshtuar Ramën janë njerëz që për dekada kanë mbrojtur të drejtën e Kosovës për liri dhe ekzistencë, përmes punës, sakrificës, lobimit dhe protestave.

Ai ka shprehur zhgënjim edhe për faktin se, sipas tij, Rama u është përgjigjur kritikëve me etiketa që “tingëllojnë jashtëzakonisht të ngjashme me narrativat që Serbia ka përdorur prej kohësh për të nënvlerësuar shqiptarët e Kosovës dhe luftën e tyre”.

Veprimtari shqiptar ka theksuar se reagimet ndaj deklaratës së Ramës nuk kanë ardhur vetëm nga Kosova, por edhe nga trojet shqiptare dhe diaspora.

“Zemërimi nuk ishte partiak, rajonal apo i orkestruar, por ishte reagimi natyror i njerëzve që e njohin ndryshimin midis së vërtetës historike dhe absurditetit politik”, ka shkruar ai.

Në fund, Bekteshi ka ironizuar edhe mbështetjen që, sipas tij, Rama ka marrë nga serbët pas debatit.

“P.S. Në reagimin tim në X/Twitter kundër Ramës serbët shkruajnë se Rama ka të drejtë dhe se unë e kam gabim! Urime z. Rama për përkrahjen e rezervës së Beogradit”, ka përfunduar Bekteshi.

Reagimi i plotë:

Rama i xhindosur nga kritikat e shumta

I nderuar Kryeministër Rama,

Deklarata juaj se “Serbia humbi Kosovën” nuk ishte thjesht një gabim politik – ajo zbuloi një keqkuptim themelor të historisë së Kosovës. Serbia nuk mund të humbasë atë që nuk i përkiste kurrë me të drejtë.

Por problemi më i madh është se ju s’e pranoni gabimin. Në vend që të merreshit me kritikat, ju zgjodhët talljen. Ju nuk e mbrojtet argumentin tuaj, por i sulmuat ata që e sfiduan atë. Ky reagim ngre një pyetje legjitime: a ishte deklarata juaj thjesht një gabim, apo pasqyron një shkëputje shqetësuese nga realiteti historik i Kosovës dhe sakrificat e bëra për lirinë e saj?

Ne nuk jemi “ushtria e turbo-folkut” që ju u përpoqët të na etiketonit. Ne jemi bijtë dhe bijat e Dardanisë apo jashtë saj, por qe ia pekushtuam jetet tona. Ne jemi njerëz që kaluan dekada duke mbrojtur të drejtën e Kosovës për të ekzistuar, duke punuar, sakrifikuar, lobuar, protestuar dhe duke qëndruar pranë kauzës së saj kur kjo nuk ishte as në modë dhe as fitimprurëse.

Çfarë është veçanërisht zhgënjyese është se Kryeministri i Shqipërisë iu përgjigj kritikave duke përdorur etiketa dhe stereotipe që tingëllojnë jashtëzakonisht të ngjashme me narrativat që Serbia ka përdorur prej kohësh për të nënvlerësuar shqiptarët e Kosovës dhe luftën e tyre.

Duhet ta dini gjithashtu se reagimi nuk erdhi vetëm nga Prishtina. Ai erdhi nga të gjitha trojet shqiptare dhe nga diaspora në të gjithë botën. Zemërimi nuk ishte partiak, rajonal apo i orkestruar, por ishte reagimi natyror i njerëzve që e njohin ndryshimin midis së vërtetës historike dhe absurditetit politik.

Kritika është pjesë e demokracisë, por përbuzja për ata që nuk pajtohen me ju nuk është demokratike. Kryeministri i Shqipërisë zgjodhi talljen por jo argumentin, andaj ju i nënvlerësoni kritikët tuaj, postin tuaj te perlyer ma marrezira, afera, e protesta masive me te gjatat ne historine e Shqiperise.

P.S. Ne reagimin tim ne X/Twitter kunder Rames serbet shkruajne se Rama ka te drejte dhe se unë e kam gabim! Urime z. Rama per perkrahjen e parezerve te Beogradit.