Thirrje ndërkombëtarëve: Kosova nuk ka nevojë për bisedime me një partner që nuk do t’i thotë kurrë po Evropës për sa kohë që i shërben Moskës
Presioni mbi Kosovën për vazhdimin e dialogut po bie përsëri. Sërish po kërkohet vazhdimi i dialogut dhe arritja e një marrëveshje paqeje me Serbinë.
Kosova aktualisht ndodhet fare në prag të zgjedhjeve të reja parlamentare. Duke qenë në një situatë zgjedhjeje të qeverisë së re, nuk po e trajton procesin e dialogut, me gjithë thirrjet e ndërkombëtarëve.
Por si e shohin njohësit ndërkombëtarë këtë situatë të Kosovës?
Kështu, eksperti dhe njohësi i politikës, austriaku Gunther Fehlinger ka dhënë qëndrimin e tij lidhur me këtë ҫështje.
“Le të jemi shumë të qartë: dialogu pa pasoja është bërë një ritual i të heshturve dhe të shurdhërve – një shfaqje e projektuar për të vonuar integrimin e plotë euroatlantik të Kosovës, duke shpërblyer një Serbi që haptazi mban anën e Rusisë, armatoset nga Moska, strehon kriminelë lufte, destabilizon Bosnjën, kërcënon Malin e Zi dhe frikëson Kosovën me sulme hibride dhe shantazh ekonomik.
Për 12 vjet, dialogu i Brukselit ka sjellë: asnjë njohje, asnjë reciprocitet, asnjë llogaridhënie, dhe asnjë sanksion ndaj Beogradit për shkelje të vazhdueshme”, thekson ai.
ImageGunther Fehlinger JahnFoto galeri
Fehlinger tutje thotë se , në vend të kësaj, Serbia e ka përdorur procesin për t’u shtirur si evropiane, ndërsa vepron si baza e përparme e Rusisë në Ballkan.
“Serbia nuk është një aktor neutral – është një revizionist. Nuk zgjodhi Evropën; zgjodhi Putinin. Nuk kërkon paqe; kërkon rishikim territorial. Në kushte të tilla, Kosova nuk duhet të mbetet e bllokuar në një cirk negociatash të pafund”, vlerëson eksperti austriak për ‘Bota sot’.
Poashtu ai jep edhe një mendim të tij se ҫfarë duhet të bëjë Kosova tani.
“Të ndalojë së pranuari “dialogun si zëvendësim për shtetësinë”. Dialogu mund të rifillojë vetëm kur Serbia të njohë sovranitetin dhe integritetin territorial të Kosovës. Të kërkojë sanksione nga BE dhe SHBA ndaj Beogradit për: financimin e strukturave paralele të paligjshme, sponsorizimin e terrorizmit në Banjska, bllokimin e anëtarësimit të Kosovës në Këshillin e Evropës, dhe ndihmën ndaj Rusisë në anashkalimin e sanksioneve.
Zhvendosjen e fokusit strategjik nga dialogu në anëtarësimin në NATO. Kosova ka provuar besnikëri ndaj Botës së Lirë: Paqe, stabilitet, demokraci, Vendi euro, orientim pro-perëndimor, Zero përputhje me Moskën ose Pekinin. Ndërkohë, Serbia stërvitet me ushtrinë ruse, blen armë kineze, mbron Moskën gjenocidale në OKB dhe kërcënon fqinjët e saj. Koha e iluzioneve ka mbaruar”, thotë ai.
Eksperti Fehlinger thotë më tutje se, Evropa duhet të kuptojë, Kosova nuk është problem, revanshizmi i Serbisë i lidhur me Putinin është.
“Përgjigja e duhur sot nuk është: “më shumë durim, më shumë dialog, më shumë pritje”. Përgjigja e duhur është: NATO për Kosovën tani – sanksione për Serbinë tani. Kosova i përket plotësisht dhe përgjithmonë familjes euroatlantike. Dialogu nuk mund të zëvendësojë dinjitetin, sovranitetin dhe sigurinë. Mjaft me rituale. Mjaft me qetësim. Kosova meriton anëtarësim në NATO, jo një dekadë tjetër bisedimesh me një partner që nuk do t’i thotë kurrë po Evropës për sa kohë që i shërben Moskës”, thekson Gunther Fehlinger-Jahn, për ‘Bota sot’.
