“Aktorë me prirje tradhtie”- Shala jep Alarmin: Po tentohet ripërsëritja e skenarëve të rrezikshëm për Kosovën
Kryetari i PDK-së, Bedri Hamza, ka zhvilluar një vizitë në Washington, ku është takuar me zyrtarë të lartë amerikanë, mes tyre Charles McLaughlin, Ndihmës i Posaçëm i Presidentit Donald Trump, si dhe Mark Fleming nga Departamenti i Shtetit. Hamza bëri të ditur se në këto takime është diskutuar për zhvillimet politike dhe ekonomike në vend, si edhe për domosdoshmërinë që institucionet e Kosovës ta kenë prioritet forcimin e raporteve strategjike me SHBA-në.
Ndaj kësaj vizite dhe zhvillimeve të tjera politike në vend ka reaguar në një prononcim për gazetën “Bota sot”, Hafiz Shala, anëtar i Bordit Ekzekutiv të LSHQA-së dhe publicist shqiptaro-amerikan, duke paralajmëruar se skenari i vitit 2020 rrezikon të rikthehet me “të njëjtën regji dhe të njëjtët aktorë”.
Në komentin e tij, Shala ngre shqetësimin se lëvizjet e opozitës, vizitat diplomatike dhe veprimet e Listës serboshqipfolëse mund të jenë pjesë e një përpjekjeje të koordinuar për t’i pamundësuar Kryeministrit Albin Kurti një mandat të ri, duke rrezikuar — siç thotë ai — stabilitetin, sovranitetin dhe tërësinë territoriale të Dardanisë, siç i referohet ai Kosovës.
“Ngjashëm me vitin 2020, kur ai që ishte ndërmjetësues për marrëveshjen Serbi–Dardani, duke tentuar që njëherë të krijohen raportet në marrëdhëniet ekonomike duke filluar nga krijimi i lidhjeve përmes transportit ajror, hekurudhor dhe rrugor, për ta vazhduar atë kryesoren – korrigjimin/ndarjen e veriut sipas pëlqimit të dhënë paraprakisht nga ish-presidenti Hashim Thaçi.
Kur Prokurori amerikan Jack Smith, prokuror në Gjykatën Speciale të Hagës i votuar nga Parlamenti i Kosovës (Dardanisë), me dakordimin e opozitës dhe me insistimin e angazhimin e Hashim Thaçit, ia publikoi aktakuzën duke ia ndërprerë udhëtimin për në Washington D.C., çka njëkohësisht përkohësisht e ndaloi këtë akt tragjik për Dardaninë”, ka thënë Shala për “Bota sot”.
ImageHafiz ShalaFoto galeri
Personi i angazhuar për monitorimin e asaj marrëveshjeje – i njëjti që kishte rol kyç edhe në vitin 2020 – sipas Shalës, ishte bashkautor në rrëzimin e Qeverisë Kurti përmes koordinimit të ngushtë me partitë opozitare, veçanërisht me LDK-në.
Ai thekson se kjo ndodhi pikërisht gjatë pandemisë, në një periudhë kur vendit i nevojitej unitet dhe angazhim i shtuar institucional, duke e krahasuar një veprim të tillë me atë që do ta bënte vetëm Serbia në rrethana të tilla.
Pavarësisht kësaj, Shala thekson se, Kurti u rikthye më i fuqishëm me votën e qytetarëve dhe për herë të parë në historinë e Dardanisë e përfundoi mandatin e plotë qeverisës, duke e frenuar ndikimin e Serbisë në çështjet e brendshme të vendit.
“I caktuari për monitorimin e kësaj marrëveshjeje, po ai i njëjti i atij viti, iu kujtohet kur, në bashkëpunim të ngushtë me partitë opozitare – në këtë rast me LDK-në – rrëzuan Qeverinë Kurti në kohën e pandemisë, gjë që vetëm Serbia do ta bënte një veprim të tillë kur popullit i duhej angazhimi shtetëror e qeveritar për t’u përballur me këtë pandemi të rrezikshme për njerëzimin. Kurti u kthye shumë më i fuqishëm me votën e popullit, i cili për herë të parë në historinë dardane e përfundoi me sukses mandatin e plotë, duke e bllokuar Serbinë në përzierjen në punët e brendshme të shtetit sovran, gjë që tani po i hakmerret me fatalitet Vuçiqit, duke u përballur me presionin e popullit serb përmes demonstratave studentore e qytetare, ndonëse ato nuk janë në favor të Dardanisë, përveç akuzave tjera politike, edhe ajo për korrupsion familjar e klanor, dhe e reja se Vuçiqi si anëtar i të ashtuquajturve “snajperistë turistë” rreth vrasjeve misterioze të qytetarëve myslimanë boshnjakë, në cilësinë e anëtarit besnik të partisë çetnike të Vojisllav Sheshelit – kriminelit të gjykuar në Hagë për krime lufte. Akuza më e rëndë kundër Vuçiqit, në radhë të parë, është se i gënjeu serbët duke i mashtruar me sloganin “Kosova (Dardania) është Serbi”, potencon Shala.
Shala shpreh shqetësimin se një skenar i ngjashëm me atë të vitit 2020 mund të jetë duke u përgatitur sërish, duke iu referuar “vizitave të suksesshme” të kryetarit të PDK-së, Bedri Hamza, në Departamentin e Shtetit.
Ai apelon që të mos tregohet naivitet politik dhe të mos bie askush në këtë kurth, pasi sipas tij, ky “dorëzim” është bërë në marrëveshje me opozitën dhe me miratimin e Vuçiqit, në funksion të krijimit të një blloku të përbashkët që synon t’i pamundësojë Kurtit një mandat të ri qeverisës.
Shala thekson se e ardhmja politike e vendit nuk përcaktohet nga “aktorë me prirje tradhtie”, por nga populli, i cili — siç beson ai — nuk do të lejojë rikthimin në situatat e rrezikshme të së kaluarës, të ngjashme me kohën e bandave çetniko-terroriste, siç e quan ai “vizionin e ri të LDK-së”.
“Tani, brenga ime është se mund të ndodhë e njëjta regji, duke u përgatitur sipas “vizitave të suksesshme” të Bedri Hamzës, kryetar i PDK-së, në Departamentin e Shtetit, nën përkujdesjen e të njëjtit regjisor, në bashkëpunim të ngushtë me opozitën dhe Listën serboshqipfolëse, e cila nën qeverisjen e Kurtit u dorëzua me njohjen e shtetit, përdorimin e gjuhës dhe shkrimeve sipas Kushtetutës së Republikës së Dardanisë. Mos të bëhemi naivë dhe të biem në këtë grackë, sepse këtë dorëzim e kanë bërë në marrëveshje me opozitën dhe me pëlqimin e Vuçiqit, për t’ia arritur qëllimit për t’u bashkuar me Listën serboshqipfolëse dhe opozitës, për t’ia pamundësuar Kurtit rizgjedhjen në krye të qeverisë, gjë që nuk varet nga këta aktorë me orientim tradhtie, por është në dorën e popullit. Populli nuk do të lejojë kthimin në pikën zero, në kohën e bandave çetniko-terroriste, sipas “vizionit të ri të LDK-së”, të sugjeruar nga udhëheqja e saj aktuale partiake, e cila po mburret gjoja me aderimet e ish-(b)analistëve, sa duket edhe të paguar nga ata ose të premtuar për ndonjë post ose deputet, gjë që po e bëjnë edhe partitë tjera, që është vërejtur gjatë gjithë periudhës duke u shërbyer me gënjeshtra, montime skenash dhe propagandë dezinformative kundër udhëheqjes së Dardanisë, Presidentes Vjosa Osmani dhe Kryeministrit Albin Kurti.
Qëndrimet dhe veprimet e këtyre dy udhëheqësve në mbrojtje të shtetit, siç thotë populli, të dërguar nga Perëndia në kohën më kritike për vendin, kur opozita iu bashkua Serbisë me slogane e narrativa të njëjta antishqiptare, që është alarm i fuqishëm e i rrezikshëm, i cili zëshëm po kumbon mbi popullin shqiptar, duke menduar se ata i kanë harruar lumenjtë e gjakut të derdhur për liri e shtet sovran. Nëse ata mendojnë se pas “eventualisht” marrjes së pushtetit çfarëdo kthimi pas – nëse populli e “lejon” – faji historik do t’u mbetet përgjithmonë opozitës së bashkuar, të cilët me këto metoda, si gjithmonë deri tani, kanë ardhur në pushtet”, thekson ai.
Kështu, për publicistin shqiptaro-amerikan, më 28 dhjetor është dita “D” për popullin shqiptar të Kosovës.
“Por, megjithatë mbetet në dorën e shenjtë të popullit, tani të syçelët më shumë se kurrë, për ta mbrojtur sovranitetin dhe tërësinë territoriale të rrezikuar nga të çmendurit për pushtet, të turpit dhe të tradhtisë.
Mos të harrojmë se veriu me Trepçën dhe Ujmanin është halë në sy, me epsh për grabitje dhe shfrytëzim nga individë për t’u bërë partnerë të Trepçës, ndoshta edhe shtete të fuqishme, siç ka ndodhur më parë, të premtuar nga ish-pushtetarët për favore të premtuara nga Serbia dhe aleatët e saj, të cilëve iu interesonte qoftë edhe për përfitime personale e karrieriste në dëm të Republikës së Dardanisë.
Qofsha i gabuar, por mos u qoftë premtuar nga ish-udhëheqja e cila u tregua dorëlirë në falje të territoreve dhe riformatimit të kufijve, që do të ishte tradhti ndaj popullit dhe luftës çlirimtare të UÇK-së, heronjve dhe martirëve të saj dhe familjarëve të tyre që ranë për liri. E vërteta megjithatë një ditë jo shumë larg do të dalë në shesh, por mos do të jetë tepër vonë, sepse populli është duke e gëzuar lirinë e merituar. Një e mirë në këtë rast është se dolën në sipërfaqe ata të cilët fshiheshin skutave e qosheve partiake në pritje të ndonjë posti, që populli tani do t’ua shohë fytyrën e vërtetë politike, të fshehur me dekada”, përfundon Shala prononcimin e tij për gazetën “Bota sot”.
