Sveçla: Në Prishtinë nuk ka fitues, qytetari humbësi kryesor

Dje u përmbyll me sukses raundi i dytë i zgjedhjeve lokale, ku qytetarët patën mundësinë të zgjedhin udhëheqësit e komunave të tyre. Ministri Xhelal Sveçla ka vlerësuar performancën e Lëvizjes VETËVENDOSJE!, duke theksuar se ajo ka arritur rezultate më të mira se në çdo zgjedhje lokale më parë.

Megjithatë, sipas tij, pritshmëritë ishin më të mëdha dhe në disa komuna kërkohet punë më intensive dhe qartësim i konceptit ndaj votuesve. Ministri Sveçla thekson se në Prishtinë nuk ka fitues të qartë dhe humbësi më i madh është qytetari, duke kritikuar koalicionin LDK-PDK-AAK dhe ndikimin e oligarkëve dhe disa mediave.

“Angazhimi ynë do të mbetet i fokusuar në minimizimin e dëmit dhe zvogëlimin e çmimit për qytetarët dhe shoqërinë,” ka theksuar ministri Sveçla, duke falënderuar përzemërsisht aktivistët dhe qytetarët për punën dhe besimin e tyre.

Ai gjithashtu ka shtuar se, edhe përkundër sfidave dhe shkeljeve që mund të ndodhin, do të vazhdojë të reagojë ndaj padrejtësive dhe të punojë me drejtësi dhe përkushtim.