LDK në udhëkryq: mes dashurisë së vjetër me PDK-në dhe afrimit me VV-në

Kjo javë pritet të jetë vendimtare për politikën kosovare, pasi mund të përcaktojë nëse do të kemi një koalicion qeverisës mes Lëvizjes Vetëvendosje dhe Lidhjes Demokratike të Kosovës, apo vendi do të shkojë drejt zgjedhjeve të reja.

Zhvillimet në Vushtrri, ku dega e LDK-së ka vendosur të mbështesë kandidatin e VV-së në balotazh, kanë shtuar spekulimet se kjo marrëveshje mund të jetë një parathënie e bashkëpunimit të mundshëm edhe në nivel qendror.

Megjithatë, gjendja brenda LDK-së tregon se rruga deri te një marrëveshje e tillë është shumë më e ndërlikuar. Në këtë parti po vërehet një ndarje e qartë: një pjesë e strukturave lokale e sheh LVV-në si partner të natyrshëm në emër të “ndryshimit” dhe “shpresës së re”, ndërsa pjesa tjetër vijon të mbajë afër PDK-në, për shkak të “dashurisë së vjetër” që i ka lidhur këto dy parti ndër vite, duke ndarë pushtetin në shumë nivele të qeverisjes lokale e qendrore.

Kjo përçarje po e bën LDK-në të duket si një parti me dy zëra: baza kërkon ndryshim, ndërsa elita ngulmon në rikthimin e aleancave të vjetra.

Në anën tjetër, Vetëvendosje po e shfrytëzon situatën për të testuar terrenin politik. Për Albin Kurtin, një koalicion me LDK-në do të siguronte stabilitet qeverisës, por njëkohësisht do ta detyronte të bënte lëshime që mund të dëmtonin imazhin e tij si lider i reformës. Prandaj nga VV nuk po shihet ngut, por një pritje e kujdesshme — për të parë nëse LDK është e gatshme të hyjë në qeveri pa kushte të tepërta.

Epilogu mund të shkojë në dy drejtime: ose do të kemi një marrëveshje të papritur mes LVV-së dhe LDK-së, e cila do të shihej si një hap drejt stabilitetit politik, ose vendin do ta presin zgjedhje të reja, ku secila parti do të kërkojë të rrisë kapitalin e vet elektoral mbi kurrizin e tjetrës.