Tendenca për një “Esat Pashë të ri”- Kritikohet deklarata e Ramës për dialogun: I shërben planeve të dëmshme për Kosovën

Kryeministri i Shqipërisë, Edi Rama, ka deklaruar së fundmi se Kosova nuk duhet të fokusohet në atë se çfarë mendon Serbia, por duhet të përqendrohet në përmbushjen e kërkesave që vijnë nga Bashkimi Evropian për dialogun dhe procesin e integrimit.

Ai theksoi se çdo vonesë apo shmangie nga këto kërkesa mund të çojë Kosovën drejt izolimit më të thellë politik dhe ekonomik, duke e vendosur vendin në një pozitë të pafavorshme në arenën ndërkombëtare.

Sipas Ramës, kjo situatë është për t’u ardhur keq, duke qenë se mundësitë e zhvillimit dhe të avancimit drejt integrimit evropian nuk duhet të humbasin për shkak të bllokadave të jashtme.

“Kosova nuk duhet të mendojë Serbinë, nuk duhet të shohë Serbinë, nuk duhet t’ia dijë se çfarë bën Serbia, por duhet të bëjë pjesën e vet, duhet të bëjë detyrat e veta dhe duhet t’i japë Bashkimit Evropian, të gjitha atë fletoren me detyrat e bëra të shtëpisë dhe duhet të kërkoj të ec përpara. Domethënë, kjo nuk ka të bëjë me përmbushjen apo pranimin e asaj çfarë kërkon Serbia. Kjo ka të bëjë me pranimin e asaj çfarë kërkon Bashkimi Europian dhe ky dialog i ndërmjetësuar nga BE-ja, që është një dështim i madh, është dështim i madh sepse formati është i gabuar. E kam thënë që prej ditës së parë dhe kjo ndodh sepse është i bazuar në një parim shumë të thjeshtë. Vendet duhet të përmbushin kushtet që lidhen me vlerat, parimet dhe mënyrën e jetesës së Bashkimit Europian. Pra, në qoftë se Kosova do ta bëjë këtë, do të jetë në interesin e saj më të mirë, për të mos ta lidhur veten me Serbinë, për të mos menduar sa të kënaqur apo të pakënaqur do të jenë serbët, po thjesht ta bëjnë këtë gjë. Në të kundërt do të vazhdojë ta izolojë veten gjithmonë e më shumë dhe është për t’u ardhur keq”, tha ai.

Mekuli: Rama kërkon që Kosova të bëjë lëshime në dialog

Gazetari dhe publicisti Gëzim Mekuli, në një përgjigje për “Bota sot”, deklarimet e Edi Ramës i cilësson të padrejta dhe ofenduese për Kosovën.

Sipas Mekulit, Rama manipulon kur thotë se Kosova merret me “çka mendon Serbia”, pasi shteti ynë fokusohet mbi veprimet agresive të Serbisë.

ImageGëzim MekuliFoto galeri
Ai e krahasoi retorikën e Ramës me veprimet e Esat Pashë Toptanit në 1914, duke akuzuar kryeministrin se për të ruajtur imazhin ndërkombëtar mund ta shtyjë Kosovën drejt kompromisesh të dëmshme.

“Deklarata e Ramës është e padrejtë, ofenduese dhe në thelb kapituluese. Kosova nuk izolon veten, përkundrazi është një shtet që ka rrëzuar pushtimin serb, ka ndërtuar institucione demokratike dhe është njohur ndërkombëtarisht. Rama manipulon kur thotë se Kosova merret me “çka mendon Serbia”. Jo, Kosova nuk shikon mendimin e Serbisë, por veprimet e Serbisë: 100 vjet pushtime, masakra, shpërngulje, dhunime dhe gjenocid, ky nuk është “mendim” i Serbisë; është veprim i Serbisë.

Serbia edhe sot financon struktura ilegale ushtarake në Kosovë dhe nuk e njeh shtetësinë tonë. Të injorosh terrorizmin shtetëror të Beogradit nuk është vizion, por amnezi historike. Për fat të keq, Rama sillet si një Esat Pashë Toptan modern, i cili ashtu si në 1914 nënshkroi marrëveshje me Nikolla Pashiqin për të ruajtur pushtetin e tij, ky sot përkëdhel, mirëkupton dhe vajton Serbinë për të ruajtur imazhin e tij në Beograd e në Bruksel.

Retorika e Ramës, e nënvizoj këtu përsëri, është një rikthim i logjikës së Esat Pashë Toptanit, i cili, për të ruajtur pushtetin e tij personal, nënshkroi marrëveshje me Serbinë (Nish, 1914) duke i falur territore shqiptare Kralevinës serbe. Edhe Rama, për të ruajtur pozitën e tij ndërkombëtare dhe për të marrë komplimente diplomatike, është i gatshëm të shtyjë Kosovën drejt kompromisesh të dëmshme e të pariparueshme. Në të dy rastet, atëherë në vitin 1914 dhe sot në vitin 2025, kemi të bëjmë me dy politikanë që shohin politikën shqiptare me dioptri të syzeve politike të Podgoricës dhe Beogradit. A do të ia arrijë Rama të prodhojë një “Esat Pasha të ri në Prishtinë” mbetet të presim…”, shprehet Mekuli.

Mekuli hedh poshtë deklarimin e Ramës se Kosova po izolohet, duke thënë se Kosova nuk është duke u izoluar, por po mbrohet nga projekte si “Ballkani i Hapur” që i shërbejnë interesave serbe.

“A është izolim fakti që Kosova i dha fund pushtimit të veriut të Kosovës nga bandat zyrtare të Serbisë dhe ndërtoi institucionet e veta? Apo “izolim” është kur Kosova refuzon të bëhet pjesë e projekteve të dështuara si “Ballkani i Hapur”, që synonin t’i shërbenin “Serbisë së madhe” dhe ambicieve të Vuçiqit?

Në të vërtetë, Kosova nuk është duke u izoluar, por duke u mbrojtur nga një projekt që rrezikon identitetin e saj shtetëror dhe sovranitetin kushtetues. Izolimin, po, e prodhojnë ata që për interesa personale bëjnë lëshime të dhimbshme ndaj Beogradit, duke i shitur ato si “integrim evropian”, potencon ai.

Më tej, ai shton se Rama po i bën presion të hapur Kosovës, duke kërkuar të bëjë lëshime në dialog.

“Po, është presion i hapur. Rama kërkon që Kosova të bëjë lëshime në dialog, jo për hir të Kosovës, por për të realizuar planet e dëmshme të Hashim Thaçit, Isa Mustafës dhe Vuciqit për “Zajednicën”; projekt i Beogradit për të futur Serbinë brenda Kosovës me mjete jo vetëm politike. A do të pranojë Kosova që dinari serb të jetë monedhë zyrtare? A do të lejojë një sistem paralel arsimor e shëndetësor, jashtë normave të Kushtetutës së Kosovës por brenda Kushtetutës së Serbisë? A është kjo rruga e BE-së, apo rruga e kthimit të Serbisë brenda Kosovës?”, deklaron Mekuli.

Në fund, gazetari kritikon aleancën mes Edi Ramës dhe Aleksandar Vuçiqit, duke thënë se ata përpiqen të detyrojnë Kosovën të bëjë lëshime që nuk i shërbejnë popullit.

Sipas tij, Rama po izolohet nga vetë shqiptarët duke nënshtruar interesat kombëtare ndaj Beogradit dhe Brukselit, ndërsa Kosova mbron pavarësinë dhe sovranitetin e saj.

“Jo, kjo nuk është një përplasje mes dy qeverive shqiptare. Këtu kemi një aleancë të hapur politike mes Edi Ramës dhe Aleksandar Vuçiqit, të cilët kërkojnë ta detyrojnë Republikën e Kosovës të bëjë lëshime që nuk i shërbejnë popullit të Kosovës, por fashizmave të Serbisë. Shqipëria nuk është Edi Rama. Shqipëria është kushtetuta e saj, e cila në nenin 8 përcakton se “Republika e Shqipërisë mbron të drejtat kombëtare të popullit shqiptar që jeton jashtë kufijve të saj”, jo të kujdeset për interesat e Serbisë, Malit të Zi apo Brukselit.

Në vend që të merret me korrupsionin pandemik në Shqipëri, me krizën ekonomike, me ikjen masive të shqiptarëve, Rama luan rolin e një “Churchilli të vogël të Ballkanit” duke i hedhur thika pas shpine Kosovës, jo Albinit. Pse mediat e tij nuk publikuan suksesin e sondazhit të Gallup ku kjo e rendit Kosovën ndër vendet më të sigurta në botë. Sepse kjo nuk i shërben propagandës së tij, apo jo?

Kush po e “izolon veten”? Kosova që po mbron pavarësinë dhe sovranitetin e saj, apo Edi Rama që po izolohet nga vetë shqiptarët për shkak të politikës së tij të nënshtrimit para Beogradit dhe Brukselit? Historia e Esat Pashë Toptanit na e mëson se kush fal tokat e kombit për pushtet, përfundon në anën e gabuar të historisë. Dhe kjo është rrugica ku po ecën Edi Rama” – përfundon ai.

Makolli: Është non sens i llojit të vet

Kurse, aktivisti politik Vesel Makolli, ka thënë se kjo është non sens që Kryeministri i Shqipërisë, Edi Rama, dhe Kryeministri i Kosovës, Albin Kurti, t’i dërgojnë mesazhe njëri-tjetrit përmes opinionit publik.

ImageVesel MakolliFoto galeri
Sipas tij, kjo tregon mungesë bashkëpunimi dhe koordinimi mes qeverive për çështje jetike për Kosovën.

“Është non sens i llojit të vet, që Kryeministri i Shqipërisë Edi Rama dhe Kryeministri i Kosovës Albin Kurti, i dërgojnë mesazhe njëri-tjetrit nëpërmjet opinionit publik, gjegjësisht deklarimi i fundit i Ramës dhe shumë raste të tjera të ngjashme në të kaluarën, e vërtetojnë një të vërtetë të hidhur, se në mes të qeverive të dy shteteve shqiptare, nuk ka bashkëpunim dhe koordinim të veprimeve dhe qëndrimeve, kur kemi të bëjmë me çështje jetike për Kosovën, e kjo do të thotë, kur është në pyetje interesi i kombit shqiptar.

Dihet që finalizimi i shtetësisë së Kosovës, nuk mund të realizohet pa arritur marrëveshjen gjithëpërfshirëse me Serbinë, nën patronatin e faktorit ndërkombëtar, gjegjësisht BE dhe SHBA-s. Serbisë i konvenon zvarritja e arritjes së marrëveshjes finale, pasi nuk e ka në horizont njohjen e shtetësisë së Kosovës, kurse Kosova duhet të veprojë dhe të koordinohet me miqtë tanë ndërkombëtarë, në veçanti me SHBA-t, për t’i arritur synimet për finalizimin e shtetësisë së saj dhe pranimin në institucionet relevante botërore, në BE dhe NATO”, thotë Makolli për “Bota sot”.

Tutje, ai shprehet se Kosova ka disa muaj pa institucione legjitime, në një kohë kur gjeopolitika botërore po ndryshon dhe zhvillimet mund të jenë vendimtare.

Sipas tij, lënia e vendit pa qeveri për interesa egoiste dhe partiake është non sens dhe mund të shihet si anti-shtetërore.

“Kosova ka disa muaj që është pa institucione legjitime. Në kohën kur po ndryshon gjeopolitika botërore, me zhvillime dramatike në Europë dhe më gjerë dhe kur koha mund të jetë vendimtare, më e lënë vendin në pa pozicion, pa institucione, për shkaqe egoiste, inateve dhe interesave individuale dhe partiake, është më shumë se non sens, bile mund të tangojë edhe si anti-shtetërore. Partia që ka dalë e para në zgjedhjet e Shkurtit me 48 ulëse deputeti të fituara dhe tri partitë tjera që i kanë fituar 52 ulëse në Kuvend, e din mirë se për finalizimin e shtetësisë së Kosovës, në rend të parë është arritja e marrëveshjes gjithëpërfshirëse me Serbinë me ndërmjetësimin e faktorëve ndërkombëtarë dhe se për arritjen e kësaj marrëveshjeje, janë marrë disa obligime me marrëveshjet e Brukselit dhe të Ohrit, realizimi i të cilave bëjnë në kundërshtim me premtimet populliste dhe folkloriste të partisë fituese të zgjedhjeve, andaj ajo po eskivon bashkëpunimin me partitë tjera për t’i bërë numrat për zgjedhjen e qeverisë, duke e hedhur fajin te opozita dhe duke e përdorur situatën aktuale politike në veri të vendit për ta mbuluar keq-qeverisjen e saj dhe dështimet e diplomacisë në rrafshin ndërkombëtar, ku rejtingu i Kosovës kurrë nuk ka qenë më i ulët.

Në kontekst të kësaj dhe duke i pasur parasysh sanksionet që i ka Kosova nga BE dhe vendimin e fundit të SHBA-ve që pezulluan “Dialogun e planifikuar Strategjik me Kosovën”, kritikat, ose sugjerimet e Edi Ramës, duhet të analizohen dhe të vlerësohen. Ato nuk kanë të bëjnë me presione apo diçka të ngjashme, për të bërë lëshime në dialogun me Serbinë, por duhet kuptuar që Kosova duhet strikt, pa ekuivok, të koordinohet me njërin e pavarësisë së Kosovës, SHBA-t, për t’i përmbushur ato obligime që i ka pranuar me marrëveshjet e Brukselit dhe Ohrit, e që janë jetike për largimin e sanksioneve dhe finalizimin e shtetësisë së Kosovës” – përmbylli Makolli për “Bota sot”.