Lajm i mirë për qytetarët e Shtimes: Nisin punimet për dy fusha tenisi në vlerë 200 mijë euro

Një lajm i jashtëzakonshëm për sportin dhe rininë e komunës së Shtimes.Kryetari Qemajl Aliu ka nënshkruar sot, së bashku me Sekretarin e Ministrisë së Kulturës, Rinisë dhe Sportit, Bislim Bislimi, një memorandum për ndërtimin e dy fushave të tenisit në territorin e Shtimes. Investimi kap vlerën prej 200 000 euro dhe shënon herën e parë që sporti i tenisit merr një seriozitet të tillë në infrastrukturën sportive komunale.

“Ky është një moment i veçantë e jashtëzakonisht i rëndësishëm, sepse për herë të parë po hapim mundësi të reja për sportistët e rinj të tenisit,” tha Aliu pas ceremoniës së nënshkrimit. Ai shton: “Ky investim unik do t’i japë gjeneratave të reja hapësirën e merituar për zhvillim të talentit në sportin e bardhë. Me këtë projekt po bëhet realitet ëndrra e shumë të rinjve, dhe po hedhet gurthemeli që edhe nga Komuna jonë të organizohen gara dhe të shkëlqejnë lojtarët tanë.”

Fushat e reja, së bashku me rritjen e interesimit për tenisin në shkallë lokale, pritet të nxisin komunitetin të përqendrohet më shumë në aktivitet sportiv dhe shëndet, duke zgjeruar mundësitë për zhvillim akademik të të rinjve përmes sportit.