Halilaj: Rezultati i LDK-së paradoksal – fytyra të reja, krizë e vjetër

LDK ka fituar më pak ulëse në Kuvend pas zgjedhjeve të 28 dhjetorit krahasuar me ato të 9 shkurtit, por ka befasuar me katër deputetë të rinj në grupin parlamentar.

Këtij brezi të ri i prinë Ukë Rugova, të cilit i bashkohen Janina Ymeri, Adelina Thaqi Meta dhe Ermal Sadiku. Ndërkohë, jashtë Kuvendit kanë mbetur disa emra të njohur, përfshirë Fadil Hadërgjonaj, Alban Zogaj, Ekrem Hyseni dhe Arben Gashi, si dhe disa kandidatë të tjerë.

Avokati Gazmend Halilaj vlerëson se rezultati i zgjedhjeve për LDK-në është paradoksal: humbje e figurave me përvojë, por edhe ardhje e një brezi të ri deputetësh.

Sipas tij, largimi i emrave të njohur tregon pakënaqësinë e elektoratit me funksionimin e deritanishëm të partisë, të cilën e sheh të paqartë, të fragmentuar dhe pa qëndrime të vendosura.

“Rezultati i zgjedhjeve të 28 dhjetorit për LDK-në paraqet një paradoks politik: nga njëra anë humbje ulësesh dhe dalje nga Kuvendi e figurave me përvojë, e nga ana tjetër futje e një brezi të ri deputetësh që përfaqëson një fytyrë më të re të partisë. Pyetja kryesore mbetet nëse kjo është një fitore e energjisë së re apo një humbje e kapitalit politik dhe institucional që LDK ka ndërtuar ndër vite. Fakti që emra të njohur si Fadil Hadërgjonaj, Alban Zogaj, Ekrem Hyseni apo Arben Gashi mbetën jashtë Kuvendit tregon qartë se elektorati i LDK-së ka ndëshkuar vazhdimësinë pa rezultate konkrete. Kjo nuk është thjesht rotacion emrash, por shenjë pakënaqësie me mënyrën se si LDK ka funksionuar në vitet e fundit – shpesh e paqartë në qëndrime, e fragmentuar në qëllime dhe e pavendosur përballë ndryshimeve të mëdha politike në vend”, shprehet ai.

ImageAvokati Gazmend HalilajFoto galeri
Halilaj thekson se deputetët e rinj të LDK-së kanë potencial për energji të re, por paralajmëron se pa vizion dhe guxim politik, ndryshimi mbetet vetëm simbolik.

Sipas tij, rezultati i LDK-së reflekton krizë identiteti dhe mungesë pozicionimi të qartë, ndërsa qytetarët kanë favorizuar qasjen më të vendosur të LVV-së.

Ai vlerëson se pa ndryshime të thella në drejtim, lidership dhe strategji, LDK rrezikon të mbetet me fytyrë të re, por me mendësi të vjetër.

“Deputetët e rinj – Ukë Rugova, Janina Ymeri, Adelina Thaqi Meta dhe Ermal Sadiku – përfaqësojnë potencial për energji dhe frymë të re, por energjia pa vizion dhe guxim politik nuk mjafton. Sfida e tyre reale nuk është të jenë “emra të rinj”, por të dëshmojnë se nuk do të jenë vazhdimësi e politikave të vjetra që e çuan LDK-në në rënie. Pa një shkëputje të qartë nga praktikat e kompromisit pa parime dhe opozitarizmit të butë, ndryshimi mbetet vetëm simbolik.

Nga këndvështrimi i një përkrahësi të Lëvizjes Vetëvendosje, ky rezultat i LDK-së nuk përbën surprizë. Qytetarët kanë zgjedhur qartësi, drejtësi dhe vendimmarrje të fortë – elemente që LVV i ka artikuluar më bindshëm. Ndërkohë, LDK ka mbetur mes nostalgjisë për të kaluarën dhe frikës për t’u pozicionuar qartë në të tashmen. Prandaj, ky rezultat më shumë tregon një krizë të brendshme identiteti sesa një proces të mirëfilltë pastrimi politik. Reflektimi i vërtetë për LDK-në do të shihet vetëm nëse ajo ndryshon rrënjësisht drejtimin, lidershipin dhe strategjinë politike, duke u distancuar nga politikat e paqarta dhe duke ofruar një alternativë reale – jo thjesht opozitare, por vizionare. Në të kundërtën, rrezikon të mbetet një parti me emra të rinj, por me mendësi të vjetër – dhe kjo, në politikën e sotme të Kosovës, nuk mjafton më”, përfundon ai për “Bota sot”.