Eksperti austriak: Albin Kurti përfaqëson një brez të ri lidershipi në Ballkan

Eksperti austriak për Ballkanin, Gunther Fehlinger Jahn, ka përgëzuar kryeministrin Albin Kurti dhe qytetarët e Republikës së Kosovës për, siç thotë ai, “konsolidimin e vazhdueshëm të një shteti sovran, demokratik dhe thellësisht evropian”.

Sipas Fehlinger Jahn, Kosova sot është një demokraci funksionale që përdor euron dhe është e ankoruar fuqishëm në aleancën perëndimore.

“Kosova ka përmbushur çdo kusht politik, juridik dhe moral që pritet nga një shtet evropian. Ajo që ka mbetur e papërfunduar nuk është agjenda reformuese e Kosovës — por guximi i Evropës,” deklaron ai.

Duke folur për drejtimin politik të Kosovës, Fehlinger Jahn thekson se kryeministri Kurti përfaqëson një model të ri udhëheqjeje në rajon.

“Albin Kurti është pjesë e një brezi të ri liderësh ballkanikë: parimor, i qartë dhe imun ndaj shantazhit nga fqinjët autoritarë,” thotë ai.

Sipas tij, Kosova nuk do të frikësohet, nuk do të negociohet si mall tregu dhe nuk do të mbetet e ngrirë në dialog, ndërkohë që, siç shprehet ai, “armiqtë e saj minojnë sigurinë evropiane”.

I pyetur se si e vlerëson drejtimin politik të Kosovës, eksperti austriak është kategorik:

“Kosova po bën gjithçka siç duhet. Qeveria ka mbrojtur sovranitetin, ka shkatërruar struktura kriminale dhe është rreshtuar 100 për qind me Perëndimin demokratik,” deklaron Fehlinger Jahn.

Ai shton se kontrasti mes Kosovës dhe Serbisë është i qartë.

“Kosova është demokraci. Serbia është projekt autoritar. Nuk ka ekuivalencë morale. Nuk ka ‘të dyja palët’. Ka vetëm demokraci kundër nacionalizmit, Evropë kundër ndikimit të Kremlinit.”

Sa i përket prioriteteve të Kosovës ndaj BE-së dhe NATO-s, Fehlinger Jahn bën thirrje për një qasje të re.

“Duhet të përfundojë iluzioni i dialogut me një regjim që nuk e njeh Kosovën, nuk i pranon kufijtë dhe bashkëpunon hapur me Rusinë,” thekson ai.

Sipas tij, Kosova duhet të integrohet dhe jo të negociohet pafund.

“Anëtarësimi në NATO dhe hapja e negociatave me BE-në nuk janë favore — janë domosdoshmëri strategjike,” shton ai.

Eksperti austriak vlerëson se Kosova ka aleatë të besueshëm dhe se numri i tyre po rritet.

“Gjermania, Austria, vendet nordike, shtetet baltike, Holanda dhe bërthama demokratike e BE-së e kuptojnë një të vërtetë të thjeshtë: stabiliteti në Ballkan kërkon një Kosovë të fortë dhe fundin e autoritarizmit serb,” deklaron ai.

Fehlinger Jahn e quan vitin 2026 vendimtar për rajonin.

“Kosova duhet të hyjë në një proces të përshpejtuar për anëtarësim në NATO në vitin 2026. Çdo vonesë tjetër shpërblen destabilizimin dhe ndëshkon demokracinë,” thotë ai.

Ai kërkon hapjen e menjëhershme të negociatave dhe integrimin e Kosovës në Tregun e Përbashkët Evropian.

“Kosova duhet të hyjë në BE para Serbisë,” thekson ai.

Sipas tij, përdorimi i suksesshëm i euros nga Kosova është dëshmi e pjekurisë institucionale.

“BE-ja duhet ta njohë politikisht Kosovën si anëtare të ardhshme të plotë të eurozonës,” deklaron Fehlinger Jahn.

Eksperti austriak është i prerë se pa ndryshim regjimi në Serbi nuk mund të ketë paqe afatgjate në Ballkan.

“Nuk do të ketë paqe të qëndrueshme në Ballkan për sa kohë që regjimi i Aleksandar Vuçiqit mbetet në pushtet,” shprehet ai.

Sipas tij, Evropa duhet të aplikojë ndaj Serbisë modelin e presionit politik të përdorur ndaj regjimit Maduro.

“Delegjitimim total politik, sanksione të synuara ndaj elitave të regjimit, izolim ndërkombëtar të regjimit – jo të popullit serb – dhe mbështetje të plotë për opozitën demokratike,” rendit ai.

Në fund, Fehlinger Jahn thekson se Kosova e ka dëshmuar veten.

“Kosova përdor euron, mbron demokracinë dhe qëndron pa asnjë dilemë me NATO-n dhe BE-në. Pengesa e fundit për paqen nuk është Prishtina, por udhëheqja autoritare në Beograd,” përfundon ai.

Sipas tij, viti 2026 duhet të jetë momenti kur Evropa ndalon së qetësuari nacionalizmin ballkanik, e shpërblen Kosovën dhe punon aktivisht për ndryshim demokratik në Serbi.

“E ardhmja e Ballkanit i përket demokracisë, NATO-s, BE-së dhe një Kosove të lirë si anëtare e plotë në të dyja,” deklaron Fehlinger Jahn.