“Ejani në shesh, ta rrëzojmë diktatorin Albin Kurti” – Analisti i Klan Kosovës, Vehbi Kajtazi, shkruan: “nga pushteti”

Sikur Albin Kurti të ishte diktator, atë mendim nuk do ta kishte shkruar kurrë. Nuk di nëse ka pasur guxim ta shkruante një apel të tillë kundër diktatorit Tito.

Nëse atëherë ka qenë i vogël, ndoshta e ka shkruar gjatë kohës së diktatorit Millosheviq. Nëse ka qenë i rritur, në epokën e Sllobodanit, dhe nuk e ka shkruar, ose ka pasur frikë, ose tash është bërë trim me ‘diktatorin’ e ri, Albin Kurti.

E dyta, ndoshta nuk i ka përjetuar rendet ku sundonte një diktator. Prandaj i mjafton fitorja mbi 50% për ta shpallur kryeministrin ‘diktator’. Thua se Kurti e votoi vetveten, jo populli.

Meqenëse sot guxon të bëjë një apel publikisht për rrëzimin e tij, Kurti nuk është diktator i vërtetë, por imagjinar. Se është i vërtetë, e besoni ju te Klan Kosova. Arsyen nuk e di; ju e dini vetë.

Dikur kishim trima që bënin apele për rrëzimin e diktaturës së Millosheviqit. Dhe përfundonin në burg ose në varr.

Dhe Kajtazi duhet ta dijë se këtu ka diktatorë, nuk ka shumë parti, nuk ka zgjedhje të lira dhe nuk ka prokurori jofunksionale, ku nuk shqyrtohen 250 kallëzime të qeverisë për keqpërdorime.

Sidoqoftë, dilni dhe protestoni kundër ‘diktatorit’ Kurti dhe jini të sigurt se ai do t’ju befasojë: do t’ju lejojë të protestoni sa të doni dhe kur të doni. Madje, as nuk do t’ju shikojë nga dritarja si Vuçiqi studentët.

Vazhdoni tutje dhe rrëzojeni ‘diktatorin’ në imagjinatë; kur të zgjoheni, do të shtangeni se si ia dolët ta ndihmoni Kurtin t’i fitojë përsëri zgjedhjet, ndoshta me mbi 60%.

Pikërisht mendimet si ky, nga Kajtazi dhe kolegët e tij, kanë ndikuar në rritjen dramatike të simpatisë ndaj Kurtit.

Dilni! Ndoshta, pasi të ktheheni, do të kuptoni se jetoni me një qeveri demokratike që dëshiron të luftojë korrupsionin, krimin dhe të ndërtojë një shtet ligjor.

Për disa, shteti juridik përjetohet si diktaturë, sepse qeveria thjesht do të zbatojë ligjin me përpikëri – pa përjashtuar as oligarkë, as kriminelë, e as të korruptuar. E as halla, dajë e teze. Pse? Sepse ligji nuk e parashikon.

Sidoqoftë, ju dilni në protestë, sepse kjo do të shërbejë edhe si një lloj autoterapie për të kuptuar në cilin rend jetoni. Ndoshta do të ndriçoheni dhe do ta kuptoni realitetin…