Reagimi i Bekim Jasharit, sinjal mbështetjeje për Qeverinë Kurti? Flet Halilaj ‘zbulon’ si mund të ndikojë në përqindjen zgjedhore

Bekim Hamëz Jashari ka reaguar ashpër ndaj deklaratave të disa individëve dhe politikanëve në Kosovë, të cilët, sipas tij, po përbuzin veprimet legjitime të Qeverisë së Republikës së Kos*ovës për shtrirjen e sovranitetit dhe integritetit territorial në veri të vendit, duke i krahasuar ato me krimet e regjimit të Slobodan Millosheviqit.

Në një reagim publik, Jashari ka theksuar se krahasime të tilla nuk mund të justifikohen as si padije e as si lapsus politik, por përbëjnë një fyerje të rëndë ndaj sakrificës së popullit shqiptar dhe historisë së vuajtjeve të tij.

Ai ka vlerësuar se është e papranueshme që veprimet e një shteti sovran, i cili po shuan struktura paralele ilegale, po vendos rend dhe ligj dhe po garanton funksionimin e institucioneve në të gjithë territorin e Republikës së Kosovës, të barazohen me sundimin dhe shtypjen e përgjakshme të Serbisë ndaj shqiptarëve.

Sipas Jasharit, deklarata të tilla i shërbejnë drejtpërdrejt narrativës së Serbisë, e cila synon ta shohë Kosovën të përçarë, të zhytur në konflikte të brendshme dhe të larguar nga interesat e saj vitale shtetërore.

“Populli i Kosovës i njeh mirë figurat publike dhe veprimet e tyre ndër vite, veçanërisht në momentet më të vështira për vendin. Historia nuk fshihet me deklarata ditore dhe as nuk rishkruhet për interesa politike afatshkurtra,” ka theksuar ai.

Në fund të reagimit, Jashari ka bërë thirrje për unitet, maturi dhe përgjegjësi kombëtare, duke nënvizuar se politika duhet të shërbejë si mjet bashkimi rreth interesave strategjike të Kosovës, e jo si instrument për përçarje, relativizim të krimeve serbe dhe përfitime të ngushta partiake.

Ai ka shtuar se Kosova ka nevojë për lidership të përgjegjshëm dhe me dinjitet kombëtar, që i shërben shtetit dhe atdheut, e jo egos personale dhe kalkulimeve politike afatshkurtra.

Avokati Gazmend Halilaj, thotë se , reagimi i Bekim Jasharit mund të interpretohet më shumë si qëndrim parimor dhe moral, i rrënjosur në mbrojtjen e shtetësisë dhe sakrificës mbi të cilën është ndërtuar liria e Kosovës.

“Reagimi publik i Bekim Jasharit ndaj deklaratave të disa individëve dhe politikanëve në Kosovë, të cilët veprimet e Qeverisë së Republikës së Kosovës në veri i kanë krahasuar me krimet e regjimit të Millosheviqit, ngre çështje me rëndësi juridike, morale dhe politike. Në thelb, ky reagim duhet të lexohet përtej emocioneve momentale dhe rreshtimeve partiake. Nga pikëpamja juridiko-kushtetuese, veprimet e Qeverisë së Kosovës për shtrirjen e sovranitetit dhe integritetit territorial janë jo vetëm legjitime, por edhe detyrim kushtetues. Kushtetuta e Republikës së Kosovës, si dhe parimet themelore të së drejtës ndërkombëtare, e njohin dhe e mbrojnë ushtrimin e autoritetit shtetëror në të gjithë territorin e vendit. Krahasimi i këtyre veprimeve me krime të regjimeve gjenocidale përbën relativizim të krimeve historike dhe një keqpërdorim politik të narrativës së viktimës. Në këtë kontekst, reagimi i Bekim Jasharit mund të interpretohet më shumë si qëndrim parimor dhe moral, i rrënjosur në mbrojtjen e shtetësisë dhe sakrificës mbi të cilën është ndërtuar liria e Kosovës, sesa si mbështetje e drejtpërdrejtë partiake për kryeministrin Albin Kurti. Ai nuk legjitimon domosdoshmërisht çdo politikë qeveritare, por refuzon barazimin e shtetit të Kosovës me regjime kriminale, çka përbën vijë të kuqe etike dhe historike. Pesha reale e mbështetjes së familjes Jashari Familja Jashari, për shkak të rolit historik dhe simbolik në luftën çlirimtare, gëzon një autoritet moral të veçantë në shoqërinë kosovare. Kjo peshë nuk është juridike dhe as formalisht politike, por simbolike dhe morale, e cila ndikon në diskursin publik dhe në formësimin e perceptimeve kolektive”, deklaron Halilaj.

Nëse reagimi i Bekim Jasharit perceptohet publikisht si mbështetje ndaj Qeverisë Kurti, atëherë përfitues kryesor në radhë të parë është Lëvizja Vetëvendosje, thotë Halilaj.

Sipas tij, ky perceptim mund të konsolidojë mbështetjen ekzistuese, veçanërisht tek votuesit që shohin shtrirjen e sovranitetit si prioritet shtetëror

“Megjithatë, në një shoqëri pluraliste dhe me elektorat gjithnjë e më racional, kjo mbështetje nuk mund të përkthehet automatikisht në vota apo në ndryshim të drejtpërdrejtë të rezultatit zgjedhor. Ajo mund të ndikojë në mobilizimin emocional të një pjese të elektoratit, por jo të përcaktojë në mënyrë vendimtare rezultatin. Pasojat politike të perceptimit të kësaj mbështetjeje. Nëse reagimi i Bekim Jasharit perceptohet publikisht si mbështetje ndaj Qeverisë Kurti, përfitues kryesor pritet të jenë subjektet politike që identifikohen me një qasje sovraniste dhe të vendosur ndaj veriut të Kosovës, në radhë të parë Lëvizja Vetëvendosje. Ky perceptim mund të konsolidojë mbështetjen ekzistuese, veçanërisht tek votuesit që shohin shtrirjen e sovranitetit si prioritet shtetëror”, shton avokati.

Ai shton se reagimi i Jasharit duhet kuptuar si mbrojtje e parimeve themelore të shtetit të Kosovës dhe e së vërtetës historike

“Në anën tjetër, partitë apo figurat politike që kanë ndërtuar diskurs kritik ndaj veprimeve të Qeverisë në veri, ose që janë perceptuar si të paqarta apo të lëkundura në çështjet e sovranitetit, mund të pësojnë rënie në besueshmëri dhe mbështetje, sidomos në planin simbolik. Përfundim Reagimi i Bekim Jasharit nuk duhet reduktuar në një akt mbështetjeje politike të ngushtë, por duhet kuptuar si mbrojtje e parimeve themelore të shtetit të Kosovës dhe e së vërtetës historike. Instrumentalizimi partiak i figurave simbolike mbetet gjithmonë rrezik për debatin demokratik, ndërsa përgjegjësia kryesore mbetet te institucionet dhe subjektet politike për të ndërtuar politika të qëndrueshme, ligjore dhe gjithëpërfshirëse për veriun e vendit”, përfundon Halilaj.