Skandali trondit Kosovën: Arrestohen disa zyrtarë të lartë dhe një ish-ministër – Sveçla jep mesazhin e fortë
Ministri në detyrë i Punëve të Brendshme, Xhelal Sveçla, ka dhënë disa detaje lidhur me finalizimin e suksesshëm të një operacioni të gjerë kundër keqpërdorimit të detyrës zyrtare dhe korrupsionit, i cili ka rezultuar me arrestimin e disa zyrtarëve të lartë institucionalë.
Ai ka vlerësuar punën profesionale dhe bashkëpunimin e institucioneve të sigurisë dhe drejtësisë, duke theksuar vendosmërinë e institucioneve të Republikës së Kosovës për të luftuar pa kompromis korrupsionin dhe krimin e organizuar, përcjell “Bota sot”.
Postimi i plotë
Finalizohet me sukses operacioni kundër keqpërdorimit të detyrës zyrtare dhe korrupsionit
Bazuar në të dhënat e siguruara nga Agjencia e Kosovës për Inteligjencë, pas një hetimi disamujore të kryer nga Policia e Kosovës dhe institucionet tjera relevante, sot janë arrestuar disa zyrtarë të lartë në institucione, të dyshuar për keqpërdorim të detyrës zyrtare dhe korrupsion, të ndërlidhur me procesin e shpronësimit të pronave private.
Në këtë rast janë të përfshirë disa zyrtarë të lartë publikë dhe persona përgjegjës, përfshirë: kryetarin e degës së Gjykatës së Graçanicës, J. M.; zyrtarë nga avokatura N. K., M. D. dhe B. D.; ekspertin e gjykatës Sh. T.; zyrtarin në Departamentin e Shpronësimeve; zyrtari i ATK G.L si dhe ish-ministrin e Tregtisë dhe Industrisë, F. I.
Sipas dyshimeve, personat e lartpërmendur kanë vepruar si grup i organizuar kriminal, duke keqpërdorur pozitat e tyre zyrtare dhe duke shkaktuar dëme të konsiderueshme në buxhetin e Republikës së Kosovës.
Ky grup dyshohet se, përmes korrupsionit dhe keqpërdorimit të detyrës zyrtare, ka iniciuar dhe deponuar lëndë në Gjykatën e Graçanicës me qëllim të rikompensimit të paligjshëm për shpronësimet e kryera gjatë viteve 2011–2015, duke përfituar në mënyrë të kundërligjshme nga fondet publike.
Koha kur zyrtarët publikë kanë keqpërdorur buxhetin e Republikës së Kosovës pa u ndëshkuar, ka përfunduar.
Përgëzoj institucionet për këtë sukses të radhës në luftën pa kompromis kundër keqpërdorimit të detyrës zyrtare dhe korrupsionit.
Vullneti politik për t’i luftuar dukuritë negative, bashkëpunimi ndërinstitucional dhe ai qytetar po japin rezultate konkrete për ndërtimin e një shteti ligjor, të zhvilluar dhe të pacenueshëm nga çfarëdo forme e krimit në vendin tonë.
