Aderime, koalicione dhe parti të shpërndara – fushata që po shpërfaq panikun politik

Zgjedhjet parlamentare të 28 dhjetorit po afrohen dhe njëkohësish me to, skena politike është gjallëruar dukshëm.

Partitë kryesore kanë nisur garën për aderime të reja, duke prezantuar pothuajse çdo ditë figura nga fusha të ndryshme—nga akademikë e profesionistë, te ish-zyrtarë apo emra të njohur të jetës publike.

Kjo lëvizje, që po shoqërohet me konferenca shtypi, postime në rrjete sociale dhe deklarata entuziaste, shfaq një përpjekje të dukshme të forcave politike për të dhënë mesazhin e rinovimit dhe zgjerimit të bazës së tyre përpara votimit.

Por çfarë fshihet pas këtij ritmi të shpejtë aderimesh? Analistët e shohin këtë trend si një strategji të qëllimshme për të krijuar perceptimin e energjisë së re dhe të një oferte më të pasur politike, sidomos në një klimë ku votuesit janë gjithnjë e më skeptikë ndaj klasës tradicionale politike.

Megjithatë, mbetet për t’u parë nëse këto figura do të kenë rol real apo nëse do të mbeten vetëm dekor fushate.

Në qendër të debatit ngrihet një pyetje e natyrshme: a duhet që partitë të përqendrohen te sasia e emrave të rinj që sjellin në skuadër, apo te cilësia dhe kontributi i tyre konkret?

Kjo valë aderimesh, megjithëse e zakonshme në prag zgjedhjesh, e rikthen në qendër të vëmendjes diskutimin mbi mënyrën se si partitë e kuptojnë hapjen dhe sa të gatshme janë të transformojnë strukturat e tyre nga brenda.

Mehmeti: Partitë do duhej të përqendroheshin më shumë te njerëzit e sinqertë dhe kontribuues, me figura të reja

E për këtë çështje për “Bota sot” foli opinionisti Gani Mehmeti, i cili fillimisht paralajmëroi partitë e vogla vetëm se i dobësojnë koalicionet me partitë e mëdha.

ImageGani MehmetiFoto galeri
“Duke parë moskrijimin e institucioneve shtetërore pas zgjedhjeve parlamentare të 9 shkurtit të këtij viti, pasi LVV nuk i kishte aq vota sa i nevojiteshin për këto institucione, të gjitha partitë politike kryesore po bëjnë përpjekje të ofrojnë sa më shumë bashkëpunim me partitë e vogla, me shpresë se do të dalin më mirë.

Por, sipas mendimit tim, kjo mënyrë e sjelljes së tyre vetëm sa i dobëson këto parti, pasi ato parti të vogla nuk e kishin kaluar as pragun në zgjedhjet e 9 shkurtit”.

Krahas kësaj, tha se Nisma nuk do bëj koalicion me LDK-në, ndonëse është përfolur, pasi që nuk kanë asgjë të përbashkët këto parti.

“Flitet për partinë e Fatmir Limajt të garojë bashkë me LDK-në! Kjo nuk shkon, sepse kanë qenë parti kundërshtare dhe nuk kanë asgjë të përbashkët me LDK-në.

Kështu, PDK bëri koalicion me Partinë “Familja” apo si po quhet me Emran Rrahmanin, i cili nuk e kaloi pragun. E njëjta ndodhi edhe me Partinë e Drejtësisë, që dështoi në zgjedhjet e shkurtit. Këto do të jenë si “zorrë qorre” për këto parti të mëdha, dhe kanë gabuar”.

Më tej, sa i përket figurave të reja, tha se varet se çka kanë sjellë partitë, derisa potencoi se aderimet më shumë mund t’u ndihmojnë partive se sa koalicionet.

Mirëpo, ai paralajmëroi se nuk ia vlen të shkosh në zgjedhje me kandidatë të korruptuar.

“Nëse në kandim janë freskuar me kandidatë të rinj, do të ishte në rregull, por duhet të jenë pak a shumë të dinjitetshëm, që u besohet dhe kanë kredibilitet.

Sa i përket aderimeve, çdo gjë varet se kush ka aderuar. Nuk ecet përpara me kandidatë dështakë, siç kanë qenë deri tani, prandaj nuk pritet asgjë e madhe. Populli thotë: “Më mirë vetëm sesa me gjithkënd, se të prishin punën.”

Partitë do duhej të përqendroheshin më shumë te njerëzit e sinqertë dhe kontribuues, me figura të reja.

Nuk ia vlen të shkosh në zgjedhje me kandidatë të korruptuar ose neglizhentë në punë. Disa prej tyre njihen nga e kaluara e tyre në pushtet, madje edhe si ministra, por që nuk kanë treguar sukses”, shtjelloi opinionisti.

Ndër të tjera, u shpreh skeptik se mund të ketë ndryshime të mëdha krahasuar me zgjedhjet e shkurtit.

“Nga kjo që thamë, mund të përfundojmë se ka pikëpyetje për ndonjë ndryshim të madh nga zgjedhjet e shkurtit.

Mirëpo, sido që të dalin, duket se janë të gatshëm për koalicione paszgjedhore në formimin e institucioneve. Kësaj radhe, më afër për koalicion do të jenë LVV dhe PDK. Me LDK janë ndarë keq në Qeverinë Kurti 1 dhe duket se ende nuk u ka kaluar inati”, përfundoi Gani Mehmeti për “Bota sot”.

Qarri: Shkuarjen në zgjedhje të reja, “aventurë” të panevojshm

Kurse, analisti politik, Gani Qarri vlerësoi se zgjedhjet e reja nuk ishin të nevojshme, pasi kjo erdhi si pasojë e mungesës së emancipimit politik të partive.

ImageGani QarriFoto galeri
Ai tha se subjektet politike e vendosën interesin personal para interesit shtetëror e atij të qytetarëve.

“Shkuarjen në zgjedhje të reja, ende edhe sot, e shoh si “aventurë” të panevojshme, të cilat iu imponuan Kosovës, pikërisht për shkak të mangësisë së theksuar të emancipimit politik të partive të inkriminuara politike dhe paaftësisë së tyre, për tu sjellë në mënyrë racionale e vepruar në bazë të parimeve institucionale, duke i vendosur interesat parciale të individëve dhe ato grupore e partiake, para interesave madhore të shtetit, shkaku i të cilëve, pas rreth një viti të humbur me ngërçe e bllokada të inskenuara, nga zgjedhjet e 9 shkurtit, procesi u rikthye serish në pikën zero.

Andaj për fatin e keq të taksapaguesve, shkaku i qytetarëve të pavetëdijshëm për dëmin që ata po i shkaktojnë këtij vendi, me votimin e individëve dhe partive të tilla, shtetit i Kosovës, përveçse po detyrohet ti financojë edhe bllokuesit e institucioneve dhe deputetët e shantazhuar partiak, për 0 kontribut dhe pa asnjë orë pune në Kuvend, po kurthohet edhe në ngërçe politike mbi 9 mujore, nga inskenimet e tyre, duke u detyruar, që brenda një vitit të shkojë 4 herë radhazi në zgjedhje”, nënvizoi analisti.

Madje, Qarri vlerëson se e njëjta situatë mund të na përsëritet edhe pas zgjedhjeve të 28 dhejtorit.

Në këtë pikë, ai shpreson se votuesit do vetëdijësohen sa i përket gjithë sitautës që u krijua këta muajt e fundit.

“Dhe krejt kjo, pothuajse kot së koti, e pa asnjë siguri politike, se edhe pas zgjedhjeve të reja të jashtëzakonshme, nuk do të ketë përsëritje të gjendjes tanimë të njohur të ngërçit, e cila na përcolli për mese 10 muaj me radhë, prodhoi vetëm bllokadë të pazgjidhur politike dhe krizë të vazhdueshme institucionale.

Prandaj, uroj që votuesit e vetëdijesuar të cilët kanë marrë mësim nga gjendja kaotike e krijuar për 9 muaj me radhë, me votën e tyre, përfundimisht të sjellin ndryshimet e nevojshme për krijimin e institucioneve shtetërore, pa vonesa, e kalkulime partiake dhe inskenime tjera për shtyrje e zhargitje, në mënyrë që të mundësohet formimi i institucioneve legjitime të shtetit, Kuvendit, Qeverisë dhe institucioneve tjera jetike, që me një kuvend dhe Qeveri legjitime të miratohet buxheti i shtetit për vitin 2026 dhe në mënyrë unanime të votohen edhe marrëveshjet ndërkombëtare, nga të cilat Kosova do të përfitonte mbi1.2 miliard euro, që për fat të keq nga inskenuesit e ngërçit politik dhe bllokuesit e krijimit të institucioneve legjitime të shtetit, edhe sot vazhdojnë të mbeten të bllokuara”, shpjegoi Qarri.

Tutje, analisti foli edhe për aderimet e fundit që ndodhën në partitë politike, e që sipas tij, ato nuk do i ndihmojnë edhe aq shumë.

Krahas kësaj, përmendi me emra disa nga lëvizjet në parti të ndryshme.

“Ndërsa sa i takon asaj, se partitë politike kohët e fundit kanë nisur edhe fushata aderimi e afrim të figurave të reja brenda strukturave të tyre, besojë se këto, nuk do të ndihmojë dhe aq, ngase votimi varet shumë edhe nga aftësia e partive politike për mobilizimin e votuesit të Kosovës, i cili tanimë, me plot të drejtë, ka krijuar bindje të plotë, se qëndrimet e partive të inkriminuara nuk mund të ndryshojnë sjelljet as qëndrimet bllokuese të dëshmuara për 9 muaj me radhë, vetëm pse aderuakan dikush në radhët e tyre, madje votuesit përqendrohen kryesisht te besimi që mund të kenë te kandidatët të cilët garojnë në zgjedhje dhe potenciali i deputetit të propozuar nga partitë, për përfaqësimin e interesave të qytetarëve, në mandatin e ardhshëm katër vjeçar.

Në anën tjetër, siç dihet mirëfilli ka edhe aderime të atilla si Nisma tek LDK, që shkaku i vendosjes së Limajt në Listën e Zezë të SHBA-ve, edhe vet PDK e kishte refuzuar aderimin e tij në këtë parti edhe pse Limaj deri vonë ishte pjesë e PDK-së, por për habi, Lumir bdixhiku, ai i cili ka përjashtuar aktivist shumëvjeçar dhe anëtar të mirënjohur të kryesisë qendrore dhe të Këshillit të Përgjithshëm të LDK-së, si Faton Bislimi, pranoi anëtarin e Listës së Zezë të SHBA-ve, Fatmir Limaj-n kokë më vete në LDK, ani pse, Nisma përveçse ishte një grupim pa domethënie politike dhe e dështuar në jetën parlamentare, me këtë aderim ka shkaktuar aq shumë shqetësim e kundërthënie edhe brenda vet partisë së Lumirit, sa që një aderim konfuz si ky, të cilin edhe PDK e kishte refuzuar, më shumë pritet ta dëmtojë, se sa ta ndihmojë LDK-në e Ibrahim Rugovës, gjë që besojë se do të dëshmohet më së miri në zgjedhjet e jashtëzakonshme, që tanimë janë caktuar të mbahen me 28 dhjetor në Kosovë”.

Në fund, ai kritikoi ashpër Abdixhikun dhe kalkulimet e tij politike.

“Krejt kjo dëshmon dobësinë dhe pasigurinë e madhe, që është krijuar tek partitë e inkriminuara, e veçanërisht te kreu i LDK-së, për arsye të sjelljeve bllokuese, veçanërisht te Lumir Abdixhiku & Co, që shkaku i kalkulimeve të gabuara politike lanë vendin edhe pa buxhet të miratuar dhe pa votimin e marrëveshjeve ndërkombëtare, me qëllim që të rrezikohet edhe funksionaliteti i shtetit, të nxitet shkaktimi i problemeve sociale dhe mundësisht të vije edhe deri te humbja e qindra miliona eurove të ndara nga BE dhe Banka Botërore, për Kosovën”, përfundoi Gani Qarri për “Bota sot”.