Një vit pas shpërthimit në Ibër Lepenc, Kurti për herë të parë zbulon detaje nga plani i grupit ekstremist

Kryeministri në detyrë i Republikës së Kosovës, Albin Kurti, ka kujtuar përmes një postimi në Facebook sulmin që ndodhi një vit më parë ndaj akuaduktit të Ibër Lepencit në fshatin Varagë të Komunës së Zubin Potokut. Ai e ka cilësuar këtë ngjarje si një sulm kinetik terrorist, të dytin me radhë në dy vite pas atij paramilitar në Banjskë të Zveçanit, dhe të parin e drejtuar ndaj infrastrukturës kritike të vendit.

Sipas Kurtit, shpërthimi me eksploziv ka dëmtuar rëndë pjesën fundore dhe njërën ballinë të akuaduktit, duke rrezikuar furnizimin me ujë për të gjithë konsumatorët që varen nga ky sistem, përfshirë edhe Termocentralin “Kosova B”.

Synimi i autorëve, sipas tij, ishte të shkaktonin pasoja të rënda: uljen për 60% të prodhimit të energjisë elektrike, ndërprerjen e furnizimit me ujë për komunat Mitrovicë, Skenderaj, Drenas, Vushtrri, Fushë Kosovë dhe gjysmën e Prishtinës, si dhe ndërprerjen e shërbimeve të ngrohtores qendrore dhe përgjysmimin e kapaciteteve telekomunikuese.

Kurti theksoi se reagimi institucional ishte i menjëhershëm dhe vendimtar për të parandaluar një krizë të madhe energjetike dhe humanitare. Falë veprimeve profesionale të institucioneve, pavarësisht dëmeve, është siguruar rrjedhja e mjaftueshme e ujit për ftohjen e termoelektranave dhe për furnizimin e banorëve me ujë të pijshëm.

Postimi i plotë:

Sot një vit më parë, rreth orës 19:00, akuadukti i Ibër Lepencit në Varagë të Komunës së Zubin Potokut ishte cak i një sulmi kinetik terrorist. Ky ishte sulmi i dytë i rëndë ndaj Republikës sonë nga aktorë të jashtëm në dy vite rresht, pas sulmit paramilitar në Banjskë të Zveçanit, dhe i pari ndaj infrastrukturës sonë kritike.

Si pasojë e shpërthimit me eksploziv, u dëmtua rëndë pjesa fundore dhe njëra ballinë e akuaduktit, duke rrezikuar kështu seriozisht furnizimin me ujë për të gjithë konsumatorët që shërbehen nga ky sistem, përfshirë këtu Termocentralin “Kosova B”.

Reagimi institucional ishte i menjëhershëm dhe kritik në parandalimin e pasojave katastrofike që kishte për qëllim sulmi: uljen për 60% të kapaciteteve prodhuese të energjisë elektrike, ndërprerjen e furnizimit me ujë për komunën e Mitrovicës, Skenderajt, Drenasit, Vushtrrisë, Fushë Kosovës dhe gjysmës së Prishtinës, ndërprerjen e shërbimeve të ngrohtores qendrore në kryeqytet dhe përgjysmimin e kapaciteteve telekomunikuese në vend si pasojë e mungesës së energjisë elektrike në stacionet bazë.

Veprimet profesionale dhe të suksesshme të institucioneve siguruan që, përkundër dëmit fizik dhe përgjatë gjithë procesit të riparimit, të ketë rrjedhje të mjaftueshme të ujit për ftohjen e termoelektranave dhe mirëmbajtjen e prodhimit të energjisë elektrike, si dhe furnizim me ujë të pijshëm për banorët e komunave të prekura.

Në afat rekord prej vetëm një muaji akuadukti i dëmtuar u rindërtua, rrjedha e ujit bashkë me sistemin u rikthyen në kapacitete të plota operative. Përgjigjja jonë dëshmoi aftësinë e lartë reaguese të ndërmarrjeve publike dhe institucioneve shtetërore. Shteti dhe Republika triumfuan përsëri përballë grupeve ekstremiste dhe terroriste që mbështetjen e financimin e gjejnë te Beogradi zyrtar, e inspirimin dhe metodat i gjejnë te Rusia – sulmi ndaj infrastrukturës kritike në Ibër Lepenc i ngjasonte sulmeve ruse ndaj rrjetit energjetik të Ukrainës.

Pas bastisjeve në veri të Kosovës, në lidhje me këtë sulm, ishin konfiskuar armë, uniforma dhe pajisje të ndryshme, si dhe ishin gjetur emblema ruse dhe serbe të strukturave të inteligjencës, ushtrisë dhe sigurisë. Edhe sot, ato janë dëshmi të qarta për përfshirjen e grupeve ekstremiste dhe terroriste serbo-ruse, me lidhje të forta në Serbi, që synim e kanë destabilizimin e vendit tonë dhe krijimin e një mjedisi të pasigurt në rajon.