Afati në KQZ mbyllet nesër – Haziri: Bashkëpunimet LVV, LDK e PDK me parti të vogla janë të pritshme

Meqë zgjedhjet e jashtëzakonshme parlamentare do të mbahen më 28 dhjetor, dinamika e bisedimeve ndërpartiake është intensifikuar.

Burime politike flasin për lëvizje të shumta në prapaskenë, pasi afati për deklarimin e koalicioneve në KQZ mbyllet nesër, duke i shtyrë partitë e mëdha dhe të vogla të përmbyllin marrëveshjet e mundshme.

Në një prononcim për “Bota sot” analisti politik, Nexhat Haziri, është shprehur se prirja e forcave kryesore politike për t’i afruar partitë e vogla është shndërruar në një normë të pashmangshme elektorale.

“Është normale që partitë e mëdha si LDK-ja, por edhe LVV dhe PDK, të synojnë që në listat e tyre të kenë edhe parti të vogëla politike si NISMA dhe të tjerat, përtej idologjisë politike dhe programeve. për të vetmin qëllim, që të mbledhin sa më shumë vota. Dhe ky “normalitet” nese mund të themi, është rezultat i asaj që ne akoma nuk kemi një skenë politike që është profilizuar në bazë të ideologjive politike e programore, pra në blloqe: e diathta dhe e majta”, ka thënë ai.

Sipas Hazirit, edhe pse LVV identifikohet si parti e majtë, ajo bashkëpunon me subjekte të cilat deklarohen të djathta; e njëjta situatë shihet edhe te PDK-ja dhe partitë e tjera të mëdha.

Ky fenomen, sipas tij, tregon një realitet politik ku pragmatizmi elektoral mbizotëron mbi vijat programore.

“Shembull në LVV si parti e majtë, qeverisë dhe garon bashkë me disa subjekte të vogëla të cilat thonë apo deklarohen se janë të djathta, njëjtë është me PDK-në, etj. Ndërsa sa i përket asaj që a mund t’i kushtojë LDK-së te elektorati i saj tradicional bashkëpunimi me NISMA-n dhe futja e saj në listën e përbashkët, nuk mendoj se mund të ketë ndonjë dëm, përshkak se siç e thashë edhe më parë, këto bashkëpunime janë kthyer në diçka normale”, ka përfunduar Haziri.