Heqja e masave të BE-së ndez skenën politike: PDK flet për “kompromis”, Guxo e ekspertët flasin për progres të Qeverisë Kurti

Në qershor 2023, Bashkimi Evropian vendosi masa kufizuese ndaj Kosovës, pas përshkallëzimit të tensioneve në veriun me shumicë serbe. Vendimi erdhi pas shqetësimeve për rritjen e aktivitetit të strukturave ilegale, mungesën e kontrollit institucional dhe tensionet që kërcënonin stabilitetin në rajon.

Masat përfshinin ndalime udhëtimi për individë të përfshirë në këto aktivitete dhe pezullimin e disa fondeve dhe projekteve të BE-së, me qëllim që të ushtronte presion mbi Prishtinën për të vendosur rend dhe ligjshmëri, veçanërisht në komunat veriore.

Kurse nga ana tjetër deputeti i PDK, Artan Behrami, ka thënë se me 15 dhjetor do të hiqen pothuajse të gjitha masat kundër Republikës së Kosovës.

Ai akuzon kryeministrin në detyrë, Albin Kurtin se pranoi amnesti për Listën Serbe në këmbim të heqjes së sanksioneve të BE-së.

Rexhepi: Pjesë e një narrative politike sesa një pasqyrim faktik i procesit

Anëtari i Guxo, Agim Rexhepi në një përgjigje për “Bota sot”, thekson se deklaratat e Artan Behramit të PDK-së për heqjen e masave më 15 dhjetor dhe “amnestinë” e Listës Serbe janë narrative politike, jo faktike.

Sipas tij, heqja e masave nga BE-ja reflekton progresin e institucioneve të Kosovës, veçanërisht në veri, ku është vendosur rendi, ligjshmëria dhe transparenca.

“Deklaratat e deputetit të PDK-së, Artan Behrami, lidhur me heqjen e masave më 15 dhjetor dhe pretendimet për “amnesti” të Listës Serbe, duken më shumë si pjesë e një narrative politike sesa një pasqyrim faktik i procesit. Heqja e masave nga BE-ja nuk ka ardhur si rezultat i ndonjë lëshimi ndaj strukturave ilegale në veri, por si njohje e progresit të institucioneve të Kosovës, sidomos në pjesën veriore ku për herë të parë po vendoset rend, ligjshmëri dhe transparencë.

Qeveria Kurti nuk ka bërë “amnesti”, por ka konsoliduar sovranitet

Në veri janë ndërmarrë hapa që qeveritë paraprake nuk kanë guxuar t’i ndërmarrin: Vendosja e rendit dhe kontrollit institucional në të gjitha komunat veriore, Çmontimi i strukturave ilegale të sigurisë, Transparencë shumë më e madhe në proceset administrative dhe zgjedhore.

Këto nuk janë lëshime janë forcim i shtetit.

Heqja e masave nga BE-ja është rezultat i punës së institucioneve

Nëse BE ka vendosur të heqë masat, kjo është sepse: stabiliteti në terren është përmirësuar, institucionet e Kosovës kanë demonstruar kontroll dhe përgjegjësi, dialogu është rikthyer në një kornizë më konstruktive.

Këto janë indikatorë pozitivë, jo pasoja e “kompromiseve të dëmshme”, thotë ai.

ImageAnëtari i Guxo, Agim RexhepiFoto galeri
Rexhepi thekson se çdo sukses i qeverisë shpesh interpretohet si kompromis për arsye politike, duke u injoruar progresi në veri.

Ai nënvizon se realiteti tregon të kundërtën: qeveria Kurti ka fuqizuar sovranitetin në veri, ka rritur praninë institucionale, ka zvogëluar kriminalitetin e lidhur me struktura ilegale dhe ka përmirësuar standardet e proceseve zgjedhore dhe administrative.

Ekziston një tendencë për ta sulmuar Kurtin edhe për rezultate pozitive

“Në skenën politike të Kosovës shpesh ndodh që: çdo hap pozitiv i qeverisë interpretohet si “kompromis”, progresi në veri nuk pranohet publikisht për arsye të betejave partiake, opozita tenton të ndërtojë narrativa që minimizojnë sukseset, për të krijuar përfitim politik.

Në vend që të pranohet qartësisht se veriu sot është më i qetë, më i kontrolluar dhe më i integruar në institucionet e Kosovës, krijohen akuza të sajuara për të zbehur arritjet.

Realiteti në veri flet vetë

Faktet tregojnë që: Qeveria Kurti ka bërë më shumë për funksionalizimin e sovranitetit në veri sesa cilado qeveri e pasluftës, Është rritur prania institucionale, Kriminaliteti i lidhur me struktura ilegale është zvogëluar, Proceset zgjedhore dhe administrative po zhvillohen me standarde më të larta se më parë.

Këto janë zhvillime që meritojnë vlerësim, jo manipulim politik”, përmbyll ai.

Voca: Heqja e masave të BE-se që kanë ndikuar negativisht në Kosovë, është një hap drejt normalizimit

Njohësi i politikës, Mirsad Voca vëren se veprimet që sjellin stabilitet shpesh interpretohen si kompromis, ndërsa konflikti politik lavdërohet.

Ai thekson se heqja e masave të BE-së është një hap drejt normalizimit dhe përmirësimit të marrëdhënieve ndër-etnike dhe ndërkombëtare, por shpesh injorohet ose keinterpretohet.

Sipas tij, opozita dhe publiku duhet të vlerësojnë arritjet konkrete të qeverisë, pa i përdorur ato për polemikë.

“Në analizë politike, shpesh hasim një paradoks intrigues : veprimet që sjellin stabilitet, mirëqenie dhe rezultate konkrete shpesh interpretohen si kompromis, ndërsa retorika e fortë, përplasjeja dhe konflikti politik lavdërohen. Heqja e masave të BE-se që kanë ndikuar negativisht në Kosovë, është një hap drejt normalizimit, një përpjekje për të krijuar ekuilibër dhe për të lehtësuar marrëdhëniet ndër etnike dhe ndërkombëtare. Dhe megjithatë, shumë herë ky lloj progresi kalon pa u vënë re ose, më keq, interpretohet si diçka për t’u akuzuar.

Ky fenomen na detyron të pyesim: pse politika sidomos tani në Kosovë ka një instinkt të natyrshëm për të parë çdo sukses të kundërshtarit si kompromis ose dobësi? A nuk duhet të jetë roli i opozitës, por edhe i publikut, të njohë rezultatet konkrete dhe të reflektojë mbi arritjet e qeverisë, pa e përdorur çdo hap pozitiv si pretekst për polemikë?”, shprehet ai për gazetën.

ImageNjohësi i politikës, Mirsad VocaFoto galeri
Voca thekson se veprimet e qeverisë në veriun e Mitrovicës tregojnë përpjekje reale për bashkëpunim dhe stabilitet, jo vetëm retorikë. Ai nënvizon se politika duhet të vlerësojë progresin dhe të sjellë mirëqenie, jo të interpretojë çdo sukses si kompromis.

Sipas tij, sfida është të ndryshohet perceptimi i politikës, duke e parë atë si mjet shërbimi për qytetarët dhe ndërtim të një shoqërie më të fortë dhe të drejtë.

“Veprimet në veriun e Mitrovicës janë shembull i qartë se si qeveria ka mundur të ndërtojë ura bashkëpunimi, edhe ne rrethana të vështira. Përpjekjet për të menaxhuar marrëdhëniet me komunitetin serb dhe për të krijuar një hapësirë më të qëndrueshme politike janë të dukshme për ata që duan të shohin realitetin, jo vetëm retorikën. Këtu lind një pyetje më e thellë: a është politika vetëm një garë për fuqinë e fjalëve dhe për sulmet ndaj kundërshtarit, apo mund të jetë gjithashtu një art i njohjes së rezultateve dhe i vlerësimit të progresit real?

Një politikë e shëndetshme nuk duhet të jetë një fushë beteje ku çdo sukses interpretohet si kompromis por ajo duhet të jetë një mekanizëm që synon të sjellë mirëqenie, të adresojë sfidat reale dhe të krijojë stabilitet për qytetarët. Përpjekjet që sjellin përparim duhet të përshëndeten dhe të vlerësohen, jo të përdoren si argument për polemikë.

Në fund, pyetja më e rëndësishme mbetet: si mund ta ndryshojmë mënyrën e perceptimit të politikës, që të mos shohim çdo veprim pozitiv si kompromis, por si mundësi për të ndërtuar një shoqëri më të fortë, më të qëndrueshme dhe më të drejtë? Kjo është sfida që nuk i takon vetëm qeverisë, por të gjithë atyre që e shohin politikën si një mjet shërbimi për njerëzit dhe shoqërinë dhe jo si arenë për sulme të pafundme” – deklaroi ai për “Bota sot”.