A po shkon LDK drejt zhveshjes nga rugovizmi?

Si ndryshoi klima politike në kryeqytet dhe pse figura e Përparim Ramës po shihet si shpresa e vetme për ringritje

Në kryeqytet po vërehet një lëvizje e qartë e opinionit politik. Qytetarët e Prishtinës, por edhe më gjerë në Kosovë, po shprehin gjithnjë e më shumë pakënaqësi ndaj udhëheqjes aktuale të LDK-së. Debati i brendshëm është ashpërsuar sidomos mes rugovistëve tradicionalë, të cilët thonë se orientimi i partisë është larguar nga rrënjët e saj.

Qytetarët po mendojnë ndryshe për Lumir Abdixhikun

Qytetarët e Kosovës, veçanërisht ata të kryeqytetit, kanë filluar të mendojnë ndryshe për liderin aktual, Lumir Abdixhikun, të cilin rugovistët e quajnë “Dada Lume”. Sipas tyre, ai është dashur të japë dorëheqje dhe t’ia lërë drejtimin e partisë atij që e fitoi Prishtinën në dy mandate, Përparim Ramës, në mënyrë që LDK të ketë mundësinë të ringrihet dhe të shpëtohet politikisht.

Dorëheqja e “dadushes nga Presheva” nuk pritet të ndodhë, pasi “Dada Lume” tashmë e ka shtruar, sipas kritikëve, rrugën e re të quajtur lumizëm. Kjo qasje, sipas tyre, mund t’i kushtojë shumë shtrenjtë LDK-së në zgjedhjet e ardhshme.

Zgjedhjet e 28 dhjetorit 2025: rreziku i rishfaqjes së të njëjtit rezultat

Zgjedhjet do të mbahen më 28 dhjetor 2025, dhe vlerësimet e shumë anëtarëve tregojnë se LDK-ja rrezikon të mbetet sërish partia e tretë. Kritikat thonë se Abdixhiku po vazhdon të ndjekë rrugën politike të mësuesit të tij, Isa Mustafës, i cili për më shumë se një dekadë pësoi humbje të njëpasnjëshme zgjedhore, ndërsa deklaronte se ishte fitues, duke e çuar partinë në pozicione të pafavorshme dhe duke e bërë pjesë të aleancave që dëmtonin identitetin rugovist.

“Kuca dhe kica”: kritika të brendshme për mungesë guximi politik

Po të kishin vetëm pak fytyrë “kuca dhe kica”, thonë kritikët brenda partisë, ata do t’ua lironin rrugën të tjerëve. Së paku para zgjedhjeve do ta thërrisnin Kuvendin dhe do ta emëronin si të parin e partisë Përparim Ramën, Ymri Ahmetin apo edhe Anton Çunin.

Sipas tyre, kryetar deri në kalimin e zgjedhjeve të 28 dhjetorit duhej të ishte ai që e ka fituar kryeqytetin në dy mandate. Por, nga frika e “kuces” se po i ikë “kica”, askush nuk po e ndërmerr hapin. Edhe nëse LDK bie nën 10%, thonë ata, ai do të luftojë si luan për të mos ia kafshuar “kicën” “zagart” tjerë.

Përparim Rama – emri që po qarkullon gjithnjë e më shumë në terren

Sa herë që dal në qytet, dëgjoj se Përparim Rama ka filluar të shihet si lideri që mund të hyjë në betejë për të parin e LDK-së. Sipas Kadri Kryeziut, edhe britanikët janë pozicionuar fuqishëm prapa tij si kandidat serioz për drejtimin e partisë.

Nuk ka më asnjë dyshim, thotë Kryeziu, se me zgjedhjen e Ramës si kryetar, në LDK do të rikthehen dinamika krijuese dhe energjia që ka munguar prej vitesh. Të njëjtën e mendoj edhe unë: nëse nuk doni t’i humbni rugovistët, kështu duhej të veprohej.

LDK gjendet në një udhëkryq historik. Zgjedhjet e 28 dhjetorit 2025 mund të jenë momenti i fundit për të rikthyer rrugën rugoviste ose për të thelluar edhe më shumë krizën e brendshme. Emrat, debatet dhe pakënaqësitë janë në rritje—por mbetet të shihet nëse do të ketë guxim politik për ndryshim, apo nëse partia do të vazhdojë rrugën e humbjeve të njëpasnjëshme.