Mesazhet e von der Leyen, eksperti austriak ‘zbërthen’ prapaskenat – ka një thirrje të fortë për liderët e Kosovës

Gjatë një vizite zyrtare në Prishtinë, Presidentja e Komisionit Evropian, Ursula von der Leyen, ka përcjellë mesazhe të qarta për të ardhmen evropiane të Kosovës.

Përmes një postimi në platformën X (ish-Tëitter), ajo ka theksuar përkushtimin e Bashkimit Evropian për integrimin e plotë të të gjitha vendeve të Ballkanit Perëndimor në BE, duke nënvizuar se Kosova duhet të vazhdojë rrugën e reformave dhe të konsolidojë institucionet demokratike.

Von der Leyen ka bërë thirrje për uljen e tensioneve të brendshme dhe për përmbylljen e hapave të nevojshëm drejt integrimit evropian, duke theksuar se ndërtimi i institucioneve të forta është çelësi për progres

E në lidhje me këtë çështje, për “Bota sot” foli eksperti austriak, Gunther Fehlinger.

Si fillim, ai tha se se mesazhet e Leyen nuk duhet parë si paralajmërim, por si inkurajim, pasi BE po jep sinjal që e ardhmja e Kosovës është evropiane.

ImageGunther Fehlinger.Foto galeri
Krahas kësaj, Fehlinger vlerësoi se Kosova ka shënuar arritje të mëdha që nga shpallja e pavarësisë, por tani po vjen faza vendimtare.

“Tre mesazhet e Presidentes Ursula von der Leyen për Kosovën — forcimi i institucioneve, ulja e tensioneve dhe përshpejtimi i rrugës evropiane — duhet të kuptohen si inkurajim, jo si paralajmërim. Bashkimi Evropian po sinjalizon se e ardhmja e Kosovës është evropiane, por kjo e ardhme varet nga udhëheqja e përgjegjshme, uniteti dhe reformat.

Kosova ka arritur tashmë përparim mbresëlënës që nga shpallja e pavarësisë — demokraci, orientim euroatlantik dhe lidhje të forta me Shtetet e Bashkuara. Por tani vjen faza vendimtare: të kalojë nga potenciali në anëtarësim. Kjo do të thotë të realizojë sundimin e ligjit, reformën në drejtësi, qeverisjen transparente dhe modernizimin ekonomik për të përmbushur standardet e BE-së. Sa më të forta të jenë institucionet e Kosovës, aq më shpejt do të hapen dyert evropiane”, nënvizoi ai.

Në këtë pikë, eksperti austriak përmendi tensionet mes Kosovës dhe Serbisë, e që si zgjidhje të vetme për këtë situatë, e konsideron njohjen e plotë të Kosovës nga shteti serb dhe shtetet anëtare të BE-së.

“Pengesa më e madhe për uljen e tensioneve politike dhe ndëretnike është mungesa e besimit — brenda Kosovës dhe ndërmjet Kosovës dhe Serbisë. Beogradi ende refuzon të njohë sovranitetin e Kosovës dhe pjesë të bashkësisë ndërkombëtare hezitojnë ta trajtojnë Kosovën si të barabartë. Kjo ushqen pasigurinë dhe minon bashkëpunimin. Zgjidhja e vetme është njohja e plotë e Kosovës nga Serbia dhe nga të gjitha shtetet anëtare të BE-së — dhe fillimi i menjëhershëm i Planit të Veprimit për Anëtarësim në NATO dhe statusit të kandidatit për BE për Kosovën, si dhe anëtarësimi në NATO. Këto hapa do ta stabilizonin rajonin më shumë se sa dialogu teknik i dështuar dhe i njëanshëm ndonjëherë mund të bëjë”, nënvizoi Fehlinger.

Po ashtu, ai kishte një mesazh për liderët e Kosovës, e që kishte të bëj me reformat, modernizimin dhe një koalicion gjithëpërfshirës mes partive shqiptare.

“Qeveria e Kosovës duhet të vazhdojë të veprojë me përmbajtje, profesionalizëm dhe vetëbesim evropian — por nuk duhet të pranojë leksione nga ata që ende mbrojnë politikat koloniale hibride dhe armiqësore të Serbisë. Kosova është shoqëria më pro-evropiane dhe më pro-amerikane në Ballkan. Ajo meriton të njëjtin respekt dhe të drejta si çdo vend tjetër që aspiron anëtarësimin në BE.

Pra, mesazhi im për liderët e Kosovës është i qartë:

Vazhdoni reformat. Vazhdoni modernizimin. Mbani kursin evropian dhe ndërtoni një koalicion të ri gjithëshqiptar tani për të ecur përpara.

Por gjithashtu, kërkoni drejtësi: asnjë zgjerim i BE-së pa Kosovën”.

Ndër të tjera, eksperti austriak, shtoi se, ka ardhur koha qe BE dhe NATO ta trajtojnë Kosovën si partner dhe jo si problem.

Sipas tij, Kosova nuk është “fëmijë i braktisur”, por shtet me të ardhme të mirë, ekonomi të lartë dhe institucione funksionale.

“Kosova duhet të anëtarësohet në BE në vitin 2029 së bashku me Shqipërinë, Malin e Zi, Maqedoninë e Veriut dhe Bosnjën — në një paketë të vetme, me vetëm Serbinë të mbetur jashtë dhe e izoluar si një zonë okupuese ruse në Ballkan, si Bjellorusia e Ballkanit.

Ka ardhur koha që BE-ja dhe NATO-ja ta trajtojnë Kosovën jo si një problem për t’u menaxhuar, por si një partner për t’u integruar në vitin 2026 nga Presidenti Trump së bashku me Bosnjën, për ta bërë të sigurt nga agresioni serb.

Fati i Kosovës është në Evropë — dhe besueshmëria e Evropës varet nga suksesi i Kosovës.

Kosova nuk është fëmija i braktisur i BE-së, por një anëtare e ardhshme krenare me një ekonomi të fortë, institucione funksionale dhe një kontribut të mirë në sigurinë evropiane kundër agresionit rus dhe serb”, përmbylli Gunther Fehlinger për “Bota sot”.