Katër arsye pse qytetarët nuk duhet ta votojnë sërish Agim Aliun

Nëse një kryetar komune matet me punët që ka bërë për qytetarët, atëherë Agim Aliu nuk ka asnjë arsye të rikthehet në krye të Ferizajt. Katër arsye madhore mjaftojnë për ta bindur secilin qytetar pse ky model qeverisjeje duhet të marrë fund.

Së pari, uji i pijshëm. Në vitin 2025 të flitet ende për mungesë të ujit në familjet e Ferizajt është turp i madh. Ndërkohë që bota përparon me teknologji, ne në Ferizaj ende përballemi me reduktime të përditshme. Kjo tregon se menaxhimi i resurseve më elementare ka dështuar plotësisht.

Së dyti, arsimi i kapur. Shkollat janë kthyer në terren politik, ku emërimet, drejtorët dhe mësimdhënësit shpesh zgjidhen jo për profesionalizëm, por për besnikëri partiake. Kështu sakrifikohet e ardhmja e brezave të rinj për interesa të ngushta të pushtetit lokal. Një shoqëri pa arsim cilësor është një shoqëri e cila e ka humbur orientimin.

Së treti, ndërtimet pa kritere. Ferizaj sot është shembull i një kaosi urbanistik. Çdo ditë shohim ndërtesa të ngritura pa plan, pa vizion, pa kritere. Qyteti nuk ka asnjë identitet estetik, trafiku është i bllokuar, rrugët janë të ngushta dhe hapësira publike është shkatërruar. Kjo nuk është zhvillim, kjo është shkatërrim i planifikuar.

Së katërti, hapësirat e gjelbra. Premtimet për parqe dhe ambiente të gjelbërta kanë mbetur në letër. Fëmijët e Ferizajt sot nuk kanë ku të luajnë, të rinjtë nuk kanë hapësira për rekreacion, të moshuarit nuk kanë ambiente për qetësi. Në vend të gjelbërimit, qyteti po mbytet në beton, pluhur dhe ndotje.

Këto katër arsye janë të mjaftueshme për të treguar se Agim Aliu nuk i ka sjellë zhvillim Ferizajt, por vetëm ngecje dhe zhgënjim. Vota për të do të thotë vazhdim i problemeve të njëjta, ndërsa mosvotimi është shansi i qytetarëve për të thënë mjaft më!