Shkëlzen Gashi: Opozita po e bllokon Kosovën, opozita e zhbllokon Kosovën, ama mbasi…

Analisti Shkëlzen Gashi ka reaguar pas dështimit për zgjedhjen e nënkryetarit të Kuvendit nga radhët e komunitetit serb. Ai ka thënë se opozita po e cilëson këtë pozitë si të parëndësishme, por megjithatë po refuzon ta votojë as Nenad Rašić-in e as Igor Simić-in, duke e lënë Kosovën të bllokuar.

Sipas tij, opozita po akuzon kryeministrin Albin Kurti për populizëm, por vetë po bie pre e kësaj qasjeje, ndërkohë që pretendon se Kurti nuk i ka numrat për formimin e qeverisë. Gashi thekson se opozita po shmang zgjedhjet nacionale, duke pritur më parë rezultatet e zgjedhjeve lokale, me shpresën për të fituar më pas kundër Kurtit.

“Pra, opozita po e bllokon Kosovën dhe synon ta zhbllokojë vetëm pas zgjedhjeve lokale,” ka shkruar Gashi.

Postimi i plotë:

kush po e bllokon kosovën?

‘opozita’ po thotë se është blloku kosova për një pozitë të parëndësishme, siç është pozita e nënkryetarit të kuvendit të kosovës nga radhët e komunitetit sërb. e saktë. po pse ‘opozita’ nuk po e zhbllokon kosovën tu e votu për këtë pozitë të parëndësishme nenad rašić-in ose igor simić-in?

‘opozita’ po e cilëson krejt këtë bllokadë si “çmenduni të popullizmit të albin kurtit”. nëse ‘opozita’ nuk don me votu nenadin sepse zgjedhja e tij është kundër kushtetutës, atëherë le ta voton igorin. pse ‘opozita’ po bjen pre e “çmendunisë së popullizmit të albin kurtit”?

‘opozita’ po pretendon që albin kurti e ka uzurpu pozitën e kryeministrit dhe po e dëmton kosovën; po ashtu, ‘opozita’ është e bindun që albin kurti nuk i ka numrat për me themelu qeverinë. atëherë, ‘opozita’ le ta votojë nënkryetarin nga radhët e komunitetit sërb (ja igorin, ja nenadin) dhe meqenëse kurti nuk i ka numrat për me themelu qeverinë, radha i vjen ‘opozitës’ për me themelu qeverinë e kosovës dhe ndalet dëmi që albin kurti po ia shkakton kosovës.

e nëse as ‘opozita’ s’i ka numrat për me themelu qeverinë, shkojmë në zgjedhje nacionale. por, jo, ‘opozita’ s’po don me shku në zgjedhje nacionale pa u kry zgjedhjet lokale sepse po shpreson që i fiton zgjedhjet lokale, e mandej shkojmë në zgjedhje nacionale dhe e mposhtin albin kurtin.

pra, ‘opozita’ po e bllokon kosovën. ‘opozita’ e zhbllokon kosovën, ama mbasi të kryhen zgjedhjet lokale.