“Krenari shqiptare në ring: Ardian Krasniqi mes më të mirëve në botë – titulli botëror më afër se kurrë”

Boksieri gjermano-shqiptar Ardian Krasniqi, kampion interkontinental i WBO-së, ka hyrë zyrtarisht në mesin e më të mirëve në botë duke u renditur në vendin e 8-të në ranglistën prestigjioze të WBO-së në peshën gjysmë të rëndë.

Ky sukses e afron 28-vjeçarin një hap më pranë ëndrrës së tij për titull bote. Kampioni aktual i botës në këtë peshë është rusi Dmitry Bivol, një nga emrat më të fuqishëm të boksit botëror. Krasniqi synon të mbrojë titullin interkontinental dhe të fitojë të drejtën për një duel me Bivol-in.

Hapi i radhës për të do të jetë më 13 dhjetor 2025, kur në SCHA-Arena të Stuttgartit do të zhvillohet spektakli i madh “Showdown for Legacy 3”, organizuar nga Primetime Promotion. Mbrëmja do të sjellë rreth 10 duele profesioniste, mes tyre tre për tituj dhe një kampionat bote.

Stuttgart ka një histori të madhe për boksin shqiptar: aty edhe legjenda Luan Krasniqi, xhaxhai i Ardianit, ka shkruar faqet më të ndritura të karrierës së tij. Tani historia vazhdon me gjeneratën e re të familjes Krasniqi.

Ardian Krasniqi deklaroi:

“Të jem numri 8 në botë është një nder i madh, por edhe një përgjegjësi. Kam 16 vite që punoj për këtë moment, por ëndrra ime e madhe mbetet një duel për titull bote. Në dhjetor do të tregoj se jam gati për sfidat më të mëdha.”