“Fitoi injoranca, s’jemi të lumtur, magar”, kritikohet gjuha linçuese ndaj Dimal Bashës: Snajperi është te…!

Gashi: Ky linçim është dëshmi e panikut të vjetër politik e mediatikHalilaj: “Çdo përpjekje për denigrim vetëm sa e forcon bindjen se Vetëvendosja është në rrugën e duhur
Dimal Basha tashmë kryetar i Kuvendit të Kosovës, nuk është duke iu ‘pëlqyer’ opozitës.

Që nga marrja e postit, Basha është bërë cak i sulmeve si nga gazetarë e analistë, ashtu edhe nga deputetë e kryetarët e partive.

Lumir Abdixhiku, kryetar i LDK-së, zgjedhjen e tij e konsideroi fitore të injorancës, madje e cilësoi si një gabim i pafalshëm i mbështetësve të saj.

“Kosova, siç se kishim menduar asnjëherë. Një fitore e injorancës dhe një gabim i pafalshëm i mbështetësve të saj.

Gjithsesi ky është niveli i tyre. Kështu e projektojnë Republikën. Me këto vlera kanë zgjedhur të nderojnë dhe votuesit e popullin e Kosovës”, shkroi Abdixhiku pas zgjedhjes së tij.

Ndërsa, kryetari i PDK-së, Memli Krasniqi, përkundër që një pjesë e partisë së tij e votuan deklaroi se nuk është i lumtur që Dimal Basha u bë kryeparlamentar.

Ai madje shkoi më larg duke lexuar fytyrat e deputetëve të LVV-së dhe duke thënë se as ata nuk janë të lumtur për këtë.

“Në një situatë normale, në një botë paralele asnjëherë nuk do ta votonim dikë si Dimali në krye të Kuvendit. A jemi të lumtur që është Dimal Basha kryetar? S’besoj që janë të lumtur as deputetët e Vetëvendosjes. Ju i patë me fytyra të varura sepse ndoshta s’kanë besuar as që bëhet”, kishte thënë pos tjerash Krasniqi.

Ndërsa, deputeti i partisë së tij nuk nguroi ta krahasojë Bashën me kafshë.

“Është për të ardhur keq që VV vendos me qitë një propozim i cili i ka befasu edhe vetë ata, një njeri që besoj edhe votat e VV’së me dëshirë nuk do të shkonin për Dimal Bashën. Ne në ushtri e kemi një term i cili thotë ma mirë një luan me iu pri 100 magarëve se një magar 100 luanëve, Dimal Basha me qenë i pari i kuvendit mendoj që është fyerje për votuesit e VV’së dhe për votuesit e krejt Kosovës”, kishte shkruar deputeti i PDK-së, Jakup Nura.

Bullizime e gjuhë linçuese ndaj Dimal Bashës nuk kanë nguruar të përdorin edhe gazetarët e analistët që njihen të afërt me opozitën, të cilët kritikuan kryeparlamentarin si për nga shkollim, për nga veshjet dhe statuset e tij në rrjetin social Facebook vite më parë.

Linçohet simboli i një brezi që nuk ka kompromise të pista, dosje shantazhi e borxhe

Opinionisti Lirim Gashi, në një prononcim për gazetën “Bota sot”, thotë se linçimi publik i Dimal Bashës është proces i orkestruar me kujdes, ku përzihen frika nga e vërteta.

Sipas tij, nuk po linçohet Dimal Basha si individ, por si simbol i një brezi që nuk ka dosje të shantazhueshme dhe nuk i ka borxhe askujt përveç popullit.

“Linçimi publik i Dimal Bashës nuk është reagim spontan i opinionit, por është një proces i orkestruar me kujdes, ku përzihen frika nga e vërteta, inati ndaj meritokracisë dhe urrejtja e atyre që shohin në çdo njeri të ndershëm një kërcënim për pushtetin e tyre të kalbur. Në fakt, nuk po linçohet Dimal Basha si individ, por si simbol i një brezi që nuk është pjellë e kompromiseve të pista, që nuk ka dosje të shantazhueshme dhe që nuk i ka borxh askujt përveç popullit që e ka zgjedhur. Ky linçim është dëshmi e panikut të vjetër politik e mediatik, që e ndien se ish pushteti i tij i rrenave po rrëzohet si kulla prej letre”, deklaron Gashi.

ImageOpinionisti Lirim GashiFoto galeri
Sipas tij, duke linçuar Bashën tentohet të sulmohet edhe Lëvizja Vetëvendosje.

“Sigurisht që po tentohet që duke e linçuar Bashën të sulmohet Vetëvendosja. Në këtë linçim, Basha është vetëm objektivi i parë i snajperit, ndërsa shënjestra e vërtetë është Vetëvendosja.

Sepse VV është e vetmja forcë politike që nuk e pranon lojën e vjetër të hajnave e servilëve, dhe për këtë arsye çdo figurë e saj, sidomos një figurë e re e padëmtuar si Basha, duhet demonizuar, përqeshur, ulur në baltë, në mënyrë që të dërgohet mesazhi i rremë: “ja, të gjithë janë njësoj.” Pra, synimi nuk është të rrëzohet një kryetar Kuvendi, por të relativizohet moraliteti i një subjekti politik që i ka deklasuar reçetat e pista të tranzicionit”, shprehet opinionisti.

Krahas kësaj, ai konsideron se në planin afatgjatë linçimi është autogol i madh për kundërshtarët e VV-së.

“Në planin afatshkurtër, linçimi mund të krijojë iluzionin e dëmit, sepse titujt e gazetave, portalet e kapura dhe rrjetet sociale janë të stuhishme e të pamëshirshme. Por në planin afatgjatë, ky linçim është autogol i madh për kundërshtarët e VV-së.

Sepse sa më shumë që i kthehen një të riu të pastër me fjalë të pista, aq më tepër e zbulojnë vetë pisllëkun e tyre. Publiku shqiptar ka një nuhatje të lindur për dallimin mes një figure që sulmohet pse është i dobët, dhe një figure që sulmohet pse është i fortë. Dimal Basha po sulmohet jo pse ka gabuar, por pse nuk është i kapshëm. Dhe kjo është fitore morale dhe politike për VV-në. Pra, linçimi i Dimal Bashës është pasqyrë ku shfaqet frika e ish establishmentit të pistë nga një politikë e pastër. Duke u përpjekur ta baltosin atë, kundërshtarët vetëm sa e bëjnë më të dukshëm dallimin mes botës së vjetër të korrupsionit dhe një brezi të ri që nuk pranon të ulet në tavolinën e pazareve. Në fund, linçimi do të përfundojë si një bumerang që kthehet me forcë shkatërruese tek ata që e kanë hedhur në ajër”, thekson Gashi.

Dimal Basha u zgjodh kryetar i Kuvendit të martën më 73 vota pro, 30 kundër, ndërsa tetë deputetë abstenuan.

Nëse ndalemi të biografia e tij, ai ka lindur më 12 tetor 1979 në Prishtinë dhe jeton në qytetin e Ferizajt.

Studimet e larta i ka përfunduar në “John Jay College of Criminal Justice” në Nju Jork, duke diplomuar me vlerësimin më të lartë në drejtimin “E Drejta Penale Ndërkombëtare.”

Basha, gjithashtu, ka përfunduar studimet Master në Marrëdhënie Ndërkombëtare, me fokus në “Konflikt dhe Siguri”, në Universitetin “The Neë School University”, po ashtu në Nju Jork.

Në politikë, ai ka shërbyer si deputet i Kuvendit të Republikës së Kosovës për dy mandate dhe tashmë është zgjedhur për herë të tretë.

Ai ka qenë anëtar në Komisionin për Punë të Jashtme, Komisionin për Legjislacion, Komisionin për Mbikëqyrjen e AKI-së dhe Komisionin për Stabilizim-Asociim.

Fushata linçimi si tentim për dobësimin e Lëvizjes Vetëvendosje

Avokati Gazmend Halilaj, linçimin ndaj Bashës e sheh si përpjekje për ta goditur Lëvizjen Vetëvendosje.

Halilaj në një prononcim për gazetën “Bota sot”, thotë se sulmet e orkestruara ndaj Bashës nuk kanë të bëjnë vetëm me figurën e tij, por për faktin se përfaqëson një gjeneratë të re politike, që po sjellë ndryshim.

“Në ditët e fundit, jemi duke parë një linçim publik ndaj kryetarit të sapozgjedhur të Kuvendit, Dimal Basha. Ky linçim nuk është thjesht ndaj një individi, por bart qartë përpjekjen për të goditur Lëvizjen Vetëvendosje, si subjektin e parë politik të dalë nga zgjedhjet e 9 shkurtit. Është e qartë se sulmet e orkestruara ndaj Bashës nuk kanë të bëjnë vetëm me figurën e tij, por me faktin se ai përfaqëson fuqishëm një gjeneratë të re politike, e cila po sjell ndryshim dhe po sfidon interesat e vjetra të politikës së kapur. Kjo fushatë linçimi është tentim për ta dobësuar Lëvizjen Vetëvendosje në sytë e qytetarëve, por në të vërtetë po prodhon efekt të kundërt”, deklaron Halilaj.

ImageAvokati Gazmend HalilajFoto galeri
Sipas tij, këto linçime e bëjnë Lëvizjen Vetëvendosje më të fortë, më të vendosur dhe më të lidhur me qytetarët.

“Çdo përpjekje për denigrim vetëm sa e forcon bindjen se Vetëvendosja është në rrugën e duhur, sepse po goditet nga ata që nuk e duan ndryshimin. Ky presion i padrejtë vetëm sa e rrit solidaritetin e aktivistëve dhe simpatizantëve, duke e shndërruar linçimin e Bashës në një dëshmi të qartë se VV mbetet shpresa e vetme për një politikë të pastër dhe të drejtë. Lëvizja Vetëvendosje nuk është një parti që përkulet përballë sulmeve të padrejta. Përkundrazi, nga këto linçime del më e fortë, më e vendosur dhe më e lidhur me qytetarët. Historia na ka mësuar se kur të rinjtë e guximshëm sulmohen nga politika e vjetër, atëherë ndryshimi është i pashmangshëm. Prandaj, ky linçim nuk është humbje për Vetëvendosjen. Është fitore morale, fitore politike dhe një konfirmim se qytetarët janë me ata që po punojnë për drejtësi, barazi dhe zhvillim”, përfundon avokati.