Arrestimi për spiunazh i pilotit kroat dhe të dashurës serbe – eksperti paralajmëron rrjet më të gjerë serb në Ballkan, ja apeli për institucionet

Një grua serbe nga Mitrovica dhe i dashuri i saj, një anëtar i Forcave Ajrore të Kroacisë, janë arrestuar në Vis të Kroacisë nën dyshimin për spiunazh në favor të Serbisë.

Sipas raportimeve të mediave kroate, përfshirë “Index”, ndaj tyre është ngritur dyshimi se kanë shpërndarë informacione të klasifikuara në drejtim të Listës Serbe – përmes një rrjeti të mundshëm spiunazhi.

Hetimet janë duke u zhvilluar në bashkëpunim mes policisë kroate dhe Europol-it, ndërsa të dy të dyshuarit janë marrë në pyetje të mërkurën. Vendimi ndaj tyre pritet së shpejti nga autoritetet kompetente kroate.

Dyshohet se piloti kroat, i cili kishte shërbyer më herët edhe në kuadër të KFOR-it në Kosovë, i ka dhënë të dashurës së tij informacione konfidenciale në lidhje me lëvizjet e trupave të KFOR-it, si dhe me situatën në veriun e Kosovës – kryesisht në komunat me shumicë serbe.

Sipas burimeve të “Index”, piloti i dyshuar ka dhënë informacione specifike mbi zhvillimet në Zubin Potok, një nga zonat më të tensionuara në veri të Kosovës, e cila ka qenë shpesh skenë e protestave, bllokadave dhe përplasjeve ndërmjet serbëve lokalë dhe institucioneve të Kosovës, përfshirë edhe përfaqësuesit e KFOR-it dhe EULEX-it.

Gjithashtu, të dy të dyshuarit akuzohen për shkëmbim informacionesh në lidhje me transportin e Dejan Pantiqit, ish-polic i Kosovës, i cili ishte arrestuar për sulmet ndaj zyrave të KQZ-së në Mitrovicën e Veriut në fund të vitit 2022.

Eksperti i sigurisë, Fatjon Softa, thotë se ky është një rast serioz dhe ka të bëjë me rrjedhje të një informacioni sensitiv me karakter ushtarak.

ImageFatjon SoftaFoto galeri
Sipas tij, Serbia historikisht interesa strategjike të ndikojë në Kosovë.

“Arrestimi i pilotit kroat dhe të dashurës serbe për spiunazh është një rast serioz. Kemi të bëjmë me filtrat e sigurisë së një strukture si KFOR-i, që është një element sigurie për vetë Kosovën. Kemi rrjedhje të një informacioni sensitiv me karakter ushtarak.
Serbia ka historikisht interesa strategjikë të ndikojë në Kosovë përmes:
strukturave paralele në veri,
ndikimit përmes Kishës Ortodokse,
tentativave të shpeshta për destabilizim politik dhe social. Ky rast shihet nga shumë analistë si pjesë e një modeli të vazhdueshëm të shërbimeve sekrete serbe për të siguruar informacion dhe për të minuar besimin tek institucionet e Kosovës dhe NATO-s”, deklaron Softa për “Bota sot”.

Sipas tij, duhet hetuar jo vetëm individi i arrestuar, por edhe lidhjet e tij, kontaktet e mundshme brenda KFOR-it.

Një rrjet spiunazhi i Serbisë mund të jetë i shtrirë edhe në vende të tjera rajonale si Mali i Zi, Maqedonia e Veriut dhe Bosnja.
Duhet hetuar jo vetëm individi i arrestuar, por edhe lidhjet e tij, kontaktet e mundshme brenda KFOR-it. Kjo mund dhe duhet të bëhet në bashkëpunim me NATO-n.

Kosova duhet të investojë më shumë në kapacitete të kundërzbulimit për të parandaluar tentativa të tilla edhe në të ardhmen.
Ky arrestim është sinjal alarmi se Serbia nuk ka hequr dorë nga përpjekjet për të ndikuar e destabilizuar Kosovën, madje duke tentuar të depërtojë deri në strukturat më të ndjeshme ndërkombëtare si KFOR-I”, shprehet eksperti.

Sipas tij, institucionet e sigurisë në Kosovë nuk duhet të përqendrohen vetëm në veri, por duhet të forcojnë kundërzbulimin, të kërkojnë rishikimin e procedurave të sigurisë nga NATO.

“Për Kosovën, kjo do të thotë se institucionet e sigurisë nuk duhet të përqendrohen vetëm në veri, dhe në veçanti në fushën e inteligjencës. Institucionet duhet të forcojnë kundërzbulimin, të kërkojnë rishikim të procedurave të sigurisë nga NATO dhe të monitorojnë me kujdes personat që kanë qasje në informacione të klasifikuara.

Hetimi duhet të jetë selektiv, inteligjent dhe i bazuar në prova dhe nuk mund të vihen në dyshim strukturat e KFOR-it, por bashkëpunimet në fushën e inteligjencës dhe të kundërzbulimit duhet të jenë të pandërprera dhe të ngrihen në nivele të larta”, përfundon Softa.