NYC: Fushata për Kryetar Bashkie dhe mbështetja e komunitetit shqiptar për Curtis Sliwas
Më 26 gusht 2025, në “Stones Comedy Club” në Nju Jork, kandidati republikan dhe i pavarur Curtis Sliwa organizoi një takim për mbledhjen e fondeve për fushatën e tij për kryetar bashkie të qytetit. Ngjarja bashkoi mbi 100 mbështetës konservatorë dhe republikanë, përfshirë anëtarë të komunitetit shqiptar si Sejdi Hysenaj-vatran i hershëm, Diamant Hysenaj- kandidat republikan për në kongres, aktivistët Bernard Çela, Klevis Duri dhe Lonard Shuli, të cilët shprehën besimin se Sliwa mund të fitojë zgjedhjet e 4 nëntorit 2025.
Dynamikat politike dhe sondazhet deri tani nuk duken të favorshme për kandidaturat e tjera kundra Zohran Mamdamit
Megjithse, Sliwa shpreson të përfitojë nga ndarjet brenda Partisë Demokrate, veçanërisht pas fitores së Zohran Mamdani-t në primaret demokrate, i cili mbështetet nga figura të majta si Bernie Sanders dhe Alexandria Ocasio-Cortez.
Sipas sondazheve të fundit, Mamdani kryeson me 35% të mbështetjes, i ndjekur nga Andrew Cuomo (25%), Curtis Sliwa (14%), Eric Adams (11%) dhe Jim Walden (1%).
Trembëdhjetë për qind e votuesve janë të pavendosur.
Lidhja e kandidatit republikan dhe i pavarur Curtis Sliwa me komunitetin shqiptar në Nju Jork
Në një intervistë, të posaqme për INA, Sliwa na tregoi lidhjen e tij me shqiptarët përmes rrënjëve të familjes së tij nga Bari, Itali, një qytet me një komunitet të madh shqiptar.
“Gjyshi im, një marinar peshkimi, më tregonte për udhëtimet në ujërat shqiptare gjatë viteve 1940-1980,” tha Sliwa. Ai vlerësoi forcën dhe unitetin e komunitetit shqiptar në Nju Jork, duke përmendur mbështetjen e tyre gjatë protestave për mbrojtjen e statujës së Kristofor Kolombit në 2020. “Shqiptarët, muslimanë apo të krishterë, pasqyrojnë një shpirt të qëndrueshëm dhe krenar,” shtoi ai.
