Planet serbo-ruse/ Eksperti i sigurisë flet për tensionet aktuale – kështu e sheh situatën në veri të vendit!

Tensionet e fundit me arrestimin e ish-policit Arbnor Saliu nga Serbia, kanë rikthyer nevojën për vëmendjen e bashkësisë ndërkombëtare drejt marrëdhënieve Kosovë-Serbi.

Ndërhyrja e faktorit ndërkombëtar, përfshirë SHBA-në, BE-në dhe NATO-n, mbetet thelbësore sipas autoriteteve të Kosovës.

E në lidhje me këtë temë në një prononcim për “Bota sot”, ka folur eksperti i sigurisë, Arben Dashevci.

closevolume_off
Eksperti i sigurisë thekson se tensionet e fundit janë vetëm tentativa të fabrikuara dhe jo gjendje reale.

“Tentimet për tensione të fundit matanë lumit Ibër po mbesin vetëm si tentativa, sepse tensione reale nuk ka. Është Policia e Kosovës ajo që po i parandalon me kohë çdo përpjekje për destabilizim.

Dihet se zgjedhjet lokale në Kosovë janë afër dhe disa politikanë apo parti, në këtë rast, po e paraqesin situatën sikur ka tensione matanë lumit Ibër, edhe pse faktikisht nuk ka. Ata po përpiqen ta rikthejnë Kosovën në agjendën ndërkombëtare dhe të tërheqin vëmendjen e bashkësisë ndërkombëtare drejt marrëdhënieve Kosovë–Serbi.

Faktori ndërkombëtar është i pranishëm në Kosovë – përfshirë SHBA-në, BE-në dhe NATO-n – dhe kjo, natyrisht, mbetet thelbësore për ruajtjen e paqes dhe stabilitetit në rajonin e trazuar të Ballkanit. Këtë po e bëjnë së bashku me institucionet tona të sigurisë”, u shpreh ai.

Nga ana tjetër, Dashevci thekson se lufta hibride globale, veçanërisht ndikimi i Rusisë dhe Kinës, po krijon sfida të reja për orientimin euroatlantik të Kosovës. Ai vlerëson se përkrahja ndërkombëtare nuk është humbur, por po ndodhin ripozicionime strategjike në nivel global.